Jop 30 - JAM DE NHIALIC 2011

¹ Ku ënɔɔnë kɔc kor në yɛn agetkï a guöp! Ku wärken ee kɔc cïn thaarden, ka akɛ̈n ke tɔ kony jɔ̈k në tiët ë thökkï.

² Ee riɛl ou duɛ̈ɛ̈r yök tëde keek, kɔc cïn kë yek lëu?

³ Aake ye jäl wakɔ̈u ke ke kɔɔr rooric në mei ke wal, në biäk cïï cɔŋdït ke nɔ̈k,

⁴ ye apäm tet në tiim nïïm ku camkï ke ayï awɛ̈r,

⁵ në kɔc yiic cil ye cieec, ku moc kɔc kiɛɛu në kecök abïk ciët cuɛ̈ɛ̈r,

⁶ ye rëër në kuriic ku pɔ̈liic,

⁷ ye kiu ë rooric ku jɔkï kenïïm kut ke ke giŋ röt ëtɛ̈ɛ̈n,

⁸ kɔc cïn naamden, cïï rin tiëc, acï ke bɛ̈n ciɛɛc wei wutic.

⁹ Ku ënɔɔnë mïthken acïk a tɔ ye raan yek kɛ̈t din ë acieer piny ku agɛɛt ë guöp

¹⁰ ayek a maan, ku meckï röt wei në yalɔ̈ɔ̈m, ku ŋuutkï ya nyin në luɔi mɛɛn kek ɛn.

¹¹ Në biäk cïï Nhialic a tɔ cïn nɔm riɛl ku koor a piny, yen akën keek kethook tiit në yanɔm.

¹² Në biäk cuënydï aye kɔckë röt jɔt, ku kuathkï yɛn kɔɔr kek kueer riëër kek anyin,

¹³ kueerdiën duɛ̈ɛ̈r ɛn ban ayek thiöök thok, ayek tiam ke ke cïï kuɔɔny kɔɔr,

¹⁴ ayek bɛ̈n ke ke cït kɔc bɔ̈ bei tëdït ɣɔ̈ɔ̈r cï dhuɔɔŋ yan rɔt gël, yen aye kek röt lɔ̈ɔ̈r thïn,

¹⁵ riɔ̈ɔ̈c ë rɔt pɔ̈k ɛn ku dhuëëŋdï ë jäl cït kë gɔp ë yom, ku tëk athiɛɛidï cït luäät.

¹⁶ Ku ënɔɔnë yɛn ë thiɔ̈k wo thuɔɔu, acïn kë bï arɛɛmdï tɔ lɔ piny,

¹⁷ wakɔ̈u ee yomkï tɔ remë, ku arɛɛm jut ɛn acie kɔ̈ɔ̈c.

¹⁸ Nhialic ee ya tiaam në agɔ̈th ka dɛ̈ldï acie bɛ ŋic, ee ya ŋuany röl në abek lɔ dekdek në yayeth,

¹⁹ ku cuɛt ɛn ë tiɔ̈kic, abä rëër ke ya cï yäär.

²⁰ Nhialic, Yïn caal ku Yïn cïï cɔ̈tdï piŋ, läŋ Yïn ke Yï döt a guöp ke cïn kë bɛ̈ɛ̈rë.

²¹ Yïn cï rɔt puk ke Yï ye Raan kur ɛn, ku yɔŋ ɛn në riɛldu ëbɛ̈n,

²² Yïn gɔp ɛn ku cuatë yɛn ë yomic, ku jɔ amaŋ ɛn aa cuat tɛ̈n ku tɛ̈n.

²³ Ɣɛɛ, aŋiɛc nɔn leer Yïn ɛn tëde thuɔɔu, ee kë cï kiëët në biäk de raan ëbɛ̈n.

²⁴ Eeŋö Yïn raan cï riääk jɔ̈t tɔŋ, acïn kë duëër looi, ee dhiau ke kɔɔr kuɔny?

²⁵ Kɛ̈n piɔ̈u dhiau në këde raan cïï pïïrde yic riɛl ku kɔc kuanynyïïn?

²⁶ Ku yɛn cï këpiɛth ŋɔ̈ɔ̈th, ku go kërac bɛ̈n, ku ŋääth ɣɛɛr, ku bɔ̈ mɔ̈ɔ̈th.

²⁷ Päu cän piɔ̈u päu awëën a yic ku acie jäl, akööl ke nuandït acïk a jɔ cuööp,

²⁸ dɛ̈ldï acï tɔ̈ɔ̈k tɔ kɔ̈k rɔt, ku kääc në amatnɔmic cil ke ya kɔɔr kuɔɔny,

²⁹ ku yɛn ee mänhë kɔ̈ɔ̈rgɔl në dhiëndï yic, ku määth wo wuut në rëërdï yatök,

³⁰ ku dɛ̈ldï ë rɔt puk ke ye cäär ku ee rɔt kɔ̈k në yaguöp, ku yomkï ayek tɔ̈ɔ̈k në atuöc,

³¹ ka thomdiën ya gut kekë aruöördiën ya kooth acïtkï rɔ̈t kɔc dhiau.