Jop 17 - JAM DE NHIALIC 2011

¹ Yɛn ë bäp ë pïïr, ku nïnkï acïk thiɔ̈k ë lɔ dum piny ka yɛn tiit ë raŋ.

² Ë yic raan ëbɛ̈n adɔl a guöp, ku awɔi keek ke ke get ɛn në gɛ̈t rac.

³ Yïn Nhialic guöpdu tɔ rɔt ë Raan bï ya wɛ̈ɛ̈r bei, eeŋa bï yepiɔ̈u biɔ̈ɔ̈k në biäkdï?

⁴ Në biäk cï Yïn määthkï thiöök nïïm ke ke cïï käŋ bï bɛ aa cät apiɛth, ke ke cïï a bï bɛ tiam.

⁵ Ade kääŋ ee ye lueel ɣɔn an, raan ee määthke gaany në biäk de kajuëc kɔɔr, ee mïthke bɛ̈n tääu në nuanic.

⁶ Ë ya tɔ ye raan ye kɔc kääŋ rac yup në yen, ku të cän nyuc thïn, yen aye ŋuööt.

⁷ Jiɛthëpiɔ̈u acïï nyïïnkï ee bɛ tɔ daai apiɛth, ku yaguöp ëbɛ̈n ë nɔl ka yɛn ë thui cït atïm athɛ̈i.

⁸ Kɔc ee röt tɔ ye kɔc piɛthpiɔ̈ɔ̈th cïn gup awɛ̈ɛ̈c ayek gäi në ee kënë, ku gɔ̈ɔ̈ikï piɔ̈ɔ̈th të tïŋ kek kɔc reec Nhialic.

⁹ Ku abïk ŋoot ke ke rɛ̈ɛ̈r në piathëpiɔ̈ndenic, ku abïk lɔ ke ke ŋuak riɛlden nyin.

¹⁰ Bäkï da wedhie, na de të bän raan pelnɔm yök në weyiic!

¹¹ Yɛn cï thiɔ̈k wo jäl, kïïtdï ë riääk, aŋäthdï ë liu,

¹² määthkï ayek wakɔ̈u tɔ ye aköl, ayek lueel an, ë jɔ ɣɛɛr ku ee mɔ̈ɔ̈th yen ee kënë.

¹³ Të cän paan ë thuɔɔu ŋɔ̈ɔ̈thë ke ɣöndï, të bän lɔ niin thïn në mɔ̈ɔ̈thic.

¹⁴ Të lɛ̈k ɛn raŋ an yïn ee wäär, ku lɛ̈k dhiëi piny an wek ama ku nɔn yak nyankäi,

¹⁵ ka aŋäthdï jɔ nu ënou? Ku eeŋa bï aŋäthdï tïŋ?

¹⁶ Duëër kë ŋääth lɔ piny ke yɛn ëtök paan ë thuɔɔu? Ku buk lɔ ɣap ëtɛ̈ɛ̈n ë tiɔpic?