Maika 6 - JAM DE NHIALIC 2011

Bɛ̈nydït Agɛɛny Yithriɛl

¹ Piɛŋkï gööny gɛɛny ë Bɛ̈nydït Yithriɛl. Jɔt rɔt Bɛ̈nydït, ku tɔ kur dït ku kur kor piŋ kë luel.

² Piɛŋkï jam de Bɛ̈nydït wek kur, wek këërkëër de pinynɔm. Bɛ̈nydït ade nɔm wël kekë kɔcke, agɛɛny kɔc ke Yithriɛl.

³ Aye Bɛ̈nydït lueel an, “Eeŋö cä wäc week kɔckï? Cä we nuaan adï? Lɛ̈kkï Yɛn.

⁴ Wek cä bɛ̈ɛ̈i bei paan ë Rip, të wään ya wek lïïm thïn. Wek cä tuöc Mothe kekë Aron, ku Miriam bïk we bɛ̈n wat.

⁵ Dɔ̈tkï në wenïïm kɔckï, në kë ɣɔn cï rɔt looi. Meliŋ de Mowap cɔl Balak acï tiët cɔl Balaam wën ë Beyor kumthok, an bïï week läm aciɛɛn. Aguɔ aciɛɛn bɛ̈n puk në yethok ke ye athiɛɛi. Takkï wenïïm në kapiɛth ɣɔn ta Yɛn ke wɛ̈ɛ̈r de Jordan dëu, ku tɛ̈mkï në Akacia ɣɛtkï Gilgal. Yen abä wek kueer ë luäk Ɛn week Yɛn Bɛ̈nydït jɔ ŋic.

Kë kɔɔr ë Bɛ̈nydït

⁶ Eeŋö bä jɔ yiën Bɛ̈nydït, Nhialic de paannhial, të lan yen lam? Bä yiɛ̈n miɔ̈c piɛth de akɛ̈ɛ̈l ee run tök bï nyuöp En ke ye miɔ̈c ye nyop ëbɛ̈n?

⁷ Bï Bɛ̈nydït piɔ̈u miɛt kekë agum ke nyök amɛ̈l? Ku nɔn bï aguum kathiëër ke kiɛɛr ke miök nhiaar? Ja Bɛ̈nydït bɛ̈n gäm mɛnh kɛ̈idï bï nɔm aa karɛc cä looi? Bä gäm mɛnh ë nɔmdï ke bï ya päl awɛ̈ɛ̈ckï?

⁸ Ei, acie yen, Bɛ̈nydït acï yï nyuöth këpiɛth yïn raan. Ku lëk yïn kë köör yïn bä looi an, Ye yic looi, ku nyuɔɔthë nhiëër agɔk, ku kuur ee yïn rɔt kuɔɔr piny në Nhialicdu nɔm.

⁹ Aye Bɛ̈nydït lueel an, “Piɛŋkï, wek kɔc ke amatnɔm de pänydït, arɔ̈ŋ bäk dɛ pɛlënɔm në rïïu riëëu wek Ɛn.

¹⁰ Yɛn kën nɔm määr në adhɛ̈pkuön yak kueet në cuëër, wek baai ee karɛc looi. Wek ee them në kake ke thëm dak thook.

¹¹ Duɛ̈ɛ̈r kɔc ee kɔc wëŋ ë kake thëm päl awɛ̈ɛ̈c adï?

¹² Kɔckɛn kueth ayek kɔc kuur, ku kɔcken ayek lueth töör, acïn yicdɛn yek lueel.

¹³ Ku ënɔɔnë, acä gɔl në luɔi luöi Ɛn week këtuc, ku riäär wenyïïn në biäk de awɛ̈ɛ̈ckun.

¹⁴ Wek bï ya cam, ku ŋuɔɔtkï ke we röi, ë yic we bï ya ŋoot ke we nɛ̈k cɔk. We bï käŋ aa jɔt, ku acäkï keek bï lëu në kuët, kë bäk aa kueet ëbɛ̈n abä riɔ̈ɔ̈k në tɔŋ.

¹⁵ Wek bï aa com, ku cïn këduön tɛmkï. Wek bï miök aa nyiith, ku cïn kë tac wek. Wek bï enap aa dhïïm, ku cïn mɔ̈n dɛkkï.

¹⁶ Kënë abï rɔt looi në biäk cä wek lööŋ rac ke melik Omri kekë wëndɛn melik Aɣap kuany yiic. Wek cï kë yek lɛ̈k week lɔ̈ɔ̈k aa looi, ku wek bä tɔ riäk, ka wek bïï raan ëbɛ̈n dhɔ̈l gup. Ku kɔc ke pinynɔm kedhie, abïk week aa luööi arac abï we luööi në män.”