Nyöŋ 15 - JAM DE NHIALIC 2011

Ruöön de Dhorou

¹ Go Mothe lueel an, “Në thök de ruöön de dhorou cök ëbɛ̈n, wek bï käny dhil aa päl kɔc känykï keek.

² Ku kënë ee kueer bï ë yen dhil aa looi. Kɔc cï wëu dhën mïthëkɔcken kɔc ke Yithriɛl, abïk wëu päl keek, acïkï wëu bï bɛ nööm, Bɛ̈nydït guöpde acï käny tɔ päl.

³ Wek duëër käny kaarkï tëde kɔc lei nööm, ku wek cïï käny kaarkï tëde kɔckuön ke Yithriɛl bï dhil nööm.

⁴ “Bɛ̈nydït Nhialicdun abï week thieei në ee piny gëm weekë yic. Acïn raan töŋ de kɔckun bï nyin kuany.

⁵ Na lak lɔ riëëu, ku kuanykï lööŋke yiic apiɛth, lööŋ cä lɛ̈k week ee köölë.

⁶ Bɛ̈nydït abï week thieei cït man cï Yen ye thön week, wek bï wëu aa dhën juöör kɔ̈k, ku wek cï bï aa dhëën tëde kɔc, wek bï juöör juëc ceŋ, ku acïn jur bï we ceŋ.

⁷ “Na de raanduön de Yithriɛl, raan cïn nɔm käŋ nu wutic, në wuöt nu piny bï Bɛ̈nydït gäm week, ke we duökï röt tɔ ya acɔɔk, ku jaikï në kuny kuɔny wek en.

⁸ Takkï röt adhuëëŋ, ku dhɛ̈nkï kakɛn kɔɔr.

⁹ Duökï pën dheen në biäk cïï ruöön de päl ë käŋ thiɔ̈k. Duökï täŋ rɛɛc cït ee kënë tɔ lɔ në wenïïm. Na lɔ lɔ jaai ke cïï gëm dheen, abï piɔ̈u dhiau kekë yïn në Bɛ̈nydït nɔm, ku yïn bï guöp dɛ gääk.

¹⁰ Miɔc në piɔ̈n mit, ke cïn yic cɔɔk, ku Bɛ̈nydït abï we thieei në këriëëc yak looi yic ëbɛ̈n.

¹¹ Abï dɛ kɔc ke Yithriɛl bï tɔ̈u ë we yiic ë ceŋ, kɔc kuany nyïïn ku cïnkï nïïm käŋ, ka wek yɔ̈ɔ̈k, bäk keek aa miɔɔc në dhuëëŋ.

Kueer Bïï ë Lïïm Luööi

¹² “Na cï raanduön de Yithriɛl rɔt ɣöc yïn ke ee lïm moc ku nɔn ee tik, abä keek dhil lony të cï kek yïn luööi në run kadhetem (6) cök. Të cïï ruöön de dhorou bɛ̈n abä keek dhil gäm nɔm lääu.

¹³ Ku të cï yïn keek gäm nɔm lääu, du keek tɔ jël në kecin baaŋ.

¹⁴ Miɔc keek në dhuëëŋ, në käŋiic, ka cï Bɛ̈nydït ke yïn thieei, yï amɛ̈l, ku rap, ku mɔ̈u.

¹⁵ Takkï wenïïm, we cï kɔn aa lïïm në Rip, go Bɛ̈nydït Nhialicdun we gäm nɔm lääu, yen kë gäm ɛn week ee löŋë ka.

¹⁶ “Ku tɛk däŋ bï lïmdu piɔ̈u ciën jäl jël en, tɛk däŋ bï yï nhiaar wekë dhiëndu, ku jɔ piɔ̈u dɛ luɔi rëër en.

¹⁷ Ëtɛ̈ɛ̈n, jɔ lɛɛr në nïn de ɣöndu thok ku jɔ thuth yïth ëtɛ̈ɛ̈n, ku abï jɔ aa lïmdu në pïïrde yic ëbɛ̈n. Ye nyan lïmdu luööi në ee kueer aya.

¹⁸ Du piɔ̈u ee diu të gëm yïn lïmdu nɔm lääu, ku aŋic ëgɔk, nɔn cïï lïm yïn luööi në run kadhetem yiic, në kuën de biäk tök de raan ee luui. Loi ee kënë, ku Bɛ̈nydït Nhialicdun abï we thieei në ka yak looi yic ëbɛ̈n.

Kɛ̈i de Weŋ kekë Thök

¹⁹ “Yak Bɛ̈nydït Nhialicdun täu kɛ̈i de weŋ ë ɣɔ̈kkun yiic ëbɛ̈n kekë kɛ̈i de thök ë thökkun yiic ëbɛ̈n, duökï ɣɔ̈kkë ee tɔ luui week, ku duökï thökë ee tɔ tem gup.

²⁰ Në ruöön thok ëbɛ̈n, abäk keek aa lɔ cuet në bɛ̈ikun ëtök, të töŋ de läm ë Bɛ̈nydït lɔ̈ɔ̈m.

²¹ Ku na de lɛ̈i guöp tëdak, na yek ŋöl, ku nɔn yek cöör, ku nɔn de tëdak në kegup aläl, acäkkï keek bï dhil näk Bɛ̈nydït Nhialicdun.

²² Wek duëër ee läikë cuet ë wuötkuniic. Wek duëër cuet thïn wedhie, kɔc piɛth gup ku kɔc cïï gup piɛth, cït man ya wek ŋɛɛr kekë thiäŋ cuet.

²³ Ku we cïï riɛmden bï cam cït këcam, abäk dhil wäl piny cït man ye pïïu wäl piny.