Jop 40 - JAM DE NHIALIC 2011

^1-2 Go Nhialic Awärjäŋ lɛ̈k Jop an: “Yïn bä ŋoot ke yï tɛɛr we Yɛn, ku bä ee wëlkiënkë bɛ̈ɛ̈r?

Bëër de Jop

^3-4 Go Jop Bɛ̈nydït bɛ̈ɛ̈r thok an, “Yɛn ë jam në pialëpiɔ̈u Bɛ̈nydït, eeŋö duɛ̈ɛ̈r bɛ̈ɛ̈r? Abä them bï ciën këdiën bɛ lueel.

⁵ Yɛn cï kajuëc cä ke duëër lueel, guɔ lueel.

Bɛ̈ɛ̈r ë Bɛ̈nydït

⁶ Go Bɛ̈nydït bɛ̈ɛ̈r nyɔk ku lëk Jop në yomdïït amaŋic an:

⁷ “Kääcë ënɔɔnë na ye moc, ku puk wël bä thiëc yïnë nïïm.

⁸ Yïn athem bä nyooth nɔn ciën Ɛn yic, ku tääuwë awäc në Ya yeth, ku jɔ aa raan cïn kë cï wööc?

⁹ Yïn riɛlë cï Yɛn, Duëërë röl ciët rel ë deŋ cït man ë Yɛn.

¹⁰ Na ee yen, ë yï tiëŋ ke yï dhuëŋ guöp, ku lec yïn.

¹¹ Tïŋ kɔc ee röt tɔ dït, ku ŋɛ̈nyë keek, kuɔɔrë ke piny.

¹² Ɣɛɛ, gɔk keek apiɛth ku bɛ̈ɛ̈iyë ke piny, ku dap ke dumiic.

¹³ Thiäk keek kedhie, guöörë ke piny të col paan ë thuɔɔu.

¹⁴ Ku Yɛn abï aa raan tueŋ bï yï kɔn piɔɔny, ku gam nɔn dïït yïn ku cï tiam.

¹⁵ Tïŋ län dïït cɔl rɔu, aa cak cït man ë yïn, ee nyuäth ë wal cï weŋ.

¹⁶ Ku ee riɛl cït ŋö nu në ye guöp, ku ee riɛl ou nu në yeyäc?

¹⁷ Yɔ̈lde aril ë tör cït tim de thidar, ku rïŋ ke yen cök arilkï.

¹⁸ Yomke acïtkï wai ë maläŋ në riɛl, ku cït cökke thieny ë wëëth.

¹⁹ Ee kë dïït ë gäi ë kake looi Nhialic keek, ee Aciëŋde yetök en aduëër ye tiaam.

²⁰ Wal yek cam ayek cil në kur nïïm të ye läi roor tuk thïn.

²¹ Yen ee tɔ̈c piny roor në kuɔɔthiic, ku nɔn thiɛɛn në kolic në aguötic wïïr.

²² Roor de tiim ke kuɔɔth nu në wɛ̈k yiic ayek en gël në atïmden.

²³ Yen acie riɔ̈ɔ̈c në pïïu bɔ̈ kekë riŋ arëët kiir, të ciɛk en aa wɛ̈ɛ̈r de Jordan yen wɛ̈l rɔt në ye wum.

²⁴ Eeŋa duëër en tɔ cɔɔr ku dɔm? Ku nɔn dɔm thok në alabithɔ?