Lebai 11 - JAM DE NHIALIC 2011

Läi Duëërë aa Cam

¹ Na wën ke Bɛ̈nydït ë gëm Mothe kekë Aron ë lööŋkë.

² Bïk keek gäm kɔc ke Yithriɛl. Në läi roor kedhie, wek bï läikë aa cam:

³ Wek bï läi de kär tekiic taitai ku yek wal bɛɛr aa cam.

⁴ Ku ade läi kɔ̈k de nïïm kär tɛkiic kapäc, ku läi kɔ̈k ayek wal bɛɛr kapäc, kek ee läikë duökï keek ee cam. Thɔ̈rɔ̈l ee wal bɛɛr ku kärke acïkï yiic tɛk, acïï piɛth tëde week në biäk de ciɛɛŋ.

⁵ Biɔl wut cakaa nɔn ee yen wal bɛɛr, acïn nɔm kär tɛkiic, acïï piɛth tëde week.

⁶ Biɔl roor cakaa nɔn ee yen wal bɛɛr, acïn nɔm kär tɛkiic, acïï piɛth të de week.

⁷ Ku Kudhur cakaa nɔn de yen kär cï tekiic taitai, acïï wal ee bɛɛr, acïï piɛth tëde week.

⁸ Duökï rïŋken ee cam, ku duökï gupken cï thou ee jak, acïkï piɛth tëde week.

⁹ Ku në läi ceŋ wɛ̈ɛ̈r yic, ayï läi nu ë nyïïniic, wek duëër rec de thook wil ayï rec de kɔ̈ɔ̈th kuaac aa cam.

¹⁰ Ku läi nu në wɛ̈ɛ̈ric ayï nyïïniic kedhie, läi cïn thook wil ayï kuaac, läi ee kuaŋ wïïr, ayï läi rɛ̈ɛ̈r wïïr në läi kɔ̈kkiic. Yak keek rɛɛc.

¹¹ Ku në luöi bä wek keek rɛɛc, wek cïï rïŋken bï aa cam, ku yak gupkɛn cï thou rɛɛc aya.

¹² Ku wek cïï bï dhil aa cam në läi rɛ̈ɛ̈r wïïr, ku cïnkï wil kekë kuaac.

^13-19 Ku diɛtkë acïï keek bï ya cam në biäk cïï ë keek rɛɛc, yï cuɔɔr, ayï anyigon, ayï lith, ayï acuïïl, ayï gaak, ayï gaak col, ayï jaŋwïïr, ayï jaŋbiöŋ, ayï jaŋmɛɛc, ayï agumut. Ayï dhëël, ayï alak, ayï arialbeek. Ayï agaal, ayï awawwau, ayï wut, ayï ayalwic, ayï alïïk.

²⁰ Käm de wuök kedhie ku yek cath në cök kaŋuan, acïï keek bï cam acïkï piɛth.

²¹ Ku käm de wuök ku yek kac, kek abäk keek aa cam.

²² Wek duëër kɔyɔm aa cam ayï gɔt, ayï gɔn dïït ee kac.

²³ Ku käm kɔ̈k thiiakäŋ de wuök, ku ka ee mol piny, acïkï piɛth abäk keek rɛɛc.

²⁴ Kek ee kämkë abïk week tɔ rac. Ku raan lɔ kɔ̈m cï thou jak në ee kämkë yiic, abï guöp rac aɣët cï thëën.

²⁵ Ku raan lɔ kɔ̈m cï thou kuany, abï lupɔɔke dhil waak, ku abï guöp rac aɣët cï thëën.

²⁶ Läi kɔ̈k adekï kär tɛkiic, ku kärken akënkï keyiic tek taitai, ku läi kɔ̈k acïkï wal ee bɛɛr, keek arackï tëde week. Ku raan lɔ lɛ̈n cï thou në ee läikë yiic jak, abï guöp rac.

²⁷ Ku läi ee cath në cök kaŋuan kedhie, ku läi ee cath në keriöp, acïkï piɛth tëde week. Ku raan lɔ lɛ̈n cï thou në ee läikë yiic jak, abï guöp rac aɣët cï thëën.

²⁸ Ku raan lɔ lɛ̈n cï thou kuany në ee läikë yiic, abï lupɔɔke dhil waak, ku abï guöp rac aɣët cï thëën, ke ee läikë acïkï piɛth tëde week.

²⁹ Läi ee mol piny në keyöth, acïkï piɛth tëde week, ayï Acɔ̈m, ayï cuɔl, ayï lok, ayï kuat de alëëudït kedhie.

³⁰ Ayï Ariik, ayï alëu, ayï Aroorguënjaak, ayï anyanygäu, ayï nyaŋ, ayï karac, ayï agaany.

³¹ Kek ee läi ee mol pinyë, acïkï piɛth tëde week, raan lɔ guöpdɛn cï thou jak, abï guöp rac aɣët cï thëën.

³² Na lɔ lɛ̈n cïï piɛth thou, ku lööny në këdäŋ kɔ̈u, yen ee kënë acïï bï piath ayadäŋ. Ku na ee lupɔɔ ë loi alath, ayï dɛ̈l, ayï lupɔ de nhiëm, ayï kë ye käŋ looi. Kë cïï lɛ̈i lööny në yekɔ̈u, abï dhil waak në pïïu, ku acïï bï piath aɣët cï thëën. Na lë abï jɔ bɛ piath.

³³ Na cï lɛ̈n cïï piɛth thou, ku lööny në thaaŋ de tiɔpic, kën ë yök ke nu në thakic acïï bï piath, yïn bï thak dhil nɔ̈k.

³⁴ Na lɔ pïïu nu në thaaŋ cïï piɛthic, lööny në këcamic ëbɛ̈n, yen ee këcamë acï bï piath.

³⁵ Ku na lɔ lɛ̈n cï thou, lɛ̈n cïï piath lööny në këdäŋic, kënë acïï bï piath. Na ee tööny de awac, ku nɔn ee tööny de thät, töny abï dhil dhoŋ abïï lɔ thorthor, kek ee kakë acïkï piɛth tëde week.

³⁶ Nyin de pïïu kekë yinh de pïïu ye gem, abïk piath, ku raan jak lɛ̈n cï thou në läi cïï piɛth yiic, acïï guöp bï piath.

³⁷ Na cï lɛ̈n cï thou, lɛ̈n cïï piath lööny në kɔ̈th bïï comiic, kek ee kɔ̈thkë abïk ŋoot ke ke piath.

³⁸ Ku na ye kɔ̈th pïïu jiij, ku cï lɛ̈n tök lööny thïn, kek kɔ̈thkë acïkï piɛth.

³⁹ Ku na lɔ lɛ̈n yak cam thou raan lɔ jak guöp, raanë acïï guöp bï piath aɣët cï thëën.

⁴⁰ Ku raan lɔ rïŋ de lɛ̈n cï thouwë cuet, abï lupɔɔke dhil waak, ku acïï guöp bï piath aɣët cï thëën. Ku raan lɔ guöp de lɛ̈n cï thou kuany, abï lupɔɔke dhil waak, ku acïï guöp bï piath aɣët cï thëën.

⁴¹ Läi ee mol piny kedhie abïï keek dhil maan. Acïï keek bï dhil cuet.

⁴² Wek cïï läi ee mol piny bï aa cam, ayï läi wën ee mol në keyöth, ayï läi ee cath në cök kaŋuan, ayï läi ee cath në cök juëc, abïï keek dhil maan.

⁴³ Duökï röt tɔ rac në biäk de läikë, duökï röt tɔ rac në keek.

⁴⁴ Ee yɛn Bɛ̈nydït Nhialicdun. Takï weyiic ɣer në biäkdï, në luɔi ɣɛɛr Ɛn yic. Duökï röt tɔ rac në biäk de lɛ̈n töŋ ee mol piny.

⁴⁵ Ee yɛn Bɛ̈nydït Raan ë bïï week bei paan ë Rip, ke ya bï aa Nhialicdun. Wek bï yiic dhil ɣɛɛr në luɔi ɣɛɛr Ɛn yic.

⁴⁶ Kake ayek lööŋ në biäk de käŋ ëbɛ̈n: yï ɣɔ̈k, ayï diɛt, ku läi kɔ̈k nu në biic, ayï läi kɔ̈k nu wïïr, ayï läi kɔ̈k wën ee mol piny.

⁴⁷ Kek lööŋkë, ayek kɔc kuɔny në ŋïny bï kek akeu ŋic, në kaam de lɛ̈n piath ku lɛ̈n cïï piɛth. Ku ayek kɔc kuɔny në luɔi bï kɔc län ye cam ŋic, ku läi kou ke cie cam.