Jop 27 - JAM DE NHIALIC 2011

Bëër ë Jop

¹ Go Jop ŋoot ke jam, lueel an:

² “Yɛn cï rɔt kuëëŋ në Nhialic pïïr, Raan cï yinydï cuat wei, ku cï Nhialic Awärjäŋ pïïrdï tɔ tuc thok aläl, ku luɛɛl an,

³ na ŋuɔt ke ya wɛ̈ɛ̈i ku ŋoot wëi ke Nhialic ke ke bɔ̈ bei në yawum,

⁴ ke liemdï acïï lueth bï kɔn lueel, ku acïï kɔc bï math.

⁵ Wek ë kɔckë, yɛn cïï bï kɔn gam nɔn luɛɛl wek yic, yɛn cïï bï gam në luɔi de yɛn guöp awäc agut cï thondï.

⁶ Acä bï kɔn pɔ̈l në luɛl an, yɛn kääc në piathëpiɔ̈ndï yic, acïn kë gɛ̈k ë piɔ̈ndï yɛn.

⁷ Adï jɔ kɔc ke aterdï cï röt jɔ̈t ɛn, yök kë cït kënë kɔc ee karɛc looi yök.

⁸ Ee aŋäth ou cath ke kɔc reec Nhialic, në thaar jɔt En wëi tëde keek?

⁹ Bï Nhialic kiɛɛuden piŋ të cïï riääk ke yök?

¹⁰ Bïk piɔ̈ɔ̈th miɛt në Nhialic Awärjäŋ, ku bïk aa cool ë cɔɔl kek En në lɔ̈ŋdeniic?

¹¹ Wek bä wɛ̈ɛ̈t në dït de riɛl cath ke Nhialic, ku bä tɛ̈t week yen kë cïï Nhialic Awärjäŋ kiëët,

¹² ku week wedhie acäk tïŋ wapäc, ku eeŋö bɛ wek jam në ɣääriic?

¹³ Yen kë ye Nhialic Awärjäŋ täu kɔc ke akuöörkuöör ee karɛc looi ka,

¹⁴ Aduëërkï nïïm dɛk mïth juëc ku näk tɔŋ kɔ̈k, ku dak kakï në kë camkï.

¹⁵ Ku kɔ̈kkɛn bï döŋ abïï jɔɔk ke nɔ̈k, acakaa diäär abɛɛrken acïkï bï dhuöör ke dhiëëukï ke.

¹⁶ Na cakkï atek kut nïïm cït abuui, ku thɔckï lupɔɔ nïïm cï tiɔp,

¹⁷ aduëërkï ke kut nïïm, ku abï ya kɔc piɛth piɔ̈ɔ̈th kek cieŋ keek, ku kɔc cïn gup awɛ̈ɛ̈c kek abï atekken tɛ̈k röt.

¹⁸ Ɣööt cïk yïk acïtkï ɣööt ke akarkar, ku cïtkï kɛ̈ɛ̈t ye kɔc ee luui duumiic ke tïït,

¹⁹ ayek lɔ në biökken nïïm ke ke ye kɔc juëc ë käŋ, na lek pääc abïk kajuëcken yök aliu.

²⁰ Riɔ̈ɔ̈c abï keek yök ëthiäu cït bɛ̈n amool, abï kɔɔr ke gap nhial wakɔ̈u,

²¹ abï liu të le yomdïït de aköl amiäk ke gap wei tëden,

²² abïï Nhialic luöi keek në riɛlde ke cïn kokdepiɔ̈u, ku themkï bïk röt wäär wei.

²³ Ee Yecin pam tëdɛn ë rëër ke ke geet gup të le kek ke ke riŋ.