Jop 20 - JAM DE NHIALIC 2011

Bëër de Rou ë Dhopar

¹ Go Dhopar, raan piny ë Naama bɛ̈ɛ̈r, lueel an:

² “Yïn cï wo gɔ̈i piɔ̈ɔ̈th, ka yɛn cïï jamdu lëu në guöm ke ya cïï bëër.

³ Jamdu ëbɛ̈n ë rɔt puk ke ye lɛ̈ɛ̈t lɛ̈ɛ̈t yïn wook, ku luɔi yan käŋ yökiic yen abï a tɔ ŋic luɔi bän këdu bɛ̈ɛ̈r.

⁴ Cïï ŋic tei të ɣɔn thɛɛr ciɛk ë raan,

⁵ an dɔl ë raan ee karɛc looi acïï rɔt ee cuuth, ku miɛtëpiɔ̈u de raan reec Nhialic, ee ya kaam thiin akäŋ?

⁶ Na ciɛk bɛ̈ɛ̈r abï nɔm ɣet ë luäätiic ku jiɛk tënhial,

⁷ ke abï riäär anande cït arom de dhiën ë cï tɔŋ, ka bïï kɔc ë cï yen kɔn tïŋ aa luɔp an, nu ënou?

⁸ Abï määr cït man ë nyuöth,

⁹ kɔc ë cï yen kɔn tïŋ acïkï yen bï bɛ nyɔk ë tïŋ, ayï kɔc rɛ̈ɛ̈r ë yen.

¹⁰ Mïthke abïk käŋ cool, ka wään cï ke nööm tëde kɔc kuanynyïïn.

¹¹ Yomkɛn ril ke dhuök abï ke tɔ̈ɔ̈u ë tiɔpic ë yen.

^12-13 Luɔi de kërac ee miɛt cït kuïn në yethok, acie kɔɔr nɔn liek en en, aye muk ë yethok,

¹⁴ ku na liek en yen ee kuïnë, ka bï kɛc, ka bï ciët awɔɔk në yeyäc.

¹⁵ Abï kajuëc wään cï yök në kuɛɛr rac ŋɔ̈k bei, na ke cak nu në yeyäc ka bïï Nhialic ŋoot ke ke bïï bei.

¹⁶ Kë ye guit aaye awɔɔk de kërac, wurïï de kërac deŋ akook abï yen nɔ̈k.

¹⁷ Acïï bï pïïr bï wɛ̈ɛ̈r de olip tïŋ, nyïïn ee kuëër ë miök de kiëc ku ca.

¹⁸ Abï këriëëc cï looi ëbɛ̈n nööm tëde yen, ku abï ciën kajuëc bï yen ke piɔ̈u bɛ miɛt thïn,

¹⁹ në luɔi cïï yen kɔc kuanynyïïn päl wei, ku yɔŋ keek ku rum ɣööt cïï kɔc kɔ̈k yïk.

²⁰ Dït ë piɔ̈nde akuc kuɛth, ku kajuëcke acïkï yen bï kony.

²¹ Cämdɛn ë kajuëc acïn kë ye both, në biäk de ee kënë acïn këdɛn bï rëër.

²² Na ciɛk rëër në kajuëciic, ka bïï miɛn piny në nuɛɛn, ku ka dhal en abïk en bɛ̈n dhuɔŋ piny.

²³ Të jɔ yen e yäc thiɔ̈ɔ̈ŋ, ke Nhialic abï agönhde tuɔɔc le yen rɛ̈l ke ye ariöpde.

²⁴ Të le yen ban në abätäu ë wëëth thok, abï wiɛth maläŋ ke dhaŋ en mɔc piny.

²⁵ Abï thɔ̈ɔ̈ric abïï lɔ paal ë ye baŋtui, thoŋdɛn lɔ bilbilë, abï cuänyde thɔ̈ɔ̈ric në yeyäc, ka bï ye lath,

²⁶ këriëëc ë cï tɔ̈ɔ̈u abï riɔ̈ɔ̈k, many ë cïï koth ë raan, abï yen nyop kekë baaide ëbɛ̈n.

²⁷ Paannhial anyooth kërɛɛc de ee raanë, ku ye tëpiny cäätɔ në kë cï looi.

²⁸ Kake kuɛthde kedhie abï ke riɔ̈ɔ̈k në kööl de agönh ë Nhialic.

²⁹ Yen kë cïï Nhialic kiëët ka, bï kɔc ee karɛc looi aa yök ke ye ariöpden.