Naɣum 3 - JAM DE NHIALIC 2011

¹ Amawoou në pänydït de riɛm, wun cï thiäŋ ke lueth, athiäŋ ke kajuëc duëërë rum, ku ka yak keek!

² Atuctuc ke waat aye ke piŋ ke ke bɔ̈, ku awuɔɔu de abëël, ku aruprup de jöŋgöör, ku miööt de abëël ke ke lɔ thïn!

³ Kɔc ke jöŋgöör alek tɔŋ, në abätɛ̈ɛ̈u ariauriau, ku tɔɔŋ lɔ bilbil. Ku näk kɔc juëc, ka kɔc cï thou acïk kenïïm dɔ̈ɔ̈r në akuut juëc arëët, ku acïï ke duëërë lëu në kuɛ̈n, ago kɔc ë bïï tɔŋ aa kɔ̈th në keek!

⁴ Ku ee kënë ëbɛ̈n ë röt looi luiyë Ninebe këtuc. Pänydïït cït tiiŋ akɔɔrröör, ee juöör diir, ku ade nɔm yiëthkɛn ee ke meet ku ayek wïn ë dɛ̈p.

⁵ Kë cïï Bɛ̈nydït de rɛm lueel kï an, “Yɛn ee nɔm yïn. Yɛn bï biɔŋku yaany nhial, ku ta yï woi ë juöör thar, ku ta ke ŋic ayärdu.

⁶ Yɛn bï thuëëc në yïn. Yïn bä riɔk guöp në kënhiany ka yïn bï yäär.

⁷ Ku raan ëbɛ̈n, raan lɔ yï tïŋ abï aa kat në yïn. Ku lueelkï an, ‘Ninebe ë riääk! Eeŋa bï ye dhiëëu? Ee tënou bän raan kɔk en yök thïn?’

⁸ Ninebe, ee yïn cï gël apiɛth awär Thebeth, wundït nu në Kiir yɔu, ku cïï pïïu gɛɛu cil? Ee Kiir yen ë ye gël, pïïu kek aaye kalde aya.

⁹ Ku piny de Ethiopia kekë Rip kek aake nu në yeciin. Ku piny de Put kekë Libiya aake ye mat në yen.

¹⁰ Ku yen acï bɛ̈n dhil peec. Ku mïthke acï ke bɛ̈n dhiac piny abïk röt noor wutic ëbɛ̈n në kuɛɛriic. Kɔckɛn dït acï ke rek cök në kuɛɛt, tëkkï keek adhuëëŋken në gɛk.

¹¹ Ayï yïn, yïn Ninebe ayadäŋ, yïn bï nɔm mum cït raan cïï mɔ̈u wit. Ka yïn bï të thiɛɛn yïn aa kɔɔr në biäk de kɔc ke ater.

¹² Ku ɣään riilku kedhie, acïtkï tim de ŋaap cïï mïthke ee lëu në gël të cï kek bɔ̈ny. Të cïï ye nieeŋ, ayek guɔ lööny në raan cam keek thok.

¹³ Tïŋ remduön ë tɔŋ acïtkï diäär kedhie! Ku pinydu acïn kë gël en në kɔc ke ater. Ka gël en abïk dëp.

¹⁴ Wundun atookë, ka week gɛ̈mkï röt pïïu, ku kiɛmkï ɣään riilkun piny. Nuaikï tiɔp ku pamkï thop.

¹⁵ Ëtɛ̈ɛ̈n yïn bïï mac nyop, ku dhoc abätäu week, abï we cam cït man ye kɔyɔm rap cam. Wek cï röt dhiëëth cït man ë kɔyɔm!

¹⁶ Yïn cï rɔt thiɔ̈ɔ̈ŋ në kɔc ee ɣɔɔc, ka wärkï kuɛl nhial! Ku ënɔɔnë abïk päär cït man ë kɔyɔm.

¹⁷ Bänyku aye ke kɔɔr ke ke liu cït luny de kɔyɔm, ee nyuc në päny kɔ̈ɔ̈th në liɛɛr ë piny, ku na cï akɔ̈l ruɛl, ke ke pär abï ciën raan ŋic të cï kek lɔ thïn.

¹⁸ Yïn meliŋdïït mac wuöt ke Athiriya, bänyku acïk thou, bänyku acïk niin aɣet athɛɛr. Kɔcku acïk riëër në kur nïïm ku cïn raan mɛ̈ɛ̈t keyiic.

¹⁹ Tëtökdu acï yic dɛ apajic, ka acïn kë duëër ke kɔn bɛ tɔ dem taitai. Raan ëbɛ̈n, raan ë ye piŋ nɔn cï yïn wïïk, ee yecin biɔ̈ɔ̈k në miɛtëpiɔ̈u, në luɔi cïn en raan kën akuöörkuöördu thiëëp thok.