Nyöŋ 14 - JAM DE NHIALIC 2011

Dhiën cï Rɛɛc

¹ Go Mothe jam an, “Wek ee kɔc ke Bɛ̈nydït Nhialicdun. Ka të dhiëëu wek raan cï thou, duökï wegup ee ŋuɔt, ku nɔn mɔ̈tkï wenïïm në biäk tueŋ, cït man ye kɔc kɔ̈k ye looi.

² Wek ee kɔc ɣeriic ke Bɛ̈nydït Nhialicdun, acï week lɔc bäk aa kɔc ke nɔmde, në kɔc ke piny nɔm yiic ëbɛ̈n, kɔc ceŋ piny nɔm.

Lɛ̈n Piɛth ku Lɛ̈n Rac

³ “Duökï këriëëc ëbɛ̈n ee cam, kë cï Bɛ̈nydït tɔ ee kë cïï piɛth.

⁴ Wek duëër ee läikë cam: ɣɔ̈k, ku amɛ̈l, ku bɔɔth,

⁵ ku ŋɛɛr, ku amɛ̈l roor, ku bɔɔth roor, ku nɔn ee thiɔ̈ɔ̈ŋ,

⁶ ku läi ëbɛ̈n, läi de kär tɛkiic ku yek wal bɛ̈ɛ̈r.

⁷ Ku acïn lɛ̈n bï aa cam, lɛ̈n cïn kär tɛkiic ku cïkkï wal ee bɛ̈ɛ̈r. Wek cï bï aa cam në thɔ̈rɔ̈ɔ̈l, ku biɔl, ayï biɔl roor. Ayek läi cïï piɛth, ayek wal bɛ̈ɛ̈r ku acïnkï kär tɛkiic.

⁸ Duökï kudhur ee cuet. Ayek läi cïï piɛth, adekï kär tɛkiic ku acïkï wal ee bɛ̈ɛ̈r. Duökï lɛ̈n tök në ee läikë yiic ee cuet ayï guöpdɛn cï thou duökï jak.

⁹ “Wek bï rec ëbɛ̈n cuet, rɛ̈c de nyiim ku kuaac,

¹⁰ ku këriëëc tɔ̈u wïïr ëbɛ̈n ku cïn nɔm nyiim ku kuaac acïï bï cuet, ee kë cï piɛth.

¹¹ Wek bï diɛt piɛth ëbɛ̈n cuet.

^12-18 Ku diɛtkë acäkkï keek bï aa cuet, wek cïï bï cuet: në cuɔɔr, ku agumut, ku aduŋuɛɛt, ku anyigon, ku anyijung, ku ka cït keek, ku gɛk ëbɛ̈n në ka cït keek, ku wuut, aniɛɛncɔɔr, ku jaŋwïïr, ku awubeek, ku ka cït keek, ku agumut thiin, ku agumut dït, ku agaal, ku awawwau, ku dhëël, ku jaŋbiöŋ, ku acuïïl, ku lith, ku ka cït keek, ku ayalwic, ku alïïk.

¹⁹ “Käm de wuök kedhie acïkï piɛth, duökï keek ee cuet.

²⁰ Wek duëër käm piɛth ëbɛ̈n cuet.

²¹ “Duökï lɛ̈n cï thou yetök ee cuet. Aduëërkï tɔ cuet ë kɔc lei rëër në wuötkuniic, ku nɔn ɣɔ̈ckï kɔclɛn kɔ̈k. Ku wek ee kɔc ɣeriic ke Bɛ̈nydït Nhialicdun. Duökï amɛthɔ̈k ee thaal në ciɛk ke man yiic.

Lööŋ ke Töŋ de Thiëër

²² “Yak töŋ de thiëër tɔ̈ɔ̈u pei, töŋ de thiëër ë kak ee luɔk domdu kedhie ë ruöön thok ëbɛ̈n.

²³ Ku jakï lɔ të töŋ cïï Bɛ̈nydït Nhialicdun lɔc bï ë Yen aa lam thïn, në Yelɔ̈ɔ̈m ëtɛ̈ɛ̈n, jakï töŋ de thiëërdun cam, töŋ de thiëër de anyuɔl, ku mɔ̈u, ku miök de olip, ku kɛ̈i de weŋ kekë thök. Luɔikï ee kënë ke we bï riëëu de Bɛ̈nydït Nhialicdun ŋic ë aköölnyïïn ëbɛ̈n.

²⁴ Ku na cï tëde läm mɛc kekë paan rëër wek thïn, në biäk bä wek käŋ ɣääc, ka cï luɔk, cï Bɛ̈nydït we thieei, luɔikï kënë:

²⁵ Ɣaackï ka cï luɔk, ku jatkï wëu në week, lɛɛrkï keek të töŋ de läm.

²⁶ Ɣaackï wëu në kakuön kaarkï keek, weŋ, ku nyɔɔŋ amääl, ku mɔ̈u, ku nɔn ee mɔ̈n tuc, ku në Bɛ̈nydït Nhialicdun lɔ̈ɔ̈m ëtɛ̈ɛ̈n, wek bï jɔ cam ku jakï piɔ̈ɔ̈th miɛt.

²⁷ “Ku duökï Lebai rɛ̈ɛ̈r në wuötkuniic ee päl wei, acïnkï nïïm ka ke naamden.

²⁸ Në thök de ruöön de diäk ëbɛ̈n, bɛ̈ɛ̈ikï töŋ de thiëër ë kakuön cï luɔk ëbɛ̈n, ku täukï keek në wuötkuniic.

²⁹ Kek ee kacaamkë ayek kakë Lebai, në biäk cïn kek nïïm kake naamden, ku ayek kake kɔc lei, ku mïth abɛɛr, ku tiiŋ abaar rɛ̈ɛ̈r në wuötkuniic. Abïk dhil bɛ̈n ku nömkï kë kɔɔrkï ëbɛ̈n. Luɔikï ee kënë, ku Bɛ̈nydït Nhialicdun abï week thieei në këriëëc yak looi yic ëbɛ̈n.