Luk 18 - JAM DE NHIALIC 2011

Kääŋ de Tiiŋ cïn Nɔm Moc kekë Bɛ̈ny ee Löŋ guiir

¹ Go keek lɛ̈k kääŋ, ke kɔc ë ke bï dhil aa cool ë lɔ̈ŋ, ku cïkï ee bäp,

² lueel an, “Bɛ̈ny ee löŋ guiir anu pänydïït tök, bɛ̈ny cïï Nhialic ee riëëu, ku cïï kɔc ee theek aya.

³ Ku nu tiiŋ cïn nɔm moc ë pänydïïtë, na wën, ke bɔ̈ të nu yen, ku lueel an, ‘Kony ɛn në raan cam ɛn!’

⁴ Go kɔn yök ke reec, na wën ke jɔ lueel ë yepiɔ̈u an, ‘Ciɛk an, cä Nhialic ee riëëu, ku cä raan ee theek aya,

⁵ ku në baŋ de jun wën ee tiiŋë ya jut, ka bä kony tei, ago a cuö be jut në bɛ̈n wën ee yen cool ë bɛ̈n!”’

⁶ Go Bɛ̈nydït lueel an, “Piɛŋkï kë lueel bɛ̈ny rac, bɛ̈ny ee löŋ guiir.

⁷ Ku cïï Nhialic kɔckɛn cï lɔc bï kony, kɔcke guöp, kek kɔc ee cool ë cɔl en akööl ku wakɔ̈u, acakaa yen ë cool ë gum käŋ në këden?

⁸ Wek yɔ̈ɔ̈k an, abï ke dap kony. Ku na Wën ë Raan, të bï en rial, bï gäm yök ë piny nɔm?”

Kääŋ de Raan ë Parithai kekë Raan ee Athölbö tɔ Kut

⁹ Go kääŋë bɛ lɛ̈k kɔc kɔ̈k kɔc wën ee röt ŋɔ̈ɔ̈th, an, piɛthkï piɔ̈ɔ̈th, ku yek kɔc kɔ̈k tɔ ye kɔc rac an:

¹⁰ “Kɔc kaarou acïk lɔ Luaŋdïït ë Nhialic, lek lɔ̈ŋ, tök ee raan ë Parithai, ku tök ee raan ë athölbö tɔ kut.

¹¹ Go raan ë Parithai kɔ̈ɔ̈c nhial ku jɔ lɔ̈ŋ alë ë yepiɔ̈u an, ‘Nhialic, yïn lɛc nɔm, nɔn cän cït kɔc kɔ̈k, kɔc ee käŋ rum, kɔc ee kɔc cam, kɔc ee diëër lei kɔɔr, ku cä cït raanë aya, raan ë athölbö tɔ kutë.

¹² Yɛn ee cäm rɛɛc ë akööl kaarou ë akööl kadhorou yiic, ku yïn aa miɔɔc në kakï kedhie në töŋ wën thiëër kek!’

¹³ Go raan ë athölbö tɔ kut kɔ̈ɔ̈c tëmec, ku reec e nyin jat nhial, ku jɔ yepiɔ̈u biɔ̈ɔ̈k, ku lueel an, ‘Nhialic kok piɔ̈u we yɛn, yɛn ee raan ee kërac looi!’

¹⁴ Wek yɔ̈ɔ̈k an, “Raanë acï yenɔm dhuöny paande, ke cï tɔ piɛthpiɔ̈u awär raan wën. Raan ëbɛ̈n raan ee rɔt tɔ dït abï tɔ koor: ku raan ee rɔt tɔ kɔɔr piny abï tɔ dït.”

Yecu Athiei Mïththiaakäŋ

¹⁵ Na wën, ke ke bïï mïththiaakäŋ tëde yen aya bï ke bɛ̈n jak gup: ku të cï kɔckɛn ë piööcë e tïŋ, ke ke jɔkï jɔ̈ɔ̈ny.

¹⁶ Go Yecu ke cɔɔl, ku lueel an, “Pälkï mïththiaakäŋ ë ke bɔ̈ të nuö yɛn, ku duökï ke pën: ciɛɛŋ de Nhialic ee këde kɔc cït keek.

¹⁷ Wek yɔ̈ɔ̈k ëyic an, Raan reec ciɛɛŋ de Nhialic nööm cït man ë mɛnhthiinakäŋ, ka cïï bï lɔ thïn ë taitai.”

Raan Kueth

¹⁸ Go thiëëc ë bɛ̈ny tök an, “Bɛ̈ny piɛth bɛ̈ny ee wëët, eeŋö bä looi kë bän pïïr athɛɛr lɔ̈ɔ̈k lak?

¹⁹ Go Yecu lueel an, “Eeŋö ë yïn a tɔ piɛth? Acïn raan töŋ piɛth nu, ee Nhialic etök.

²⁰ Yïn ŋic cök ke lööŋ an, ‘Du diëër lei ee kɔɔr, du ye näk, du ye kual, du ye ya cäätɔ alueeth, ye wuur riëëu ayï moor.”’

²¹ Go lueel an, “Cökkë acä ke ya döt kedhie ɣɔn aa yɛn meth aɣet cï ënɔɔnë.”’

²² Na wën, aacï Yecu kakë piŋ, ke jɔ yɔ̈ɔ̈k an, “Ee tök tei yen ŋoot ke dak yïn. Jɔ kaku ɣaac kedhie, ku tɛ̈kë ke kɔc kuanynyïïn, ke yïn bï dɛ wëu paannhial: ku jɔ bɛ̈n, kuany a cök.”

²³ Ku të cï en ee kakë piŋ, ke dhiau piɔ̈u arëët: luɔi juëcë kakë arëët.

²⁴ Na wën, aacï Yecu dhiën dhiɛɛu en piɔ̈u tïŋ, ke jɔ lueel an, “Lɔ bï kɔc juëc ë kaken lɔ ë ciɛɛŋ de Nhialic, ee këril oou!

²⁵ Tëëk bï thɔ̈rɔ̈l tëëk ë liiprɔ nyin, yen ee këpiɔl, në luɔi bï raan juëc ë kakë lɔ ë ciɛɛŋ de Nhialic yic.”

²⁶ Go kɔc wën cïï kakë piŋ gokï thiëëc an, “Ka ye ŋa duëërë jɔ kony wëi?”

²⁷ Go lueel an, “Kak ë kɔc dhal aye Nhialic ke lëu.”

²⁸ Ku jɔ Petero lueel an, “Tïŋ, wo ë käŋ nyääŋ piny kedhie, ku kuanyku yïcök.”

²⁹ Go lɛ̈k keek an, “Wek yɔ̈ɔ̈k ëyic an, acïn raan cï ɣöt pɔ̈l, ku pɛ̈l wun ku man, ku mïthëkɔcken, ku tik, ku mïth në biäk de ciɛɛŋ de Nhialic,

³⁰ ku cïï kajuëc bï yök ee pinyë nɔm ënɔɔnë, awärkï kakɛn cï pɔ̈l, ku miäk në piny bï bɛ̈n, ke jɔ pïïr athɛɛr yök.”

Yecu Ajam ë Këde de Diäk në Baŋ ë Thonde

³¹ Na wën, ke cɔl kɔcke kathiëër ku rou, ku yöök keek an, “Tiëŋkï! Wo lɔ Jeruthalem, ku käŋ kedhie ka cï gɔ̈ɔ̈r ë tït në këde Wën ë Raan abï ke thöl ë luɔi.

³² Abï yiɛ̈n Juöör, ku abï geet guöp, ku lɛ̈ɛ̈të, ku ŋuutë guöp.

³³ Ku abïk dui, ku jɔkï nɔ̈k abï thou, ku abï rɔt bɛ jɔt ëkööl ee kek diäk.”

³⁴ Ku acïn cöök töŋ cïk yökic në kakë yiic: jamë acï mɔ̈ny keek, agokï ka cï lueel, cuö ŋic.

Yecu atɔ Cɔɔr ee Lip Dem

³⁵ Na wën, aacï thiɔ̈k ke Jeriko, ke yök cɔɔr a rɛ̈ɛ̈r ë kueer këc ke lip.

³⁶ Ku jɔ kut ë kɔc piŋ atëk, go thiëc an, “Ee käŋö?”

³⁷ Gokï yɔ̈ɔ̈k an, “Yecu de Nadhareth yekï tëkë.”

³⁸ Go cööt an, “Yecu Wën ë Debid, kok piɔ̈u we yɛn!”

³⁹ Go jɔ̈ɔ̈ny ë kɔc wën cath tueŋ an, mim. Go ŋuak ë cɔ̈t an, “Wën ë Debid, kok piɔ̈u we yɛn!”

⁴⁰ Na wën, ke Yecu kääc, ku jɔ kɔc yɔ̈ɔ̈k an, bɛ̈ɛ̈ikï. Ku të cï en bɛ̈n tëthiɔ̈k, ke thiëëc an:

⁴¹ “Eeŋö nu ë yïpiɔ̈u, kë bä luöi yïn?” Go lueel an, “Bɛ̈nydït, ee luɔi bän bɛ yïn yen akaar.”

⁴² Go Yecu yɔ̈ɔ̈k an, “Yiɛ̈në! Gämdu acï yï kony.”

⁴³ Go dap yïn ënɔnthiinë, ku jɔ kuany cök, ke lec Nhialic: go kɔc ëbɛ̈n, të cï kek e tïŋ, gokï Nhialic leec.