Jop 15 - JAM DE NHIALIC 2011

Bëër de Rou de Eliapath

¹ Na wën ke bëër Eliapath raan wun Teman an:

² “Duëër raan pelnɔm bëër në ŋïnydɛn de käŋ rɛ̈ɛ̈r ke cït yom, ku cï yeyic thiɔ̈ɔ̈ŋ në yom de aköl amiäk?

³ Duëër raan wël tɛɛr në jam cïn kë bï yök thïn, ku nɔn ee wël cïn kë bïk dɔk?

⁴ Ku ënɔɔnë yïn ë ɣet, ka yïn cie bɛ diɛɛr në riëëu de Nhialic, ku tuël kɔc në luɔi bï kek En aa lɔ̈ŋ.

⁵ Luɔiduön ee yïn karɛc looi, yen atɔ yï luel ee kakë, jiɛɛm yïn në wël ke pɛlëthok,

⁶ ka yïn cïï liemdu kuum acie yɛn, ee wëlkuön ee bɛ̈n bei në yïthok kek anyooth awänydu.

⁷ Ë dhiëth ë tïŋ në yïn, ka ee yïn ë kɔn ë bɛ̈ɛ̈i ë piny nɔm në kur?

⁸ Ë yï pïŋ të ɣɔn në löŋ de Nhialic nɔm, ka ee yïn pelnɔm yïtök?

⁹ Ee kënou ŋicë ku buk kuc? Ee kënou ye yökic ku cuku yökic wook?

¹⁰ Anɔm luɔu ku kɔc cï run wan kedhie anukï në woyiic, kɔc man dït në wärkun.

¹¹ Wël ke Nhialic riit wook ke yïpiɔ̈u cïnkï naamden tëde yïn, kek wël lëkë yïn në liɛɛrëpiɔ̈u?

¹² Eeŋö jɔ yïn piɔ̈u guɔ päär abä nyin thiɛth,

¹³ ku wɛ̈lë agönhdu nɔm Nhialic, abä wël cït ee kakë bɛ̈ɛ̈i bei në yïthok?

¹⁴ Raan eeŋa kë duëër en ɣɛɛr? Ke ye dhiëëth ë tik duëër piɔ̈u piath?

¹⁵ Tïŋ, Nhialic, a cakaa tuuckɛn nhial, acïï ke ŋäth, ku paannhial acie tëɣeric në Yenɔm.

¹⁶ Ku na mɛnh ë raan arac, ee rɔt riɔ̈ɔ̈k ka ee gök de kërɛɛc man, ee kërac looi cït dëŋ de pïïu.

¹⁷ Piŋ këdï abä lɛ̈k yïn, ku kë cä tïŋ abä nyuöth yïn.

¹⁸ Yen kë ɣɔn cïï röör pelnïïm nyuöth ɛn, ɣɔn wëët keek tëde kuarken ku cïn kë cïk moony,

¹⁹ ee kek ë gëm ë Nhialic pinyden kapäc, ku acïn juöör cï röt kɔn liääp në keek.

²⁰ Raan ee kërac looi ku ee kɔc yɔŋ aye pïïrde ëbɛ̈n tɔ̈u në guömic

²¹ Kiɛɛu de riɔ̈ɔ̈c acie jäl në yeyïc, të ciɛk en rɔt yök ke tɔ̈u ë mätic, aye cuɛ̈ɛ̈r ee kɔc rum mak.

²² Acie ŋäth nɔn bï yen bɛ̈n bei në mɔ̈ɔ̈thic, atit raan bï yen nɔ̈k në abätäu.

²³ Ee jɔ wïl ë kaamic ke kɔɔr kë lɔ në yethok, aŋic nɔn cï aköölkɛn ke thuɔɔu ɣëët.

²⁴ Diɛɛr ku jiɛthëpiɔ̈u ayek en riääc, cït meliŋ cï tɔŋ kiëët ke mɛk en.

²⁵ Ee biäk cïï yen e cin jɔ̈t Nhialic, ku lueel an bï Nhialic Awärjäŋ tiaam,

²⁶ në kë cï yen enɔm ŋäny akɔ̈l ku riŋ ke bɛ̈k, ke muk kön dhïl ril,

²⁷ enɔm riɛl ëtör kekë lɛc,

²⁸ ku rëër në pɛ̈ɛ̈nydït cï ke pɔ̈liic, ku cieŋ ɣööt cïn raan duëër ke cieŋ, bïk aa panɔm cï riääk.

²⁹ Ku acïï bï kuɛth anande, ku kajuëcke acïkï bï rëër, ku acïkï bï juëc,

³⁰ acï bï poth në thuɔɔu, abï ciët tim cïï kërke nyop në mac, ku kooth Bɛ̈nydït wëi në yom de Yen thok.

³¹ Në cïï ɣɔ̈ric ŋäth, amɛth rɔt, ɣɔ̈ric yen abï aa riöpde.

³² Abï cuööt ke aköölkë ke ke ŋoot, abï ciët tim cï riɔu.

³³ Ku bïï ciët tim cïï mïthke lööny piny ke ke kën guɔ luɔk, ku cït tiim ke olip cïï gaakde lööny ku cïï lok.

³⁴ Amatnɔm de kɔc reec Nhialic, acïn mïthkɛn bï tɔ̈u, ku kɔc ye kumthook abïï ke bɛ̈iken nyop në mac.

³⁵ Ayek liac në ateer ku dhiëthkï kërac ku jɔ piɔ̈nden mɛth aa tak.