Jop 37 - JAM DE NHIALIC 2011

¹ Amaŋ ee ya tɔ lɔ piɔ̈u rïr wei.

² Piɛŋkï wedhie röl de Nhialic kekë rel ë deŋ ee bɛ̈n bei në Yethok.

³ Ee wil ë deŋ tɔ ret tënhial, gɔl në nhial baŋë ale guut ë baŋtui.

⁴ Ku jɔ rölde piŋ ke määr, cït deŋ ku jɔ rel në röl dïït ë bääny, ku jɔ wilde lɔ biliny.

⁵ Në jam de Nhialic kagɛ̈iyë ayek tuöl, ka läk cuku ke duëër yökiic.

⁶ Yen ee pïïu cïï yom tɔ rɔ̈k yɔ̈ɔ̈k bïk piny tuɛ̈ny, ke ke ye deŋ ë kɔɔi de yic amaŋ.

⁷ Yen ee luɔi de raan tɔ kääc, ke raan ëbɛ̈n bï Aciëŋde ŋic.

⁸ Läi roor ayek lɔ në duuken yiic.

⁹ Yom de kɔɔr ee bɛ̈n në wöuwic, ku bɔ̈ yom lir ëbɛ̈n rut,

¹⁰ wëi ke Nhialic ayek pïïu tɔ lir abïk rɔ̈k.

¹¹ Yen ee luäät thiɔ̈ɔ̈ŋic në wil ë deŋ, ku tooc keek lek aa wil nhial ëbɛ̈n.

¹² Ayek ka cïï Nhialic ke yɔ̈ɔ̈k, ka yek looi kedhie në pinynɔm ëbɛ̈n.

¹³ Ee käŋ tɔ loi röt ë piny nɔm, të ciɛk en aa luöi de nɔm, ku nɔn yen kokëpiɔ̈nde, aye tɔ loi rɔt.

¹⁴ Pälë rɔt piny të thiinakäŋ Jop, ku piëŋë, gam ka gɛ̈iyë cïï Nhialic looi.

¹⁵ Ŋic luɔi ye Nhialic löŋ tääu piny, ku tɔ deŋ wil në luätic ë biliny?

¹⁶ Ŋic luɔi ye luäät cath nhial, cie luɔi de gäi ë raan cï dikëdik në pɛlënɔm?

¹⁷ Ei, yïn duëër gum tei në tuc të cïï yomde wöuwic pɔ̈t.

¹⁸ Duɛ̈ɛ̈rë Nhialic kuɔny bïï tënhial thɔ̈ɔ̈th, abïï tɔ ril cït acidhadh?

¹⁹ Wɛ̈ɛ̈të wook në kë buk lɔ lɛ̈k Nhialic, wok ee dhän cïn kë ŋicku buk lueel.

²⁰ Yɛn cïï Nhialic duëër thiëëc bä jam wokë Yen, ee ŋö yan En gäm kaam bï ya riɔ̈ɔ̈k?

²¹ Ku ënɔɔnë tënhial aruel arëët, ka cïn luɔi ye wok e woi yic të cïï yom luäät kuaath.

²² Në të lɔ rut, ee bɛ̈n ke riau cït adhääp Yen Nhialic, ku dhuëëŋde ee raan cï Ye tïŋ ëbɛ̈n riääc.

²³ Awärjäŋ aril, ka wok cïï bï bɛ̈n ë Yelɔ̈ɔ̈m, Yen ade nɔm riɛldït ku yic, Ku acïï piathëpiɔ̈nde duëër kɔn pɔ̈l.

²⁴ Acie këdïït ë gäi, bï raan ëbɛ̈n riɔ̈ɔ̈c në Yen tëdɛn rëër kek thïn, kɔc ee ye lueel an pelkï nïïm.