Kuɛ̈n 23 - JAM DE NHIALIC 2011

¹ Go Balaam lɛ̈k Balak an, “Yiëkë yɛn yïk kadhorou, ku yiɛ̈në yɛn thön kadhorou, ku amɛ̈l kadhorou.

² Go Balak ka cïï Balaam lɛ̈k en looi kedhie, ku gɛmkï miɔɔr ku amääl në yïk nïïm kadhorou.

³ Ku jɔ Balaam lɛ̈k Balak an, “Kääcë ee në, në miɔ̈cduön ye nyop lɔ̈ɔ̈m. Ku ya lɔ Bɛ̈nydït tïŋ na bï ya bɛ̈n neem. Ke cï nyuöth Ɛn ëbɛ̈n, abä bɛ̈n lɛ̈k yïn. Go Balaam lɔ nhial në kuur nɔm yetök.

⁴ Go Bɛ̈nydït lɔ yök. Go Balaam lɛ̈k Bɛ̈nydït an, “Yɛn ë yïk kadhorou yïk, ku gam miöör kadhorou, ku amɛ̈l kadhorou në kenïïm.

⁵ Go Bɛ̈nydït Balaam guiëër ke bï lɔ lɛ̈k Balak, ku tɔ dök e nɔm Balak le lɛ̈k ke cï guiir.

⁶ Na wën, ke Balaam ë puk rɔt, go Balak lɔ yök aŋoot ke kääc në miɔ̈cdɛn ye nyop lɔ̈ɔ̈m kekë bäny ke Mowap kedhie.

⁷ Go Balaam jamde gɔl an, “Balak ë ya bɛ̈ɛ̈i piny de Aram, Meliŋ de Mowap acï ya diëc në kur ke aköl amiäk acï lɛ̈k ɛn an, “Bä ciënë yɛn baai de Jakop, Bä ciënë yɛn kɔc ke Yithriɛl!’

⁸ Duɛ̈ɛ̈r kɔc cieen adï, kɔc kënë Nhialic cieen? Ku duɛ̈ɛ̈r kɔc cieen adï, kɔc kënë Bɛ̈nydït cieen?

⁹ Kɔc ya woi ke ya kääc tëthöny. Ku tïŋ keek ke ya nu në kuur nɔm. Ee kɔc lɛɛn rɛɛr pei ke ke ye wut, Kɔc cïï röt ee kuɛɛn në juöör kɔ̈kiic.

¹⁰ Kuat de Jakop acïtkï abuui, eeŋa duëër keek lëu në kuɛ̈n? Tɔ ya thou në thon ë raan piɛth piɔ̈u, tɔ thondï cït thonden.

¹¹ Go Balak lɛ̈k Balaam an, “Eeŋö cï luöi yɛn, yïn aa bɛ̈ɛ̈i bä kɔc ke ater bɛ̈n lam, ke yï puk rɔt thiei keek?

¹² Go Balaam puk nɔm an, “Ee ke cïï Bɛ̈nydït lɛ̈k Ɛn yetök, yen abä lueel.

Cäär de Balaam ee Kek Rou

¹³ Go Balak lɛ̈k Balaam an, “Bä lokku tëdäŋ bï yïn biäk de kɔc ke Yithriɛl lɔ tïŋ. Ku ëtɛ̈ɛ̈n, abä keek läm Ɛn.

¹⁴ Go lɛɛr dom de Dhopim në kuur ë Pithga nɔm. Ku le yïk kadhorou yïk ëtɛ̈ɛ̈n, ku gɛm miöör kadhorou në kenïïm, ku amɛ̈l kadhorou. Thɔn kekë amääl në yïk nɔm.

¹⁵ Go Balaam lɛ̈k Balak an, “Dɔ̈ŋë ke yï kääc në miɔ̈cduön ye nyop lɔ̈ɔ̈m ee në, ya lɔ tëde Bɛ̈nydït tɛ̈n la jam wokë yen.

¹⁶ Go Bɛ̈nydït lɔ yök kekë Balaam, ku lëk ke bï lɔ lueel an, “Puɔ̈kë yïnɔm Balak, lɔ guiëërë ee jamë.

¹⁷ Go Balaam enɔm puk, go Balak lɔ yök aŋoot ke kääc në miɔ̈cdɛn ye nyop lɔ̈ɔ̈m kekë bäny ke Mowap. Go Balak ye luɔp an, “Eeŋö cïï Bɛ̈nydït lɔ lueel?.

¹⁸ Go Balaam jam jɔ gɔl lueel an, “Bä, Balak wën ë Dhipor, bä piŋ ke luɛɛl.

¹⁹ Nhialic acïï lueth ee töör, acie raan. Ku cïï yenɔm ee waar cït man ë raan. Ke cï than ee rɔt tiiŋ, ku ke cï lueel, ee rɔt looi.

²⁰ Yɛn cï yɔ̈ɔ̈k nɔn thiɛɛi Ɛn keek, Acïï Bɛ̈nydït ke thieei ka acä duëër waar.

²¹ Acïn riääk cï tiëŋ baai de Jakop. Ku cïn kërɛɛc ŋïc ë Yithriɛl. Bɛ̈nydït Nhialicdɛn atɔ̈u ke keek, ku agamkï nɔn yen meliŋden.

²² Acïï Nhialic ke bɛ̈ɛ̈i bei Rip, ku ee tɔŋden thɔ̈ɔ̈r cït thɔn cï jök.

²³ Acïn athuɛ̈ɛ̈th, ku cïn kë bï caar, duëër kɔc ke Yithriɛl lëu. Acïn kɔc bï jam në biäk de Yithriɛl, an, ‘tïŋ kë cïï Nhialic looi!’

²⁴ Kɔc ke Yithriɛl ayek röt jɔt cït ŋun ë köör, ku yɔ̈kkï röt cït köör cie lɔ̈ŋ të kën en lɛ̈nde dɔm, ku dek riɛmde.

²⁵ Go Balak lɛ̈k Balaam an, “Na cï jai nɔn lɛm yïn keek, ke duk keek thieei.

²⁶ Go Balaam bɛ̈ɛ̈r an, “Ë kɛn lɛ̈k yïn nɔn yen ke cïï Bɛ̈nydït lɛ̈k Ɛn yen bä looi yetök?.

Cäär de Balaam ee Kek Diäk

²⁷ Go Balak lɛ̈k Balaam an, “Bä lokku tëdäŋ. Tɛk däŋ bï Nhialic yï lɔ tɔ lam keek ëtɛ̈ɛ̈n.

²⁸ Go Balaam lɛɛr ë kuur ë Peyor nɔm, ku woikï jɔ̈ɔ̈r piny.

²⁹ Go Balaam lɛ̈k en an, “Yiëkë yɛn yïk kadhorou ee në, ku bɛ̈ɛ̈i yë thön kadhorou, ku amɛ̈l kadhorou.

³⁰ Go Balak ke cï lɛ̈k en looi. Gokï thɔn gam ku gɛmkï amääl në yïk nɔm në ee yïkë nïïm kadhorou.