Lebai 17 - JAM DE NHIALIC 2011

Ɣɛɛrë yic de Riɛm

¹ Na wën ke Bɛ̈nydït ë yöök Mothe

² an, lɛ̈kë Aron kekë wɛ̈ɛ̈tke ku kɔc ke Yithriɛl kedhie, lɛ̈kë keek an, kë cï Bɛ̈nydït lueelkï,

^3-4 an, ‘Raan baai de Yithriɛl ëbɛ̈n, raan näk weŋ, ku nɔn ee amääl, ku nɔn ee bou en nɛ̈k në paany de mätic, ku nɔn nɛ̈k ë wut këc biic. Ku raan kën miɔ̈c bɛ̈ɛ̈i në paany de mät thok, miɔ̈c bïï bɛ̈n gäm Bɛ̈nydït, ke ye miɔ̈cde, yen ee raanë abï guöp dɛ awäny de näk.

⁵ Kënë abï tɔ̈u aya, kɔc ke Yithriɛl abïk Bɛ̈nydït aa yiɛ̈n miɔ̈c yek nɔ̈k, miɔ̈cdɛn yek looi ënɔɔnë roor. Ku abïk keek dhil yiɛ̈n bɛ̈ny de kake Nhialic, ku yïnkï keek Bɛ̈nydït në paany de mät thok. Ku nɛ̈kkï keek ke ee miɔ̈c de mät.

⁶ Ku bɛ̈ny de kake Nhialic, abï riɛm wiɛ̈ɛ̈th në yïïŋ de Bɛ̈nydït guöp, në paany de mät thok, ku nyop kɔl bïï aa atuɔ̈m mit në Bɛ̈nydït piɔ̈u.

⁷ Kɔc ë ke cïï miɔ̈cden be näk yanh cɔl Bou, yanh wään cï kek röt gäm en yek lam, kënë abï aa ciɛɛŋden aɣet athɛɛr wadäŋ agut cï rɛm kɔ̈k bï lɔ̈ɔ̈k bɛ̈n.

⁸ Lɛ̈kë ë keek an, ‘Raan baai de Yithriɛl ëbɛ̈n, ayï alei ëbɛ̈n rɛ̈ɛ̈r në keyiic, raan ee miɔ̈c ye nyop ëbɛ̈n gam, kekë miɔ̈c näk ayadäŋ.

⁹ Ku raan cïï miɔ̈c ee bɛ̈ɛ̈i në paany de mät thok, bïï bɛ̈n näk Bɛ̈nydït yen ee raanë abïï dhil tɛ̈ɛ̈m bei në kɔckï yiic.

¹⁰ Raan baai de Yithriɛl ëbɛ̈n ayï alei bï rɛ̈ɛ̈r në keyiic, ku ee riɛm cam, Yɛn bï Yanyin wɛ̈l ee raanë, ku abä tɛ̈ɛ̈m bei në kɔckï yiic

¹¹ Në biäk nu ë pïïr de kë cï cak në riɛmic, ku acä gäm week bä wek wegup aa teem në yïk nɔm, në biäk ee yen riɛm yen ye raan teem guöp në këde pïïr.

¹² Në baŋ de ee kënë yen ë lɛ̈k ë Bɛ̈nydït kɔc ke Yithriɛl an, ‘Raan de Yithriɛl ëbɛ̈n ayï alei rɛ̈ɛ̈r në keyiic ëbɛ̈n, acïkï bï aa cam në rïŋ ŋoot ë riɛmde në yeyic.

¹³ Na de raan de Yithriɛl ku nɔn ee raan lei rɛ̈ɛ̈r në kɔc yiic, na cï lɛ̈i, ku nɔn ee din ee cam dɔm, apiɛth bï riɛmde tɔ kuëër piny, ku kut riɛm nɔm në abuui.

¹⁴ Riɛm de kë pïïr ëbɛ̈n anu në riɛmde yic, në baŋ de ee kënë, yen ë lɛ̈kë Bɛ̈nydït kɔc ke Yithriɛl, an, cïkï bï aa cam në rïŋ ŋoot ë riɛmde në yeyic. Ku raan lɔ kë cït ee kënë looi, acïï bïï tɔ ee raan töŋ de kɔcke yiic.

¹⁵ Ku raan de Yithriɛl ëbɛ̈n, ayï raan lei ëbɛ̈n, raan lɔ cam në rïŋ de lɛ̈n cï thou, ku nɔn ee lɛ̈n cïï lɛ̈n roor nɔ̈k, abï lupɔɔke dhil waak ku wɛɛk rɔt në pïïu, abï rac agut cï thëën, të ŋoot en kë kën guöp waar.

¹⁶ Ku na kën lupɔɔke waak, ku cïï rɔt wak, ka abï guöp dɛ awäc.