Jeremia 20 - JAM DE NHIALIC 2011

Agönh de Jeremia kekë Pacur Bɛ̈ny de Kakë Nhialic

¹ Na wën cï Pacur wën de Yimer, raan ë ye bɛ̈ny tueŋ de Luaŋdït, Jeremia piŋ ke luel ee kakë,

² go kɔc yɔ̈ɔ̈k bïk tiët Jeremia dui ku tɔ rek ë joth tëthiääk kekë Kal Thoŋ ë Benjamin të lɔ nhial ë Luaŋdïtic.

³ Ku në kööldäŋë, wään cï Pacur joth tɔ lony, go ë Jeremia yɔ̈ɔ̈k an, “Bɛ̈nydït akën yïn cäk an Pacur. Rin cï ke gäm yïn ee ‘Riɔ̈ɔ̈c ë Pinynɔm ëbɛ̈n.’

⁴ Acïï Bɛ̈nydït lueel guöp an, “Yïn bä tɔ ee këde riɔ̈ɔ̈c tëde yïn guöpdu, ku tëde määthku, ku abä keek tïŋ anäk keek në abätäu de kɔc ke aterden. Yɛn bï kɔc ke Juda kedhie tääu në riɛl de Babilonia ciin, abï kɔc kɔ̈k jɔt ke ke mac leer ke pinyde ku nɛ̈k kɔc kɔ̈k.

⁵ Ku yɛn bï kɔc ke aterden tɔ rum kuɛth de ee pänydïïtë, nömkï kaken ku wëuken ëbɛ̈n, ayï wëu ke melik de Juda, ku jɔt käŋ ëbɛ̈n leer ke Babilonia.

⁶ Ku yïn Pacur, yïn bïï peec ku leerë yïn Babilonia. Ku yïn bï thou ku tɔ̈ɔ̈u yïn ëtɛ̈ɛ̈n, wekë määthku kedhie, määthkuön wään ye ke lɛ̈k mɛth juëc.’ ”

Jeremia Agööny Tëde Bɛ̈nydït

⁷ Bɛ̈nydït Yïn cï yɛn math, ku yɛn cï math. Yïn ril awär yɛn, ku yïn cï ya tiaam. Ku raan ëbɛ̈n ee ya dɔl guöp, ayek ya bui guöp akööliic ëbɛ̈n.

⁸ Të ee yɛn jam yɛn ee dhiau ë röldït ku kiɛɛu an, “Akuöörkuöör! Riääk!” Bɛ̈nydït yɛn ye dɔl guöp, ku biɔn yɛn guöp në biäk yan jamdu lueel.

⁹ Ku të luɛɛl yɛn en an, “Yɛn bï nɔm määr ë Bɛ̈nydït, ku yɛn cïï bï bɛ jam ë rinke,” ke jamdu acït many dɛ̈p ë ya yic thïn. Acä them aläldïïtë në luöi bän ye muk, ku acïn luöi duëër yɛn en bɛ lëu në guöm.

¹⁰ Yɛn ee raan ëbɛ̈n piŋ ke ŋun an, “Akuöörkuöör anu ë pinynɔm ëbɛ̈n! Ka lok lëkku bäny ke baai!” Ayï määthkï nɔm atitkï wïïkdï. Ayek lueel an, “Tɛkdäŋ bïï math, ku ëtɛ̈ɛ̈n abuk dɔm ku jɔku röt guöör.”

¹¹ Ku yïn Bɛ̈nydït yïn tɔ̈u we yɛn, Yïn ril ku wärjäŋ, ku kɔc ee yɛn yɔŋ abïk thueet. Abïk yäär aɣet athɛɛr, në biäk cïï kek duëër tiam. Ayärden acïï kɔc nïïm bï määr ë yen.

¹² Ku Bɛ̈nydït de rɛm, Yïn ee kɔc them ë yic, yïn ŋic kë nu ë kenïïm ku në kepiɔ̈ɔ̈th. Tɔ ya tïŋ yïn ke yï guur këdï në kɔc ke aterdï, në biäk cän göönydï tääu ë yïcin.

¹³ Kiëtkï diɛt Bɛ̈nydït! Lɛckï Bɛ̈nydï! Ee kɔc yɔŋ luök në kɔc ee karɛc looi cin.

¹⁴ Aciɛɛn abï tɔ̈u ke kööl ë dhiëëthë yɛn. Mär nɔm në kööl ë dhiëëth ë maar!

¹⁵ Aciɛɛn abï tɔ̈u ke raan ë tɔ wäär mit piɔ̈u, raan ë yïn yen thok an, “Ee mɛwä! Yïn de mɛwä!”

¹⁶ Tɔ cït ee pɛ̈ɛ̈nydïtkë, pɛ̈ɛ̈nydït cïï Bɛ̈nydït ke riɔ̈ɔ̈k ke cïn kokëpiɔ̈u. Tɔ piŋ dhiën de arɛɛm ë dhiëëuwic, ku piŋ kaaŋ de tɔŋ aköl,

¹⁷ në biäk kën en yɛn nɔ̈k ke ya ŋoot ke ya kën ë dhiëëth. Ëtɛ̈ɛ̈n maar yäc aduëër guɔ aa raŋdï.

¹⁸ Eeŋö dhiëëthë yɛn? Ee biäk bän aa nuan ku ja piɔ̈u jiɛth, ku thök pïïrdï në ayäär?