Jeremia 24 - JAM DE NHIALIC 2011

Diööny Kaarou de Mïth ke Ŋaap

¹ Go Bɛ̈nydït ya nyuöth diööny ke mïth ke ŋaap kaarou acï ke tääu në Luaŋdït nɔm. (Ee të wään cï Nebukadnedhar melik de Babilon Jeɣoyakim wënde Jekonia melik de Juda peec ë Jeruthalem ke mac, peec keek në bäny ëtök, ku kɔc ee guaŋ ku atëët.)

² Diööny tueŋ ade yic mïth ke ŋaap piɛth, ka cï dap bɔ̈ny, ku diööny däŋë ade yic mïth ke ŋaap rac, acïkï piɛth bï keek cam.

³ Na wën, go ë Bɛ̈nydït lɛ̈k ɛn an, “Jeremia, eeŋö woi? “Aguɔ bɛ̈ɛ̈r an, “Mïth ke ŋaap. Kapiɛthkë apiɛthkï arëët, ku karɛckë arackï arëët, acï keek duëërë cam.”

⁴ Ago jam de Bɛ̈nydït bɛ̈n tëde yɛn an:

⁵ “Yɛn Bɛ̈nydït Nhialic de Yithriɛl, Yɛn ee kac cï peec leerë keek Jeruthalem tïŋ cï mïth ke ŋaap piɛth, ku bä ke looi apiɛth.

⁶ Abä keek tiit, ku abä keek bɛ̈ɛ̈i ciëën ee pinyë. Abä keek yïk acä keek bï thuöör piny, abä keek com acä keek bï wuöth thäär bei.

⁷ Abä keek gäm piɔ̈n bï kek ye ŋic nɔn Yɛn Bɛ̈nydït. Ku ëtɛ̈ɛ̈n abïk aa kɔckï, ku Yɛn bï aa Nhialicden, në biäk bï kek kenïïm pɔ̈k Ɛn në piɔ̈nden ëbɛ̈n.

⁸ “Ku në biäk de Dhedekia melik de Juda, ku bäny thiäk në yen, ku kɔc kɔ̈k ke Jeruthalem ceŋ ee pinyë ku nɔn cïk lɔ Rip, Yɛn Bɛ̈nydït, abä keek looi arac kedhie cï man de mïth ke enap rac cïï duëërë cam.

⁹ Yɛn bï riääk dït bɛ̈ɛ̈i në kegup, ka juöör ke pinynɔm kedhie abïk riɔ̈ɔ̈c. Abïï kɔc ke biɔɔn gup, ku dɔl kɔc ke gup, ku bui keek gup, ku rinken abïï keek tɔ ee këde aciɛɛn në piny nɔm ëbɛ̈n, piny bän keek thiäi thïn.

¹⁰ Yɛn bï tɔŋ bɛ̈ɛ̈i, ku cɔk, ku bɛ̈ɛ̈i jɔɔk në kegup, abïk riääk liŋliŋ abïï ciɛ̈n raan töŋ bï döŋ piny në keyiic, piny cä gäm keek në kuarken.”