Jop 3 - JAM DE NHIALIC 2011

Jop Agöny Nhialic

^1-2 Në ee kënë cök, ke Jop ë yethok jɔ bɛ̈n liep ku lɛ̈ɛ̈t kööl ɣɔn dhiëëthë ye thïn, lueel an,

³ “Adï jɔ kööl ɣɔn dhiëëthë ya thïn nyaai, ku cien wɛ̈ɛ̈r ɣɔn luel en an, bï maa liac në mɛwä.

⁴ Köölë ë puk rɔt aye mɔ̈ɔ̈th! Ku cïï Nhialic be jam nhial në këde, ë cïn ɣɛɛr riau thïn.

⁵ Yen ee köölë, adï cïï luäät kuöm piny, në mɔ̈ɔ̈thdït lɔ cɔ̈t, ku jɔ cuɔl akɔ̈l riääc.

⁶ Adï cï wɛ̈ɛ̈rë nööm në cuɔl ë piny, ku cïï be kuɛɛn në nïn ke pɛ̈i yiic, Ku cïï miɛtëpiɔ̈u be yök në runiic.

⁷ Ee yen, adï jɔ ë wɛ̈ɛ̈rë ciët dom cï dhiai, ku cïï kiɛɛu de miɛt ë piɔ̈u be piŋ thïn.

⁸ Adï cï läm aciɛɛn në kɔc ee akööl cieen në riɛl duëër kek ŋuäl dït tɔ bɔ̈ bei.

⁹ Adï jɔ kuɛlkɛn jɔ bɛ̈në lɔ nyïïn dum, ku jɔkï ɣɛɛr cïï bɔ̈ ŋɔ̈ɔ̈th, ku cïkï miäk adurduur tïŋ nyin,

¹⁰ në luɔi kënë athïïn ke yäny de ama guur, ku kën a thiën nuan.

¹¹ Eeŋö cän thou të ɣɔn dhiëëthë yɛnë, ku nɔn bä bei yiëëc ke ya cï thou?

¹² Eeŋö jɔ ɣɔ̈ɔ̈m ɛn muk, Ayï thin ee kake ŋö tɔ kek ɛn thuët?

¹³ Ënɔɔnë adï täu piny ë lik, të ya cï niin ku täu ë lɔ̈ŋic,

¹⁴ adï cä niin wokë bäny ku nööŋ ke wuöt, ɣɔn cï ɣöötdït cï riääk be yiëk röt,

¹⁵ ku adï cä niin wokë mïth ke bäny cï kuɛth adhɛ̈p, ku cïk ɣöötken thiɔ̈ɔ̈ŋ në atek.

¹⁶ Ku ënɔɔnë adï cï a guɔ kääth piny cït athɔ̈ɔ̈rbei, ku nɔn ee mɛnh athɔ̈ɔ̈r bei kën ɣɛɛr tïŋ.

¹⁷ Paan ë thuɔɔu aye kɔc ee karɛc looi guut në luɔidɛn ë karɛc, ku yök kɔc cï bäp lɔ̈ŋ.

¹⁸ Ëtɛ̈ɛ̈n kɔc cï mac kedhie, arëërkï në lɔ̈ŋic, ke cïn bɛ̈ny ee ke kuaath ë luɔi yic yek bɛ piŋ röl,

¹⁹ Raan ëbɛ̈n anu ëtɛ̈ɛ̈n, kɔc tei ku röördït ŋic, ayï raan ë ye lïm de bɛ̈nyde, ë nɔm lääu lɔ yök.

²⁰ Eeŋö ye kɔc gum këtuc tɔ tïŋ ɣɛɛr, ku tɔ kɔc jiɛth piɔ̈ɔ̈th rɛ̈ɛ̈r në wëi mit?

²¹ Kɔc ee thuɔɔu kɔɔr ke cïkï yök, awär kɔ̈ɔ̈r kɔɔr ë raan kë tuc ë ɣööcde ye wec ë tiɔpic piny.

²² Ayek piɔ̈ɔ̈th miɛt në miɛt rac, të cï kek röt yök rɛɛŋ.

²³ Eeŋö ee raan gäm pïïr, raan kuc të le yen nɔm thïn, ku cïï Nhialic tuɔɔk cil.

²⁴ Dhiëndï yen ee kuïndiën ya cam, ku ja ŋun ë ŋun cïï kɔ̈u ee tɛɛm.

²⁵ Kë ë riääc ɛn, yen acä yök, ku kë ë kat ɛn, yen akuany a cök.

²⁶ Yɛn kën lɔ̈ŋ ku cïn män cäth ke yɛn, yɛn cï dak aläl ku riäŋdï acïï kɔ̈u ee tɛɛm.