Jop 14 - JAM DE NHIALIC 2011

¹ Mɛnh ë raan acïn riɛl, aa dhiëëth ë tik tei, nïnke alikï ku athiëŋkï në nuan.

² Ee guɔ luɔk cït gaak moc ë tim, ku go biɔɔr, ku yen ee guɔ määr cït atiëp.

³ Duɛ̈ɛ̈rë Yïnyin jɔ wɛ̈l mɛnh ë raan ku bɛ̈ɛ̈iyë në gööny nɔm?

⁴ Eeŋa duëër kë ɣeric bɛ̈ɛ̈i bei në kë cï dhiöök në këcol? Acïn raan.

⁵ Yïn cï runke mac nyïïn, ku Yïn cath we kuën ë pɛ̈ike, ku acï mäc kaam, ka cïï ke duëër kaac nïïm

⁶ jɔ päl kaam de lɔ̈ŋ ke bï piɔ̈u miɛt cït raan riɔp cï luɔidɛn akɔ̈l thöl thok.

⁷ Ade aŋäth tëde tim, të cïï ye yɛp piny, ee ye nɔm bɛ dak ë pïïric be nyok.

⁸ Cak an cï tim thar riɔu piny, ku cï meike cak thou në tiɔpic,

⁹ ke yen, të cï yen awäu de pïïu ŋöör ee guɔ nyok cï tim thiin jɔt rɔt.

¹⁰ Ku na raan, ee thou ku yen ee thök de riɛlde, ku ee tɔ̈u ë nou të cïï wëike jäl?

¹¹ Cït man ye pïïu dëu kiir ku jɔ nyin dëu aya,

¹² yen aye raan tɔ̈c ku cïï rɔt be jɔt agut të le tënhial liu, acï bï riëër, ku nɔn pɛ̈ɛ̈c ë nïnde yic.

¹³ Adï jɔ ya thiaan, ku bä ya gël paan ë thuɔɔu ëtɛ̈ɛ̈n ɣet të bïï agönhdu nɔm wan, ku jɔ kaam mac bïï Yïn Yïnɔm bɛ tak në yɛn.

¹⁴ Të cïï raan thou duëër bɛ pïïr? Yɛn bï tïït në ee wïtdiënë yic ëtɛ̈ɛ̈n, aɣet të bï ya waar.

¹⁵ Yïn bï cööt ku Yïn bä gam, Yïn bï këduön ë loi kɔɔr.

¹⁶ Ku ëtɛ̈ɛ̈n Yïn bï ya gël ku cïï Yïnyin be wɛ̈l awɛ̈ɛ̈ckï.

¹⁷ Awɛ̈ɛ̈ckï abï ke guöör athepic, ku kum ke nïïm.

¹⁸ Ku na ye kuurdït löny abï rɔt thoor, ku ye kɔɔidït lɛɛr wei tëde,

¹⁹ ayï pïïu ayek kɔi lak wei, ku lak gök ë deŋ abuui wei aya, yen kë ye luöi mɛnh ë raan ka, Yïn aŋäthde riɔ̈ɔ̈k.

²⁰ Aye guɔ tiaam anande, jɔ guɔ jäl, puk enyin të bïï thonde, ku ciɛɛcë wei.

²¹ Wɛ̈ɛ̈tke, na cï ke lɔ̈ɔ̈k dhuëëŋ gup ku nɔn cï ke lɔ̈ɔ̈k biɔɔn gup, acïn kë bï ŋic thïn.

²² Arɛɛm de rïïŋde yic yetök yen aye yök, ku ee rɔt dhiëëu yetök.