Jocua 24 - JAM DE NHIALIC 2011

Jocua Ajiëëm Yithriɛl në Cekem

¹ Na ɣɔn, ke Jocua ë mat dhiëën ke Yithriɛl nïïm kedhie në Cekem. Cɔɔl röördït, ku bäny ke dhiën, ku bäny ke luk, ku bäny ke Yithriɛl. Agokï guëër në Nhialic nɔm.

² Na wën, ke lëk ë Jocua keek kedhie an, “Acïï Bɛ̈nydït Nhialic de Yithriɛl lɛ̈k week an, ‘ɣɔn thɛɛr, kuarkun rɛ̈ɛ̈r lɔŋ de wɛ̈ɛ̈r ë Yuparat. Aake ye yiëth lam. Ku raan tök në kuarkun ë lam yiëth, ee kuɛɛrëdun Tera, wun Abraɣam kekë Naɣor.

³ Guɔ kuɛɛrëdun Abraɣam jɔt lɔŋ de Yuparat, ku kuɛ̈ny piny de Kanaanic ëbɛ̈n. Na ɣɔn, ke gäm mïth juëc, guɔ gäm Yithaak.

⁴ Ku gäm Yithaak Jakop kekë Ethau. Guɔ Ethau gäm piny ë kuur de Edom tɔ ye pinyde. Ku jäl kuɛɛrëdun Jakop le Rip kekë mïthke.

⁵ Na ɣɔn, ke tuöc keek Mothe kekë Aron, ku luöi Rip këtuc. Ku bɛ̈ɛ̈i Yithriɛl bei.

⁶ Na wën aa bɛ̈ɛ̈i kuarkun bei Rip, acïk bɛ̈n ɣëët në Abäpdit Thith thok. Go Kɔc ke Rip keek lɔ̈ɔ̈k biɔɔth ke ke cath në abëëlkɛn ke tɔŋ, ku rem de tɔŋ ë jöŋgöör.

⁷ Na wën, ke kuarkun ë ke cɔl Ɛn an luäk keek. Aguɔ mɔ̈ɔ̈th tääu në kaamden në kɔc ke Rip. Ku week gupkun, wek ŋic kë cä bɛ̈n luöi kɔc ke Rip, luɔi cän keek bɛ̈n tɔ mou ë wɛ̈ɛ̈r. Ku ëtɛ̈ɛ̈n, wek ë bɛ̈n tɔ̈u në jɔ̈ɔ̈ric në run juëc.

⁸ “Na ɣɔn, ke we bɛ̈ɛ̈i keek piny de kɔc ke Amor në wɛ̈ɛ̈r de Jordan kɔ̈u të lɔ aköl amiäk. Guɔkï piɔ̈t në kɔc ke Amor, guɔ we tɔ tiëm. Acä keek bɛ̈n riɔ̈ɔ̈k në wenïïm tueŋ ku ta we nöm pinyden.

⁹ Na ɣɔn, ke Balak wën ë Dhipor melik de Mowap, ke be we gɔ̈p tɔŋ. Go Balaam wën ë Beyor tooc bï we bɛ̈n läm kërac.

¹⁰ Guɔ jaai, cä lämde piŋ. Na wën, ke puk rɔt thiëi week këpiɛth. Guɔ athiɛɛide piŋ ku luäk we bei në Balak ciin.

¹¹ “Ku ëtɛ̈ɛ̈n, wek ë Jordan bɛ̈n teem kɔ̈u, ku lakï Jeriko. Na wën, ke kɔc ke Jeriko ë ke gäm në week, ayï kɔc ke Amor, ayï kɔc ke Peridh, ayï kɔc ke Kanaan, ayï kɔc ke Ɣit, ayï kɔc ke Girgac, ayï kɔc ke Ɣib, ayï kɔc ke Jebuth. Guɔ keek tɔ tiamkï kedhie.

¹² Yɛn ë meliik ke kɔc ke Amor bɛ̈n muum ɣɔn në wenïïm tueŋ, ku ta ke tiamkï. Acie wek ë cop keek në abätɛ̈ɛ̈ukun, ku nɔn ee yen dhɛ̈ŋkun, ee Yɛn ë cop keek.

¹³ Wek cä gäm wuöt ë cäkkï yïk, ka we rɛ̈ɛ̈r thïn ënɔɔnë. Ku gäm week piny ë kɛ̈nkï kɔn puur, ka wek cam mïth ke Olip, ku mïth ke ŋaap ë kɛ̈n wek tiim com.’

¹⁴ Na wën, ke lëk ë Jocua keek an, “Ka week, jakï Bɛ̈nydït riëëu guöp arëët, ku yak luööi aläl në wepiɔ̈ɔ̈th ëbɛ̈n. Cuatkï yiëth wei kedhie, yiëth ɣɔn ye kuarkun lam lɔŋ de wɛ̈ɛ̈r ë Yuparat, ayï Rip. Ku Bɛ̈nydït yetök yen luööikï.

¹⁵ Na cäkkï Bɛ̈nydït bï luööi, ke we lɔc raan bäk luööi ee köölë. Tɛk däŋ, bäk yiëth ɣɔn ye kuarkun lam piny de Yuparat lɔŋ tui kek bäk luööi, ku nɔn ee kek yiëth ke kɔc ke Amor, kɔc rɛ̈ɛ̈r wek pinyden. Na yɛn wokë baaidï, ee Bɛ̈nydït Yen abuk luööi.”

¹⁶ Gokï puk nɔm an, “Wok cïï Bɛ̈nydït duëër kɔn puɔ̈l ananda, ku luuiku yiëth.

¹⁷ Ee Bɛ̈nydït Nhialicda yen ë bïï wo bei ɣɔn paan ë Rip në wärkuɔ ëtök. Ku wok ë kake gäi ɣɔn looi Rip tïŋ në ee nyïïnkuɔn bïï dhiëi bootë. Ku gël wook në cäthda yic ëbɛ̈n, të ɣɔn tëëk wok në juööriic ëbɛ̈n.

¹⁸ Bɛ̈nydït ë kɔc ke Amor bɛ̈n cuɔp wei në wonïïm tueŋ, të ɣɔn bïï En wook ee pinyë. Ka yen, ee Bɛ̈nydït Yen abuk aa luööi, në luɔi Yen Nhialicda.

¹⁹ Ago Jocua lɛ̈k keek an, “Wek cïï Bɛ̈nydït bï lëu në luui, në luɔi Yen Nhialic ɣeric, ku ee mantil. Na lak wööc piɔ̈u, acïï we bï päl awäc.

²⁰ Të la wek Bɛ̈nydït puɔ̈l, ku lamkï yiëth, Bɛ̈nydït abï we luöi këtuc. Të la wek En wööc piɔ̈u, abï we riɔ̈ɔ̈k na cakaa nɔn piɛth En ke week.”

²¹ Agokï jaai lɛ̈kkï Jocua an, “Ei, ee Bɛ̈nydït Yen abuk luööi.”

²² Go Jocua lɛ̈k keek an, “Ee wek aye cäätɔɔ ë röt wapäc, në gäm cä wek luɔi de Bɛ̈nydït gam.” Gokï gam an, “Ɣɛɛ, wok ee cäätɔɔ në röt wapäc.”

²³ Go Jocua lueel an, “Na cäk gam aya, ke we cuɛt yiëth cath në week wei taitai abï cïn tök. Ku nhiaarkï Bɛ̈nydït Nhialicdun në wepiɔ̈ɔ̈th ëbɛ̈n.”

²⁴ Gokï lɛ̈k Jocua an, “Wok bï Bɛ̈nydït Nhialicda luööi, ku dötku lööŋke.”

²⁵ Go Jocua mät looi kekë kɔc ke Yithriɛl në Cekem ee köölë. Ku gëm keek lööŋ bï kek cath.

²⁶ Na wën, ke Jocua ë gɔ̈ɔ̈r ee lööŋkë piny në awerek de lööŋ ke Nhialic yic. Ku ciëp gök dïït ë kuur thar piny në tim de ɣok thar tëɣeric në Bɛ̈nydït lɔ̈ɔ̈m.

²⁷ Ku lëk ë Jocua keek kedhie an, “Tiëŋkï ee kuurë! Yen abï ya cäätɔɔ, në baŋ cï yen jam de Bɛ̈nydït piŋ ëbɛ̈n. Ee yen abï week aa täk nïïm, ke we cïï Nhialicdun bï wööc piɔ̈u.

²⁸ Ago Jocua kɔc kedhie tɔ jäl, ŋɛk ee yenɔm puɔ̈k wunden.

Thon ë Jocua kekë Eleyadhar

²⁹ Në aköölkë yiic, ke Jocua wën ë Nun awun de Bɛ̈nydït ë thou, ke cï run aa bɔt ku thiëër.

³⁰ Ago thiɔ̈k pinyde në Timnath Thera, në piny ë kuur de Eparaim yic, në kuur ë Gaac biäk të lɔ rut.

³¹ Go kɔc ke Yithriɛl Bɛ̈nydït luööi në akööl ke Jocua, ku luuikï në akööl ke röördït ɣɔn löök tɔ̈u në Jocua cök, kɔc ɣɔn ŋic këriëëc cïï Bɛ̈nydït luöi Yithriɛl ëbɛ̈n.

³² Ku kɔc ke Yithriɛl cï guöp de Jothep jɔt ke keek të ɣɔn jël kek Rip. Agokï lɔ tɔ̈ɔ̈u Cekem në piny wään cïï Jakop ɣɔɔc në bɔt (100) ateek tëde wɛ̈ɛ̈t ke Ɣamor (ku Ɣamor yen aaye wun Cekem). Ku pinyë acï bɛ̈n lɔ̈ɔ̈k aa piny de mïth ke Jothep.

³³ Ago Eleyadhar wën Aron thou, go thiɔ̈k në Gibia, piny cï gäm Pineɣath wënde në piny ë kuur de Eparaim yic.