Jocua 7 - JAM DE NHIALIC 2011

Awäny de Akan

¹ Ku kɔc ke Yithriɛl akënkï jam ë Bɛ̈nydït bɛ̈n döt, jam wään lëk keek nɔn cïn en kë nömkï ë Jeriko në ka bï riɔ̈ɔ̈kiic kedhie. Raan cɔl Akan ë jamë bɛ̈n dhɔ̈ŋic. Go Bɛ̈nydït piɔ̈u diu arëët kekë kɔc ke Yithriɛl. (Akan ee wën de Karemi de Dhabedi de Dhera wën raan dhiën ë Juda).

² Ku Jocua acï kɔc kɔ̈k tooc ë Jeriko, tooc keek Ai, wun dïït tɔ̈u në Bethel kɔ̈u baŋ të lɔ aköl amiäk, në Bethaben lɔ̈ɔ̈m, lek piny caath. Na wën, acïk piny lɔ caath,

³ ke ke puk kenïïm Jocua, ku luelkï an, “Ai ee pänydït thiinakäŋ. Kɔc acïkï duëër lɔ kedhie, të le ë yen mak. Toc aguum kaarou, ku nɔn ee yen aguum kadiäk ke kɔc lek rum. Du rem de tɔŋ tooc ëbɛ̈n.

⁴ Go aguum kadiäk ke kɔc ke Yithriɛl lɔ Ai lek muɔɔk piny. Go keek lɔ cop.

⁵ Go kɔc ke Ai ke cop në kal ë wut thok, abïk keek ɣɛɛt Cebraim ku näkkï kɔc kathiërdiäk ku dhetem në keyiic në wak de kuriic. Go kɔc ke Yithriɛl riɔ̈ɔ̈c ku pɛ̈lkï röt wei.

⁶ Na wën, ke Jocua ë dhiau piɔ̈u ku ret lupɔɔke yiic, ku ret röördït ke Yithriɛl lupɔɔkeniic ayadäŋ, në dhiën ë piɔ̈u. Ku cuɛtkï röt piny në athänduŋ de mät nɔm. Ku tɔ̈ukï piny ëtɛ̈ɛ̈n agut cï thëën, ke ke cï kenïïm wäl abuui nyooth dhiën ë kek piɔ̈ɔ̈th.

⁷ Ku lëk ë Jocua Bɛ̈nydït an, “Bɛ̈nydït Nhialic, ka eeŋö tɔ Yïn wo tem wɛ̈ɛ̈r de Jordan? Ku bä wo bɛ̈n tääu në kɔc ke Amor cin, bïk wo bɛ̈n riɔ̈ɔ̈k? Eeŋö cïn wo tɔ rɛ̈ɛ̈r në Jordan kɔ̈u lɔŋ të lɔ aköl amiäk?

⁸ Eeŋö bä jɔ lueel Bɛ̈nydït, ku kɔc ke Yithriɛl acïï kɔc ke ater keek cop?

⁹ Abï kɔc ke Kanaan en jɔ piŋ, ku piŋ ë raan ëbɛ̈n, raan rɛ̈ɛ̈r ee pinyë, abïk wo gɛɛu piny ku näkkï wook wodhie! Ka bä dhuëëŋdu jɔ döt adï?”

¹⁰ Go Bɛ̈nydït lɛ̈k Jocua an, “Jɔt rɔt! Eeŋö tɔ yï tɔ̈u piny aya?

¹¹ Kɔc ke Yithriɛl acïk wööc! Acïk män cä mat wokë keek dhoŋ kɔ̈u, män wään cä lɛ̈k keek an dötkï. Acïk ka kɔ̈k nööm në ka wään cä kuöm riääk. Acïk keek kual, ku matkï keek në kaken.

¹² Yen kë cïï Yithriɛl tɔ lëu kɔc ke ater ka. Acïk lɔ kat në keek, në luɔi cän ke kuöm riääk, keek gupken! Yɛn cï bï bɛ tɔ̈u wokë week, agut të bä wek käŋ riɔ̈ɔ̈k, ka wään cä lɛ̈k week an cïï ke nöm!’

¹³ Ka yïn, jɔt rɔt! Ku tɔ kɔc waak abïk ɣɛɛr, ku ë ke guiir röt bïk bɛ̈n në yanɔm. lɛ̈kë keek bïk bɛ̈n ë Yanɔm miäk, ke bä keek bɛ̈n guiëër ee kënë ke piŋkï, an, ‘Yithriɛl, ka wään lɛ̈k week an, riäkkï keek, taitai, acä wek kɔ̈k thiaan! Ka kɔckuön ke ater abïk week aa tiaam, agut të bä wek ee kakë kɔn nyaai nyïïn kedhie taitai!’

¹⁴ Ka yïn, lɛ̈kë keek ë ke bɔ̈ miäk aduduur ke ke cath në dhiëën, dhiënë në dhiënë cök. Ku dhiën cä kuɛ̈ny bei, abï bɛ tëëk ke ke cath në gɛɛu, gɛɛu në gɛɛu cök. Ku gen cä kuɛ̈ny bei, abï bɛ tëëk ke ke cath në ɣööt thook, ɣönë në ɣönë cök. Ku ɣön la kuɛ̈ny bei, abï bɛ tëëk ke raan cath në raanë cök.

¹⁵ Ku raan la kuɛ̈ny bei, ku le yök ke muk ka cän ke jaai, abï ɣaak kekë baaide ku këriëëcde ëbɛ̈n. Në luɔi cï en Yithriɛl yɔ̈ɔ̈r, ku dhoŋ mändï kɔ̈u.”

¹⁶ Na ɣɔn amiäk aduduur, ke Jocua ë bïï Yithriɛl bei, ke ke cath në wuöt, wunë në wut cök, go wun ë Juda kuɛ̈ny bei.

¹⁷ Na wën, ke tɔ wun ë Juda tɔ tëk ke ke cath në dhiën, dhiënë në dhiënë cök. Go dhiën ë Dhera kuɛ̈ny bei. Go dhiën ë Dhera bɛ tɔ tëk ke cath në ɣööt, ɣönë në ɣönë cök. Go ɣön ë Dhabedi kuɛ̈ny bei.

¹⁸ Go ɣön ë Dhabedi bɛ tɔ tëk ke raan ë cath ë raan cök. Go Akkan kuɛ̈ny bei, wën ë Karemi de Dhabedi, Dhabedi wën ë Dhera raan dhiën ë Juda.

¹⁹ Go Jocua lɛ̈k en an, “Mɛnhdï luel yic në Bɛ̈nydït Nhialic de Yithriɛl nɔm, tɔ leec, ku gam awäc.”

²⁰ Go Akkan puk nɔm an, “Yɛn ë wäc ë yic në Bɛ̈nydït Nhialic de Yithriɛl nɔm, ku kë cä looi kï:

²¹ Yɛn aa cï lupɔ läk tïŋ në ka wään pecku keek yiic. Lupɔ de kɔc ke Babilon, ku tiɛ̈ŋ ateek duëër thëmde aa kilɔɔ kaarou, ku tiɛ̈ŋ adhäm duëër thëmde aa biäk töŋ de kilɔ. Aguɔ piɔ̈u dɛ keek aläl, guɔ ke nööm. Acä keek wɛc piny në paanydï yic thïn, ka ateek anu në baŋ piny. Abäk keek lɔ yök ëtɛ̈ɛ̈n.”

²² Na wën, ke Jocua ë toc kɔc. Gokï kat lekï në paanyic. Gokï ke lɔ yök acï thiaan në paanyic, ke ateek ë nu ë kethäär piny.

²³ Gokï ke bɛ̈ɛ̈i bei në paanyic, ku yïnkï ke Jocua ku kɔc ke Yithriɛl kedhie. Ku tɛ̈ɛ̈ukï ke piny në Bɛ̈nydït nɔm.

²⁴ Ago Jocua Akkan dɔm, ku dɔm ë kɔc ke Yithriɛl en kedhie, ku nömkï ateek, ku lupɔ, ku adhääp, ayï wɛ̈ɛ̈t ke Akkan, ayï duetke, ayï ɣɔ̈kke, ayï thökke, ayï paanyde ku këriëëcde ëbɛ̈n, ku leerkï ke në wak de Akor.

²⁵ Na wën, ke Jocua ë lop Akkan an, “Eeŋö lui yïn wook ee riääk cït ee kënë? Yïn bïï Bɛ̈nydït riɔ̈ɔ̈k ee köölë!” Go kɔc Akan biɔ̈ɔ̈k kedhie në kur abïï thou. Na wën, acïk kɔc ke baaide biɔ̈ɔ̈k ayadäŋ në kur, ke ke jɔkï ɣɔ̈k mac.

²⁶ Ku jɔkï Akan thɔ̈c nɔm kut ë kurdït. Kek ee kurkë aŋootkï ke ke tɔ̈u agut cï ye köölë. Yen aŋoot ee wak ke ye cɔɔl an wak de Akor. Ku ëtɛ̈ɛ̈n, Bɛ̈nydït ë agönhde jɔ bɛ̈n pɔ̈l.