Jeremia 18 - JAM DE NHIALIC 2011

Jeremia anu Ɣön ë Raan ee Töny Cuëëc

¹ Go ë Bɛ̈nydït lɛ̈k ɛn an,

² “Lɔɔr ɣön ë raan ee töny cuëëc, të bän yïn lɔ gäm jamdï.”

³ Guɔ lɔ ëtɛ̈ɛ̈n guɔ raan ee töny cuëëc tïŋ ke lui në cökke yiic.

⁴ Të cïï töny biäk bɛ̈n rac, ee tiɔp nööm ku looi däŋ në yen.

⁵ Na wën, go jam de Bɛ̈nydït bɛ̈n tëde yɛn an:

⁶ “Ciën nɔm yic duëër Yɛn lui wo week, baai de Yithriɛl, cït man ë kë ye raan ee töny cuëëc luöi tiɔp? Baai de Yithriɛl, wek nu ë yacin, cït man ye tiɔp nu në raan ee töny cuëëc cin.

⁷ Na luɛɛl ë kööl cä tak an yɛn kɔɔr bä jur ku nɔn ee ciɛɛŋ nyaai, ku nɔn dhuɔŋ piny, ku riääk,

⁸ ku na cï ee jurë rɔt puk në karɛcke yiic, Yɛn cïï kë cä lueel an luɔi bï looi.

⁹ Ku na cä lueel, nɔn kaar Yɛn bä jur ku nɔn ee ciɛɛŋ com ku yiëk,

¹⁰ ku na lɔ ee jurë ya kɛ̈n riëëu ku looi kërac, Yɛn cïï kë cä lueel an luɔi bï looi.

¹¹ Ka ënɔɔnë lɛ̈kë kɔc ke Juda ku kɔc ke Jeruthalem, nɔn luöi Yɛn keek kiɛɛr rac, ku cä rɔt kiëët bä ke luöi këtuc. lɛ̈kë keek bïk rëër de rɛ̈ɛ̈c pɔ̈l, ku bïk kuɛɛrken waar ku bïk ka loikï keek pɔ̈l.

¹² Ku abïk bɛ̈ɛ̈r an, “Ei, eeŋö duëër wok ke pɔ̈l? Wok bï nïïm riɛl wodhie ku loiku karɛc cït kë kɔɔrku.’”

Kɔc Areeckï Bɛ̈nydït

¹³ Aye Bɛ̈nydït lueel an, “Luɔpkï juöör ëbɛ̈n na cï kë cït ee kënë kɔn tuöl. Kɔc ke Yithriɛl acïk kërac aläl looi!

¹⁴ Kur ke Lebanɔn cïk kɔn tɔ̈u ke ke cïn deŋ kɔi? Cï nyïïn ke kuurdɛn kɔn riɛl?

¹⁵ Ku kɔckï acïk nïïm määr ë yɛn, ayek wal ŋïr nyuöp yiëth. Acïk kɔ̈th në kueerdɛn duëër kek lɔ thïn, acïkï kuɛɛrkɛn thɛɛr be kuany yiic, aciɛthkï ë kueer kënë kuaar yic.

¹⁶ Acïk ee pinyë tɔ ee këde riɔ̈ɔ̈c, bï biɔɔn guöp aɣet athɛɛr. Kɔc ee tɛ̈ɛ̈k eenë kedhie ayek gäi në kë cïk tïŋ, ayek kenïïm bet në gäidït.

¹⁷ Yɛn bï kɔckï thiɔ̈i në kɔc ke aterden nïïm, cït man de abuui cï yom de aköl amiäk kuɔɔth wei. Yɛn bï ya kɔ̈u wël keek, acä ke bï luök të le riääk bɛ̈n.”

Kiɛɛr Rɛɛc Luiyë Jeremia

¹⁸ Go kɔc jɔ lueel an, “Loiku këdäŋ në biäk de Jeremia! Wok bï nïïm aa dɛ bäny de kake Nhialic bï wook aa wɛ̈ɛ̈t, kɔc pel nïïm bï wook aa wɛ̈ɛ̈t, ku tït bï wook aa lɛ̈k jam de Nhialic. Lok ciëku thok, ke wo bï kɔ̈ɔ̈c në pïŋ piŋ wok ka ye lueel.”

¹⁹ Aguɔ jɔ lɔ̈ŋ an, “Bɛ̈nydït piŋ kë luɛɛl, ku piŋ kë lueel ë kɔc de aterdï në biäkdï.

²⁰ Ee kërac yen këpiɛth cool? Ku ënɔɔnë acïk ya wɛ̈c pul bän lööny thïn. Tak yïnɔm ë kööl wään bän bɛ̈n tëde yïn ku jaam ë biäkden, ago ke cïï bï luööi në agöth.

²¹ Ku ënɔɔnë Bɛ̈nydït, tɔ mïthken thou në cɔk, tɔ keek näk në abätäu. Tɔ diäär tɔ cïn nïïm röör ku mïth, tɔ röör thou në jɔk, ku tɔ dhuök näk ë tɔŋic.

²² Tɔ kɔc bɔ̈ bïk ɣöötken bɛ̈n yakiic ke cïn lëk, tɔ keek dhiau në riɔ̈ɔ̈c. Acïk ya wɛ̈c pul bän lööny thïn, ku acïk wïn ë dɛ̈p dɛɛp bïï kek ya dɔm.

²³ Ku Bɛ̈nydït, Yïn ŋic kiɛɛrdɛn kɔɔr kek bïk a nɔ̈k. Du ke pɛ̈l awänyden, ku du kërɛɛcden päl. Wiɛtë keek piny në tiëm cïn ke tiaam, ku luööiyë keek ke yï cï göth.”