Jocua 18 - JAM DE NHIALIC 2011

Tëŋ de Biäk de Piny cï Döŋ

¹ Na wään, aacï akutnɔm de kɔc ke Yithriɛl piny peec ëbɛ̈n, ke ke mɛt Cilo kedhie, ku piëëtkï paany de mät ëtɛ̈ɛ̈n.

² Ku ade dhiëën ke Yithriɛl kadhorou ë ŋoot ke ke kënë guɔ gäm piiny.

³ Go Jocua lɛ̈k kɔc ke Yithriɛl an, “Eeŋö ŋuɔɔt wek ke we kën piny nööm agut cï wälë, piny wään cïï Bɛ̈nydït Nhialic de kuarkun gäm week?

⁴ Dhiën ëbɛ̈n në dhiëniic, ë gëm ɛn kɔc kadiäk. Abä ke bɛ̈n tooc, lek piny caath ëbɛ̈n, ku gäärkï täu tɔ̈u ë piny, ayï tɛɛk duëërë ye tek. Ku ëtɛ̈ɛ̈n, abïk kenïïm lɔ puɔk ɛn.

⁵ Ku abïk piny tɛ̈k dhiën kadhorou. Ku Juda abï tɔ̈u tëde të lɔ wöuwic, ku Jothep abï tɔ̈u tëde aya, të lɔ rut.

⁶ Gäärkï täude ye piinykë kadhorou, ku yiɛ̈nkï ke yɛn. Ku abä ke bɛ̈n tɛ̈k week në gɛk eenë në Bɛ̈nydït Nhialicda nɔm.

⁷ Ku Lebai acïï ke bï gäm piny në week ëtök. Luɔi luui kek Bɛ̈nydït ke ke ye Bäny ke kake Nhialic yen aye biäkden. Ku cït man ŋiɛc wek en, dhiën ë Gad, kekë dhiën ë Ruben, ku biäk töŋ de Manatha, acïk piinyken nööm në Jordan lɔŋ të lɔ aköl amiäk. Piny ɣɔn gëmë Mothe keek, awun de Bɛ̈nydït.”

⁸ Na wën, aa jël kɔc lek piny caath, ke lëk Jocua keek an, “Lak caathkï piny ëbɛ̈n, ku pääkkï thok, ku jakï bɛ̈n ciëën të nu yɛnë. Yɛn bï gɛk bɛ̈n dɛɛny ë Bɛ̈nydït nɔm ë Cilo, tɛ̈k ɛn week piny.”

⁹ Agokï piny lɔ caath ëbɛ̈n, ku tïŋkï luɔi bï kek en tɛ̈k dhiën kadhorou. Ku gɛ̈ɛ̈rkï wuöt dït rin piny. Ku jɔkï kenïïm puɔ̈k Jocua në Cilo.

¹⁰ Ago Jocua gɛk dɛɛny ë Cilo në Bɛ̈nydït nɔm, tëk en keek piny, ku jɔ dhiën aa gäm pinydɛn cï löny ke yen, në dhiëën ke Yithriɛl ɣɔn kënë kɔn gäm piny.

Piny cï Gäm Benjamin

¹¹ Wën tek ë piiny, piny de Benjamin yen aa kɔn löny kekë dhiënke, ku ɣöötke. Agokï löny në piny nu në kaam de Juda kekë Jothep.

¹² Pinyden të lɔ rut, aa gɔl rɔt në Jordan kɔ̈u, ku tëëk në Jeriko kɔ̈u baŋ të lɔ rut, ku gut piny ë kuur të lɔ aköl athɛ̈i, ku le ë jɔ̈ɔ̈r de Bethaben.

¹³ Ku jël akeu ëtɛ̈ɛ̈n, ke lɔ wun cɔl Ludh të lɔ wöuwic (Ludh yen acɔl Bethel ayadäŋ), ku cök akeu rɔt piny le Ataroth Addar, në kuur nɔm të tuööm nɔm ke piny thuuth de Bethɣaron të lɔ wöuwic.

¹⁴ Ku ëtɛ̈ɛ̈n, ku ë yenɔm bɛ̈n cök tëdäŋ. Ë rɔt bɛ̈n apuɔ̈k të lɔ wöuwic në kuur thok piny baŋ të lɔ aköl athɛ̈i, kuur tuööm nɔm kekë Bethɣaron, ku le kɔ̈ɔ̈c në Kiriath Baal (yen acɔl Kiriath Jiriim ayadäŋ) ee wun ë dhiën ë Juda. Yen akenden ka në biäk të lɔ aköl athɛ̈i.

¹⁵ Ku akenden të lɔ wöuwic, ee rɔt gɔl në Kiriath Jiriim këc, ku bɛɛric ëtɛ̈ɛ̈n le Eperon ku le në nyin ë pïïu ke Neptowa.

¹⁶ Ku jël ëtɛ̈ɛ̈n le ë kuur thar piny, kuur tuööm nɔm kekë bäny de wën ë Ɣinom, në bäny ë Repaim këc të lɔ rut. Ku tëëk në bäny de Ɣinomic, le tëëk në Jebuth lɔ̈ɔ̈m baŋ të lɔ wöuwic, ku le Enrogel.

¹⁷ Ku puk rɔt të lɔ rut ëtɛ̈ɛ̈n, le Encemec, ku bɛɛric Geliloth, të tuööm nɔm kekë Adumim. Ku bɛɛric në kuur ë Boɣan (Boɣan ee wën ë Ruben)

¹⁸ Ku bɛɛric të lɔ rut tëëk në kuur thär, le Beth Araba, ku bɛɛric.

¹⁹ Ku le tëëk në kuur thär ke wel e nɔm të lɔ rut, le Beth Ɣogla, ku le guöt nyin ee lɔ në Wɛ̈ɛ̈r de Amilɔ yic, në wɛ̈ɛ̈r de Jordan thok të lɔ wöuwic. Yen akenden ka në biäk të lɔ wöuwic.

²⁰ Ku Jordan yen aaye akenden në baŋ të lɔ aköl amiäk Yen aken ë piny ë gëmë dhiën ë Benjamin ka në ɣöötken.

²¹ Pɛ̈ɛ̈nydït ke dhiën ë Benjamin, ee Jeriko kekë Beth Ɣogla, ku Emek Kedhidh,

²² ku Beth Araba, ku Dhemaraim, ku Bethel,

²³ ku Awim, ku Para, ku Opera,

²⁴ ku Keparamoni, ku Opini, ku Geba. Aake ye pɛ̈ɛ̈nydït kathiëër ku rou, ayï bɛ̈i kɔ̈k thiääk në keek.

²⁵ Ku wuöt kɔ̈kken ee yï Gibiɔn kekë Rama, ku Beeroth,

²⁶ ku Midhpa, ku Kepira, ku Modha,

²⁷ ku Rekem, ku Yipriilo, ku Tarala,

²⁸ ku Dhela, ku Ɣalep, ku Jebuth (yen aye Jeruthalem), ku Gibia, ku Kiriath Jiriim. Aake ye pɛ̈ɛ̈nydït kathiëër ku ŋuan kedhie, mɛ̈tkï në bɛ̈i thiääk në keek. Yen piny ë nööm ë dhiën ë Benjamin ka, ke ye pinyden.