Lebai 16 - JAM DE NHIALIC 2011

Kööl de Wɛ̈ɛ̈r

¹ Na wën ke Bɛ̈nydït ë jam kekë Mothe në biäk de thon de wɛ̈ɛ̈t ke Aron kaarou cök, wɛ̈ɛ̈t wään cï keek nɔ̈k në biäk cï kek maany cïï yic ɣer luöi Bɛ̈nydït.

² Go Bɛ̈nydït Mothe yɔ̈ɔ̈k, an, “lɛ̈kë wänmuuth Aron, në ë cie bɛ̈n Tëɣeric aläl të cï yen ye tak tei, abï dhil lɔ thïn ke ceŋ lupɔ në akööl röŋ, në biäk yen të wään tiëc ɛn në luätic, në akum de Athänduŋ de mät nɔm. Na le lɔ rɛɛc ka abä nɔ̈k.

³ Abï lɔ Tëɣeric aläl të cï yen miɔɔr atiëëk bɛ̈ɛ̈i, ke ye miɔ̈c de kërac ku nyɔɔŋ amäl ke ye miɔ̈c ye nyop ëbɛ̈n.

⁴ Na wën, ke Bɛ̈nydït ë gɛm ë lööŋkë, lueel, an ‘Të kën Aron kɔn lɔ Tëɣeric aläl, abï dhil waak ku tɛ̈ɛ̈u lupɔ de linɔn de bɛ̈ny de kake Nhialic në yekɔ̈u, ku tɛ̈ɛ̈u athuruɛl de linɔn, ku ë tɛ̈ɛ̈u thiööth ku lupɔ de nɔm.

⁵ Ku akutnɔm de kɔc ke Yithriɛl, abïk Aron gäm nyök ke bɔɔth kaarou ke ye miɔ̈c de kërac, ku nyɔɔŋ amääl tök ke ye miɔ̈c ye nyop ëbɛ̈n.

⁶ Ku abï miɔɔr nɔ̈k, bï gam ke ye miɔ̈c de kërac ke yen guöp, ku abï rɔt jɔ teem kekë paande.

⁷ Ku ëtɛ̈ɛ̈n, abï bɔɔth kaarou jɔ lɛɛr në paany de mät thok ë Bɛ̈nydït nɔm.

⁸ Ku Aron abï gɛk dɛɛny në baŋ de bɔɔth kaarou, ëtɛ̈ɛ̈n abï ke looi në kur kaarou, tök acï gɔ̈ɔ̈r kɔ̈u an, Këde Bɛ̈nydït ku däŋë an, “Këde Adhadhel.”

⁹ Ku Aron abï nyɔɔŋ cï gaak lɔc näk Bɛ̈nydït, ku gɛm ke ye miɔ̈c de kërac.

¹⁰ Ku nyɔɔŋ cï lɔc ke ye këde Adhadhel, abïï gäm Bɛ̈nydït ke pïïr ke bïï teem guöp, ku kuɛɛthë wei të lɔ jɔ̈ɔ̈r de Adhadhelic, ago karɛc ke kɔc jat wei.

¹¹ Ku të cï Aron miɔɔr nɔ̈k ke ye miɔ̈c de kërac në biäk de yen guöp, ku abï rɔt teem kekë paande.

¹² Abï thak jɔ bɛ̈ɛ̈i në yïk nɔm thaaŋ thiäŋ ke many de cool. Ku abï cinke kaarou thiɔ̈ɔ̈ŋ në wɛ̈ɛ̈l ŋïïr läk, ku bïï keek Tëɣeric aläl.

¹³ Ku abï wɛ̈ɛ̈l ŋïr jɔ tääu ë macic ëtɛ̈ɛ̈n në Bɛ̈nydït nɔm, ku tol de wɛ̈ɛ̈l ŋïr abï akum de athänduŋ de mät thiaan, ago cïï tïŋ ku thou.

¹⁴ Ku abï riɛm de miɔɔr biäk nööm në yeriöp ku wïïth në akum nɔm, ku wïïth riɛm biäk në paany de mät nɔm raan dhorou.

¹⁵ Në ee kënë cök, abï nyɔk jɔ nɔ̈k ke ye miɔ̈c de kërac në baŋ de kɔc, ku bïï riɛmde ë gëlgëlic ku wïïth riɛmde në akum nɔm, ku në paany de mät nɔm, cït man cï yen e looi në riɛm de miɔɔr.

¹⁶ Në ee kueerë, abï atɛɛm jɔ luöi tëɣeric, ku në biäk de acuɔl de kɔc ke Yithriɛl, ku karɛcken, kënë abï dhil luöi paany de mät, në biäk ye yen kɔ̈ɔ̈c në kɔciic, kɔc de gup acuɔl.

¹⁷ Ku të cï Aron lɔ tëɣeric, le atɛɛm looi, abï aa ciën raan rɛ̈ɛ̈r në paany de mätic, agut të bï yen bɛ̈n bei, ku teem rɔt kekë paande, ku jɔ aa amatnɔm de Yithriɛl ëbɛ̈n.

¹⁸ Ku ëtɛ̈ɛ̈n, abï jɔ bɛ̈n biic ë yïk lɔ̈ɔ̈m, yïïŋ nu në Bɛ̈nydït nɔm, ku teem kɔc gup. Abï riɛm biäk de miɔɔr nööm, ku nööm riɛm biäk de nyɔk, ku tɛ̈ɛ̈u në yïk tuŋ kedhie.

¹⁹ Ku abï riɛm biäk wiɛ̈ɛ̈th në yïk kɔ̈u në yeriöp raan dhorou, në baŋ bï yen yïk waak ku tɔ guöp piath, në awɛ̈ɛ̈c de kɔc ke Yithriɛl.

Nyɔɔŋ ë Guikwei

²⁰ Na cï Aron jɔ thök në kɔ̈c de Tëɣeric aläl, kekë paany de mät, ku yïk. Abï Bɛ̈nydït jɔ gäm nyɔɔŋ pïïr cï lɔ̈c Adhadhel.

²¹ Ku abï yeciin thany në nyɔk nɔm, ku gɛm awɛ̈ɛ̈c ku karɛc ku luɔi, ku karɛc de kɔc ke Yithriɛl ëbɛ̈n. Ku jɔ keek pɔ̈k në nyɔk nɔm, ku ëtɛ̈ɛ̈n, nyɔk abï jɔ kuaath ë jɔ̈ɔ̈ric në raan cï lɔc an bï yen looi.

²² Ku nyɔk, abï karɛcken kedhie jɔ lɛɛr wei piny cïn raan ceŋ en, ku jɔ nyɔk lɔ nyääŋ ë jɔ̈ɔ̈ric.

²³ Ku jɔ Aron lɔ në paany de mätic, ku bïï lupɔ ke linɔn bei, lupɔ wën bï tääu ke kën kɔn lɔ Tëɣeric aläl. Ku abï keek jɔ nyääŋ piny ëtɛ̈ɛ̈n.

²⁴ Abï rɔt dhil waak në pïïu tëɣeric, ku jɔ lupɔɔkɛn ye ke ceŋ tääu në yekɔ̈u, ku jɔ bɛ̈n ku nɛ̈k miɔ̈c ye nyop ëbɛ̈n në biäk de yen guöp, ku miɔ̈c ye nyop ëbɛ̈n në biäk de kɔc, ku jɔ rɔt teem kekë kɔc ayadäŋ.

²⁵ Ku abï miök de miɔ̈c de kërac nyop në yïk nɔm aya.

²⁶ Ku raan wën kuɛɛth nyɔk ë jɔ̈ɔ̈ric, nyɔɔŋ de Adhadhel, abï lupɔɔke dhil waak, ku wɛɛk rɔt në pïïu, ku jɔ bɛ̈n wutic.

²⁷ Ku miɔɔr kekë nyɔɔŋ de miɔ̈c de kërac, wään cïï riɛmden bɛ̈ɛ̈i tëɣeric, bïï ë yen bɛ̈n teem guöp, abï keek dhil lɛɛr ë wut këc. Yen biöŋden ayï rïŋ, ayï yäc, abï keek dhil nyop ëbɛ̈n.

²⁸ Ku raan ë nyop keek, abï lupɔɔke dhil waak, ku wɛɛk rɔt në pïïu, ku ëtɛ̈ɛ̈n abï jɔ bɛ̈n wutic.

Dön de Kööl de Wɛ̈ɛ̈r

²⁹ Kënë abäk aa looi ë run nyïïn ëbɛ̈n. Në kööl ye pɛɛi de dhorou thok thiëër, wek bï röt dhil aa theek, ku duökï ee lui thïn, kɔc kedhie, raan de Yithriɛl, ayï alei rɛ̈ɛ̈r ë weyiic.

³⁰ Në ee köölë wek bïï teem gup, ago week waak në Bɛ̈nydït nɔm, ku we bï gup jɔ piath në karɛckun kedhie.

³¹ Ee Thabath de lɔ̈ŋ, ka we bï dhil aa thek thïn, ee kë bäk aa looi ë run nyïïn ëbɛ̈n.

³² Ku bɛ̈ny de kake Nhialic cï tɔc ku thany nɔm, në biäk bï yen nyin de wun löökic, ke ye bɛ̈nydïït ë kake Nhialic, abïï dhil teem guöp. Abï lupɔ ɣeric de linɔn dhil tääu në yekɔ̈u.

³³ Ku abï tëɣeric teem guöp, ku teem paany de mät guöp kekë yïk, ku abï bäny ke kake Nhialic ku kɔc ke amatnɔm kedhie teem gup.

³⁴ Kënë abäk aa looi ë run nyïïn ëbɛ̈n. Kɔc ke Yithriɛl abïï keek aa teem gup raan tök në ruöön yic në baŋ de karɛcken, Go Mothe ke looi cït man cï Bɛ̈nydït e yɔ̈ɔ̈k.