Jop 13 - JAM DE NHIALIC 2011

¹ Tiëŋkï, kënë ëbɛ̈n acïï nyindï tïŋ ku piŋ yïnydï ku yökic.

² Kë ŋiɛckï, aŋiɛc ayadäŋ, yɛn cie raan koor në week,

³ ku Nhialic Awärjäŋ Yen abän jam wokë Yen, acie week, akaar bä göönydï tïŋ wokë Nhialic.

⁴ Ku na week, wek kɔc rɔth yic kɔ̈u në lueth, week wedhie, wek cït wɛ̈ɛ̈t diɔ̈ɔ̈r cï wut thueet.

⁵ Adï jakï thook mim ke bïï ŋic nɔn pɛl wek nïïm!

⁶ Pälkï röt piny ku piɛŋkï göönydï në yathok.

⁷ Ee biäk de Nhialic Yen luɛɛl week ee luethkë, ku jamkï në mɛth?

⁸ Bäk män mät wek në Nhialic nyuɔɔth, ku kuɔnykï në göönyic?

⁹ Bïï piath ke week të le Yen we them? Ku duɛ̈ɛ̈rkï math cït raan?

¹⁰ Yen ë yic abï week gɔ̈k të ya wek män mät wek në Yen nyuɔɔth në cuëër.

¹¹ Cï dïtde week ee riääc abï riɔ̈ɔ̈c we lath?

¹² Kɛ̈ŋkuön ke pɛlënɔm acïtkï ŋeth ku cït gël gɛ̈l wek röt tiɔɔm kɔ̈c.

¹³ Miɛmkï thook, bɛkï ya tɔ jam, ku takï kë bï rɔt looi yök ɛn.

¹⁴ Yɛn cï rɔt coc bä wëikï gam.

¹⁵ Të ciɛk ë Nhialic a nɔ̈k ku ciën nɔm aŋäth, ke yɛn ŋoot ke ya kääc ke ya gööny në Yenɔm.

¹⁶ Kënë abï ya tiëmdï, në luɔi cïï kɔc ee karɛc looi duëër lɔ ë Yelɔ̈ɔ̈m.

¹⁷ Pälkï röt piny apiɛth ku piɛŋkï wëlkiën tɛ̈t week.

¹⁸ Tiëŋkï, yɛn cï rɔt coc në këde göönydï, ku aŋiɛc yɛn bïï gäm yinydï.

¹⁹ Eeŋa ëtɛ̈ɛ̈n, raan bï ya gaany? Na ye täude ka, ke yɛn bï jɔ mim ku thuɔu.

²⁰ Yɛn cï bï gääu në bɛ̈n në Yïnɔm të le Yïn ɛn päl käŋ kaarou Yïn Nhialic.

²¹ Tɔ Yïcin mec we yɛn, ku lɔ riëëcduön Yïn a riääcë,

²² ke Yï jɔ jam ku bä bɛ̈ɛ̈r, ku nɔn bä jam ku bä jɔ bɛ̈ɛ̈r Yïn.

²³ Ee awɛ̈ɛ̈c kadï cä looi? Tɔ ya ŋic awɛ̈ɛ̈ckï ku karɛckiën cä wööc.

²⁴ Eeŋö jɔt Yïn nhiëërdu tëde yɛn, ku tɔ yɛn ee raan aterdu?

²⁵ Eeŋö riëëc Yïn apäm lɛɛn biɔk ë yom, ku cop wɛ̈ɛ̈l lɛɛn cï ril wei cök?

²⁶ Yïn cï a gäär kɔ̈u wël tuc thook, ku kum ɛn në awɛ̈ɛ̈ckiën wään yan ke meth.

²⁷ Yïn ee tëdiën cän lɔ thïn woi, ku them të bïï guɛɛt ë yɛn cök lɔ guut, ku macë yacök piny ë kuat.

²⁸ Raan acït tim cï rop ku cït lupɔ cï dhiap.