Jeremia 35 - JAM DE NHIALIC 2011

Jeremia kekë Raan de Rekabai

¹ Wään ye Jeɣoyakim wën de Jothia melik de Juda, go ë Bɛ̈nydït lɛ̈k ɛn an,

² “Lɔɔr tëde kɔc ke dhiën de Rekabai ku jam we keek. Ku bɛ̈ɛ̈iyë keek ë ɣön töŋ nu ë kal de ë Luaŋdït yic, ku gämë keek mɔ̈u.”

³ Aguɔ dhiën de Rekabai jɔt ëbɛ̈n, Jaadhania (wën de Jeremia däŋë, ku ye wën de Ɣabadhinia) kekë wɛ̈ɛ̈tëkɔcken ku wɛ̈ɛ̈tke kedhie,

⁴ ku bɛ̈ɛ̈i keek Luaŋdït. Guɔ keek lɛɛr ɣön de kɔcpiööcë de tiët Ɣanan wën de Yigadalia, raan de Nhialic, ku ɣönë aa nu në ɣön de Maathia wën de Calum nɔm nhial, bɛ̈ny de naamde Luaŋdït, ku aa thiääk kekë ɣööt ke bäny kɔ̈k.

⁵ Aguɔ cuöp ku abïïny thiäŋ në mɔ̈u tääu në kɔc ke Rekabai nïïm, ku lɛ̈k keek an, “Dëkkï në mɔ̈u.”

⁶ Agokï bɛ̈ɛ̈r an, “Wo cie dek ë mɔ̈u. Kuɛɛrëda Jonadap wën de Rekap acï wook yɔ̈ɔ̈k, an acïn raan bï aa dek në mɔ̈u ëbɛ̈n ë woyiic, wook ku mïthkuɔ.

⁷ Acï wook yɔ̈ɔ̈k aya an cuku ɣööt bï yïk, ku cukku bï aa com, ku wok cïï duum ke enap bï com ku cuku duumken ɣɔc. Acï wook yɔ̈ɔ̈k an buk aa rɛ̈ɛ̈r në pɛɛny yiic ananda, agoku tɔ̈u ee pinydan rëër wok thïnë aköölnyïïn ke wo cït kɔc lei.

⁸ Wok cï lööŋ cï Jonadap wën de Rekap gäm wook riëëu kedhie. Wook ku diëërkuɔ, ku wɛ̈ɛ̈tkuɔ ku duetkuɔ, wok cie dek në mɔ̈u.

⁹ Wok cïï ɣööt bï wok rëër thïn ee yïk, wok cïn nïïm duum ke enap, ku duum, ku rap.

¹⁰ Ku wok rɛ̈ɛ̈r në pɛɛny yiic, ku cïnku nïïm ɣööt, ku duum, ku rap. Ku wok cï lööŋ cïï kuɛɛrëda Jonadap lɛ̈k wook ëbɛ̈n riëëu.

¹¹ Ku wään cï melik Nebukadnedhar wut peec, acuk lueel nɔn bï wok lɔ Jeruthalem, në riɔ̈ɔ̈c riɔ̈ɔ̈c wok në rem de tɔŋ de Babilonia ku rem ë tɔŋ de Thiriya. Yen kë tɔ wo rëër ë Jeruthalem ka.”

¹² Ago jam de Bɛ̈nydït Awärjäŋ bɛ̈n tëde Jeremia:

¹³ An, “Acïï Bɛ̈nydït de rɛm, Nhialic de Yithriɛl lueel an: Lɔɔr lɛ̈kë kɔc ke Juda ku kɔc ceŋ Jeruthalem, an eeŋö cä wek lööŋkï ku wɛ̈ɛ̈t cä gäm week ee riëëu?

¹⁴ Mïth ke wɛ̈ɛ̈t ke Jonadap acïk lööŋke riëëu luöi cïï kek mɔ̈u bï aa dek, agut cï ee köölë acïn raan töŋ ee mɔ̈u dek ë keyiic, ë biäk cï kek löŋ de wuönden döt. Ku Yɛn ee cool ke ya jam wo week, ku wek kën Ya riëëu.

¹⁵ Wek ya cool ë tuöc keek tïtkï kedhie, kɔc ee Yɛn luööi, ku acïk we yɔ̈ɔ̈k bäk kuɛɛrkuön rac pɔ̈l, ku bäk këpiɛth aa looi. Acïk we yɔ̈ɔ̈k luɔi cä wek yiëth kɔ̈k bï aa lam ku cäkkï keek luui, aguɔkï ŋoot ke we rɛ̈ɛ̈r piny cä gäm week ku gäm kuarkun. Ku wek kën jamdï piŋ ku cäkkï wëlkï tɔ lɔ ë weyïth.

¹⁶ Mïth ke wɛ̈ɛ̈t ke Jonadap acïk lööŋ cïï kuarken gäm keek riëëu, ku wek ee kɔckë wek kën Ya riëëu.

¹⁷ Ka ënɔɔnë aluɛɛl, Yɛn Bɛ̈nydït, Nhialic de rɛm, Nhialic de Yithriɛl, wek kɔc ke Juda ku Jeruthalem wedhie, wek bä yiɛ̈n riääk wään cä lueel. Yɛn bï ee kënë looi në biäk cä wek kë cä lɛ̈k week ee piŋ, ku wek cïï cɔ̈tdï ee bɛ̈ɛ̈r të caal Ɛn week.”

¹⁸ Aguɔ lɛ̈k dhiën de Rekabai, an acïï Bɛ̈nydït de rɛm, Nhialic de Yithriɛl lueel an, “Wek cï löŋ cï gäm week në Jonadap kuɛɛrëdun riëëu, ku cäk wëëtde kuany yic ëbɛ̈n, ku wek cï këriëëc ëbɛ̈n cï lɛ̈k week looi.

¹⁹ Ka ënɔɔnë, Yɛn Bɛ̈nydït de rɛm, Nhialic de Yithriɛl, Yɛn luel gutguut an Jonadap wën de Rekap abï nɔm aa dɛ mɛwä në wɛ̈ɛ̈tke yiic, raan bï Yɛn aa luööi.”