Jop 21 - JAM DE NHIALIC 2011

Bëër de Jop

¹ Go Jop bɛ̈ɛ̈r, lueel an:

² “Piɛŋkï jamdiën ee yen luɛɛl, ku yen ee kënë yen abï aa mɔ̈ɔ̈k cä wek a muk piɔ̈u.

³ Kääckï ku kankï ya tɔ jam, ku të cän thök wek duëër röt dak agɛɛtdunic.

⁴ Ku na yɛn, ye këdï gööny wo raan? Yɛn de nɔm yic cïï yɛn duëër tɔ tït.

⁵ Tiëŋkï kë cï rɔt luöi yɛn, we bï gäi abäk wethook thany ke we mim.

⁶ Të jan a nɔm tak në kë dïït cï rɔt luöi yɛnë, yɛn ee riɔ̈ɔ̈c lath guöp ëbɛ̈n.

⁷ Eeŋö ye kɔc ee karɛc looi pïïr abïk dhiɔp, ku kaken ayek lɔ ke ke ŋuak röt?

⁸ Mïthken ayek bɛ̈n nhial apiɛth, ku be mïth ke mïthken bɛ̈n ke ke ŋoot ë ke rɛ̈ɛ̈r.

⁹ Ɣöötken acïn riɔ̈ɔ̈c ee nu thïn, Nhialic acïï thienyde ee bɛ thɛm ë kegup.

¹⁰ Thɔn ë weŋden të cïï yen kac, ke weŋ acie poth ke cïï liac, ku daau ke ɣɔ̈kken acïnkï yiic athɔ̈ɔ̈rbei.

¹¹ Ayek mïthken pɔ̈l cït man ë daau ke ke lɔ thuëëc, ku cöŋkï ke ke mit piɔ̈ɔ̈th,

¹² ku kitkï diɛt në thomic lɔ̈ɔ̈r ke ke piŋ kuöth ë kaaŋ.

¹³ Kek ee kɔckë ayek aköölken thöl në miɛtëpiɔ̈u, ku jɔkï bɛ̈n lɔ ë määth paan ë thuɔɔu.

¹⁴ Ayek lɛ̈k Nhialic an, nyääŋë wo piny wapäc! Wo cïï köör ë ŋïny de kuɛɛrku.

¹⁵ Eeŋa Yen Nhialic Awärjäŋ kë ye wok kë cï lueel looi, eeŋö buk yök të lɛ̈ŋ wok En?

¹⁶ Tïŋ, ayek lueel an, kajuëcken yökkï në riɛlden? Ku yɛn ee rɔt mɛc wei në täŋ de kɔc rac cït ë kake.

¹⁷ De të cïï many ë kɔc ee karɛc looi kɔn liɛɛu nyin? Ku de raandɛn töŋ cïï riääk kɔn yök? Ku nɔn lui ë Nhialic këtuc në agönhde

¹⁸ ku kooth ke wei cït ayiɛl ku anin gɔp yomdït?

¹⁹ Acäk lueel an, ye Nhialic awäc täu mïth. Acie yeka! Raan de kë cï wööc ee yen bï dhil kuöm awänyde, ke bïï ŋic.

²⁰ Në ke tïŋ riäŋden në nyïïnken, ku yökkï thok yen agönh Nhialic Awärjäŋ.

²¹ Të cïï runken teem kɔ̈ɔ̈th ë piny nɔm, ka cïnic këden thïn në mïthkɛn cï döŋ.

²² Nhialic Raan ee löŋ ë këriëëc ëbɛ̈n guiir ayï kɔc nu nhial, eeŋa duëër E wɛ̈ɛ̈t?

²³ Kënë ee thou ke kueth ku mit piɔ̈u ke cïn kë riëëc en,

²⁴ ku acuai ku miök de yomke aŋoot ke ril.

²⁵ Ku däŋë ee thou ke diu piɔ̈u ke cïn këpiɛth cï yök ë pïïrde yic,

²⁶ ayek tɔ̈c kedhie ë tiɔpic, abï kɔ̈m keek pok kum ke.

²⁷ Tiëŋkï, yɛn ŋic täŋdun ku kiɛɛrduön bä wek a luöi kërac,

²⁸ në luɔi ya wek e lueel an, nu nou yen ɣön ë raandït ee karɛc looi?

²⁹ Kɛ̈nkï kɔc ee cath ë kuɛɛriic luɔp? Ku kɛ̈nkï ka cïk lɛ̈k week gam?

³⁰ Ayek lueel an, të de yen riäŋ cï rɔt tɛ̈ɛ̈m, raan ee karɛc looi ee poth, ku ee pïïr të cïï agönh ë Nhialic bɛ̈n.

³¹ Eeŋa bï ye jɔ̈ɔ̈ny ke woi nyin në kërɛɛc cï looi ku kuum?

³² Na leerë wun ë rɛ̈ŋ ke raŋde aye tiit,

³³ kɔc juëc arëët ayek bɛ̈n në kööl ë tɔ̈ɔ̈uwë ye, ku jɔ guöpde tɔ̈c në tiɔpic apiɛth.

³⁴ Ka duɛ̈ɛ̈rkï ya jɔ muk piɔ̈u adï ënɔɔnë, ke ye muŋdepiɔ̈u cïnic kë nu thïn, bëërduön cä wek bëërë ee lueth yen tɔ̈rkï ëbɛ̈n.