Nyöŋ 22 - JAM DE NHIALIC 2011

¹ Na wën ke lueel Mothe an, “Na cï weŋ ku nɔn ee thɔ̈k de raanduön ë Yithriɛl tïŋ ke cï määr, ke duökï pɛ̈l wei, pɔ̈kkï nɔm yiɛ̈nkï raande.

² Ku na rɛ̈ɛ̈r raan de yen wun mec, ku nɔn kuöckï raan de yen, ke jakï lɛɛr baai në week. Të le ë raan de yen bɛ̈n ke kɔɔr ke gëmkï yen.

³ Yak kë cït ee kënë looi, të cä wek mul yök, ku nɔn ee lupɔ, ayï këriëëc ëbɛ̈n, kë cï määr tëde raanduön ë Yithriɛl.

⁴ Na cï mul ku nɔn ee weŋ de raanduön ë Yithriɛl wïïk piny, ke duökï pɛ̈l wei, kuɔnykï ke bï mul bɛ tɔ cath ë cökke.

⁵ “Diäär acïkï lupɔɔ ke röör bï aa cieŋ, ku röör acïkï lupɔ ke diäär bï aa cieŋ, Bɛ̈nydït Nhialicdun aman kɔc ee ka cït ee kake looi.

⁶ “Na cï ɣön de amɔ̈ɔ̈r yök ë tim nɔm ku nɔn yök piny, ku yök manden ke rëër ë toŋiic ku nɔn bɔ̈ɔ̈p ë mïthke yiic, duökï manden jɔt.

⁷ Wek duëër mïth ke amɔ̈r jɔt, ku wek bï man mïth ke amɔ̈r dhil pɔ̈l, aguɔkï pïïr ë run juëc ku bäk kuɛth ë pïïrdunic ëbɛ̈n.

⁸ “Të piac wek ɣön lɔ nɔm rairai yïk, yak them aläl bäk kal thiinakäŋ looi në ɣöt nɔm, aguɔkï gup ciën awäc në biäk de raan bï wïïk ë ɣöt nɔm ku thou.

⁹ “Duökï dom de enap ee cuömic rɛɛp kɔ̈k, të la wek yen looi, abï pɛ̈n week luöi bä wek cam në mïth ke enap ku në rɛɛp kɔ̈kkë, abï keek lɛɛr tëɣeric.

¹⁰ “Duökï thɔn ë weŋ kekë mul ee rek yiëth ëtök bïk pur.

¹¹ “Duökï lupɔ cï gut në nhiëm ë läi kekë alɛɛth ke wal ee mat ëtök.

¹² “Yak lupɔɔkuön de thook kaŋuan kɔ̈c cin.

Lööŋ në Baŋ de Yök ë Diäär

¹³ “Na de raan nɔm tiiŋ cï thiaak, ku jɔ bɛ guiir an cïï be kɔɔr.

¹⁴ Ku jɔ lueth luɛɛl ë tik guöp, ku ciëk thok an cïï tik ee nyan kën kɔn yök ke moc ɣɔn thiɛɛk en en.

¹⁵ Na cï kënë rɔt looi, ke wun duet kekë man abïk lupɔ cï riɔk në riɛm de thiëëk lɔ nyuɔɔth ë göönyic në röördït ke wut nïïm, lupɔ bï ye nyuɔɔth nɔn ye tik nyan kën kɔn yök ke moc.

¹⁶ Abï wun duet lɛ̈k röördït, an, ‘Yɛn cï nyandï gäm ee monyë në thiëëk, ku ënɔɔnë acïï kɔɔr.

¹⁷ Acï nyandï cäk thok në lueth. Ku kënë ee kë nyooth en nɔn ye nyandï nyan kën kɔn yök ke moc, tiëŋkï riɛm cï riɔk në lupɔ de thiëëk guöp.’

¹⁸ Ëtɛ̈ɛ̈n, röördït ke wut abïk moc jɔ jɔt ku lee dui,

¹⁹ ku abïk moc kuum në bɔt töŋ de ateek, ku abïk wëu gäm wun duet, në biäk cïï moc ayäär bɛ̈ɛ̈i në nyan kën kɔn yök ke moc de Yithriɛl guöp. Ku tik abï ŋoot ke ye tiiŋde, ku acïï bï kɔn tɔ pɔ̈k kekë yen në akööl pïïr kek ëbɛ̈n.

²⁰ “Ku na cï kë cï luɛɛl ë yeguöp aa yic, ku cïn kë nyooth en nɔn ye duet nyan kën kɔn yök ke moc,

²¹ ke duet abï jɔt ëtɛ̈ɛ̈n, ku leerkï ɣön ë wun thok, ku abïï kɔc ke wunden jɔ biöök abï thou. Acï ayäär looi në kɔckuɔ yiic, në biäk ee yen tɔ̈c ke moc ke kën ë kɔn thiaak, ku aa ŋoot ke rɛ̈ɛ̈r baai de wun. Në ee kueerë we bï ee kërɛɛcë jɔ nyaai.

²² “Na cï moc dɔm ke nin ke tiiŋ ë raan däŋ, keek kedhie abï keek dhil nɔ̈k. Në ee kueerë wek bï kërɛɛcë jɔ nyaai.

²³ “Na de mony cï dɔm wutic, ke nin ke nyan cï lɔ̈c raandäŋ pei.

²⁴ Abäk keek dhiɛl lɛɛr ë wut këc biic ku biääkkï keek abïk thou. Nyanë abï dhil thou në baŋ kën en dhiau ke bï luök, ku yen aa nu wutic, të duëër kɔc rölde piŋ. Ku moc abï dhil thou, në biäk cï yen nin kekë nyan cï lɔc. Në ee kueerë wek bï kërɛɛcë jɔ nyaai.

²⁵ “Ku na de mony cï nyan cï lɔ̈c raan däŋ pei wiëët roor. Ëtɛ̈ɛ̈n, ee moc yen bïï nɔ̈k yetök,

²⁶ acïn kë bïï luöi nya, në biäk kën en kërɛɛc röŋ kekë thuɔɔu looi, yen ee löŋë acït ke luɔi duëërë raan cï raandäŋ mak ku nɛ̈k.

²⁷ Mony ë wïït nyan cï lɔc roor, cakaa nyanë yen ë cï dhiau ke kɔɔr kuɔɔny, acïn raan ë nu, raan duëër yen kony.

²⁸ “Ku na de mony cï dɔm ke wïït nyan kënë lɔc,

²⁹ monyë abï kuën de thiëëk gäm wun duet, thiërdhïc de ateek, ku nyanë abï aa tiiŋde. Në biäk cï yen tɔ tɔ̈c ke yen në riɛl. Ku acïï bï kɔn tɔ pɔ̈k kekë yen në akööl pïïr kek ëbɛ̈n.

³⁰ “Acïn raan bï wun tɔ yäär guöp, në luɔi bï yen niin ke tiiŋ tök ë diëër ke wun yiic.