Jɔn 15 - JAM DE NHIALIC 2011

Yecu yen Aye Enap Yic

¹ “Yɛn aye tim yic tim de enap, ku Wäär yen aye raan tit dom.

² Këër nu ë yayic ëbɛ̈n këër reec luɔk, ka bïïyë bei: ku këër ëbɛ̈n këër ee luɔk, ka looi abï kɔ̈u piath, ke bï luɔk aläl.

³ Ku week we cï guɔ piath në jam cä lɛ̈k week.

⁴ Rɛ̈ɛ̈rkï ë yayic, ku yɛn ë weyiic. Acït man cïï këër duëër luɔk etök, të cïï en rɛ̈ɛ̈r ë timic, yen acït week aya, we cïï duëër luɔk, të kɛ̈n wek rëër ë yayic.

⁵ “Yɛn ee tim de enap, wek ee kër: raan rɛ̈ɛ̈r e yayic, ku rɛ̈ɛ̈r ë yeyic, yen aye raan ee luɔk arëët: ku të cïn en ɛn, ka cïn kë duɛ̈ɛ̈rkï looi.

⁶ Raan cie rëër ë yayic, ka cuɛtë wei cït man ë këër, ago riɔu, ago ke kut nïïm, ku cuɛtë ke mɛɛc, agokï nyop.

⁷ Të rɛ̈ɛ̈r wek ë yayic, ku rɛ̈ɛ̈r wëlkï ë weyiic, ka kë nu ë wepiɔ̈ɔ̈th ëbɛ̈n aduɛ̈ɛ̈rkï ke lip, ku abï ke luöi week.

⁸ Luɔk luɔk wek aläl, yen aye Wäär tɔ yök dhuëëŋ, yen abä wek aa kɔckiën ë piööcë.

⁹ Acït man cï Wäär a nhiaar, en acän we nhiaar aya: rɛ̈ɛ̈rkï ë nhiëërdï yic.

¹⁰ Të dɔ̈t wek lööŋ cä thɔ̈n week, ke we bï rëër ë nhiëërdï yic, cït man cän lööŋ cï wäär a thɔn döt, aguɔ rëër ë nhiëërde yic.

¹¹ Kakë acä ke lɛ̈k wek, ke miɛt ë yɛnpiɔ̈u bï rëër ë weyiic, aguɔkï piɔ̈ɔ̈th miɛt abäk piɔ̈ɔ̈th ayum.

¹² Kënë ee kë thɔ̈n week an: nhiaarkï röt, cït man cän week nhiaar.

¹³ Acïn raan cath ke nhiëër dïït wär ee kënë an, bï raan wëike gaam në biäk de määthke.

¹⁴ Wek ee määthkï, të ya wek ka cä thɔ̈n week looi.

¹⁵ We cä bï bɛ tɔ ye lïïm, lïm akuc kë looi bɛ̈nyde: ku we cä tɔ ye määthkï, luɔi cän we tɔ ŋic këriëëc ëbɛ̈n ka cä piŋ tëde Wäär.

¹⁶ Acie week ë lɔc ɛn, ee yɛn ë lɔc week, ku tääu week tëdun an, bäk lɔ luɔk, ago mïthkun tɔ̈u: ago na de kë bäk lip tëde wäär në rinkï, ka bï gäm week.

¹⁷ Löŋ thɔ̈n week kï, an: nhiaarkï röt wapäc.

Män de Piny nɔm

¹⁸ Të mɛɛnë kɔc ke piny nɔm week, ka ŋiɛckï nɔn cï kek a kɔn maan, ke we ŋoot ke we kënë maan.

¹⁹ Tëë we ye kɔckɛn ë kɔc ke piny nɔm, ke kɔc ke piny nɔm adï nhiaarkï kɔcken: ku ënɔɔnë, ë luɔi cä wek ee kɔckɛn ë kɔc ke piny nɔm, ku we cä lɔ̈c bei ë piny nɔm, yen amɛɛnë kɔc ke piny nɔm week.

²⁰ Takkï wenïïm në jam cä lɛ̈k week an: ‘Lïm acï bɛ̈nyde wär ë dït.’ Të cï kek a yɔŋ, ka bïk we yɔŋ ayadäŋ, ku të cï kek jamdï döt, ka bïk jamdun döt ayadäŋ.

²¹ Ku abïk kakë kedhie luöi week në biäk de rinkï, në kuny kuc kek raan ë toc ɛn.

²² Tëë ya kën bɛ̈n jam wo keek, adï cïn kërɛɛc nu ë keyiëth: ku ënɔɔnë, acïn të bï keek röt kɔ̈c e kërɛɛcden.

²³ Raan man ɛn ka man Wäär aya.

²⁴ Tëë ya kën käŋ looi e keyiic, ka kënë raan däŋ looi, adï cïn kërac ë keyiëth: ku ënɔɔnë acïk wo tïŋ ku mankï wo gup wokë Wäär waarou.

²⁵ Ku kënë ë tïc, luɔi bï jam aa yic jam cï gɔ̈ɔ̈r ë löŋdenic an, ‘Acïk a maan guöp youyou.’

²⁶ Ku Raan ë kɔc riit piɔ̈ɔ̈th, Raan bä tuöc week në Wäär lɔ̈ɔ̈m, yen aye Wëi yic, Wëi ë bɔ̈ bei ë Wäär lɔ̈ɔ̈m, të cï en bɛ̈n, ka bï aa cäätɔdï.

²⁷ Ku wek ee cäätɔ ayadäŋ, luɔi nuö wek në yɛn ëtök në göl e gɔlë käŋ.