Jop 12 - JAM DE NHIALIC 2011

Bëër de Jop

¹ Go Jop bɛ̈ɛ̈r, lueel an:

² “Ë yic ee wek aye röördït, na lak thou ke pɛlënɔm abï määr ke we.

³ Ku yɛn de ŋïny de käŋ cït man ë wek, yɛn cie raan koor në week. Eeŋa cïï ka cït ë kakë duëër ŋic?

⁴ Yɛn dɔl guöp në määthkï, ku yɛn aaye Nhialic lɔ̈ŋ, ku aaye këdï piŋ, raan piɛth cïn kërɛɛc cï wööc yen adɔl guöp.

⁵ Kë ye nu në täŋdun yic wek kɔc rɛ̈ɛ̈r ë mätic, wek ee ya biɔɔn guöp, yɛn raan cïï piälëguöp yök, piälëguöp ee yenɔm ram ke yɛn, yɛn raan tɔ̈u ë nuanic.

⁶ Ɣööt ke kɔc ee kɔc rum arëërkï ë mätic, ku kɔc ee Nhialic tɔ göth acïn ke riëëc keek, kë yek tak riɛlden yen ee yiëthken.

⁷ Ku ënɔɔnë thiëc ɣɔ̈k ku diɛt,

⁸ ku wal piny ku rec wïïr, abïk lɛ̈k yïn.

⁹ Eeŋa në kakë yiic kedhie kuc en, nɔn Yen Nhialic yen ë loi ë kënë ëbɛ̈n?

¹⁰ Ciinde yen apïïrë kë ë ciɛk ëbɛ̈n, ayï wëi ëbɛ̈n ye mɛnh ë raan ke wëi.

¹¹ Cïï yïc kë cï piŋ ee them cït man ye thok kuïn thiëëp?

¹² Pɛlënɔm ee këde röördït ku ye yöŋ de käŋiic këde kɔc cïï runken juëc.

¹³ Ku jɔ Nhialic dɛk pɛlënɔm ku riɛl ku tiëër ë nɔm ku yöŋ de käŋiic.

¹⁴ Kë cïï Nhialic jäp piny, acïn raan duëër e lëu në yïk, ku raan cï guöör ɣöt, acïn raan duëër e lëu në bïï bei.

¹⁵ Të cï Nhialic deŋ dɔ̈m kɔ̈ɔ̈c, piny ee riɛl, ku të cï Yen pïïu pɔ̈l, ke amool ee piny riɔ̈ɔ̈k.

¹⁶ Ade nɔm riɛl ku pɛlënɔm, Raan cï math ku raan ee kɔc math anukï në Yecin.

¹⁷ Ee pɛlënɔm ë röördït ee kɔc jääm nyaai ku tɔ bäny tɔ cït dhän.

¹⁸ Ee lupɔɔ ke bääny nyaai në meliik kɔ̈ɔ̈th, ku tɔ keek ye lïïm.

¹⁹ Ee bääny de wɛ̈ɛ̈t diɔ̈ɔ̈r nyaai në kekɔ̈ɔ̈th, ku puk kɔc piny kɔc nu riɛl në kecin.

²⁰ Ee kɔc ye kɔc ŋɔ̈ɔ̈th miɛɛm thook, ku nyiɛɛi pɛlënɔm de röördït.

²¹ Ee bäny cuɛ̈t ayäär, ku jɔt riɛl tëde kɔc ril.

²² Ee tëthuth colic liep nɔm, tɔ mɔ̈ɔ̈th cooldïït cït paan ë thuɔɔu tɔ ye ɣɛɛr.

²³ Ee juöör tɔ dït ku tɔ ke ril ku riɔ̈ɔ̈k keek, Yen ee juöör tɔ de kɔc juëc ku thel ke wei.

²⁴ Ee yöŋ de käŋiic ë bäny ke piny nɔm nyaai, ku tɔ ke tai ke ke kuc të le kek, të cïn kueer ke ke cï nïïm mum,

²⁵ kek ë bänykë aciɛthkï ëpäthpäth ë mɔ̈ɔ̈thic, acïtkï kɔc ye mɔ̈u wit në cäthden ë käŋkäŋ.