Jeremia 11 - JAM DE NHIALIC 2011

Jeremia ku Löŋ cï Mac

¹ Go ë Bɛ̈nydït lɛ̈k ɛn an,

² “Piŋ cök ke löŋ cï mac. lɛ̈kë kɔc ke Juda ku kɔc ke Jeruthalem

³ an, “Yɛn Bɛ̈nydït Nhialic de Yithriɛl, Yɛn cï raan ëbɛ̈n cieen raan cïï cök ee löŋë bï riëëu.

⁴ Ee löŋ wään bä mac wo kuarken, wään bɛ̈ɛ̈i Yɛn keek bei ë Rip, piny wään cït many ë wëëth dɛ̈p tëde keek. Acä lɛ̈k keek bïk Yɛn riëëu ku loikï këriëëc cä lëk keek ëbɛ̈n. Acä lëk keek, na lek Yɛn riëëu, abïk aa kɔckï, ku Yɛn bï aa Nhialicden.

⁵ Ku ëtɛ̈ɛ̈n Yɛn bï gutguut jɔ döt, gutguut cä lɛ̈k kuarken nɔn bän keek gäm piny ee wat ë ca ku miök ë kiëc, piny tɔ̈u tëde keek ënɔɔnë.” Aguɔ lueel an, “Ɣɛɛ, Bɛ̈nydït.”

⁶ Na wën, go ë Bɛ̈nydït lɛ̈k ɛn an, “Lɔɔr ë pɛ̈ɛ̈nydït ke Juda yiic ku kuɛɛr ke Jeruthalem yiic. Luel jamdï ëtɛ̈ɛ̈n, ku lɛ̈kë kɔc bïk cök ke löŋ cï mac piŋ ku bïk keek riëëu.

⁷ Wään bɛ̈ɛ̈i Yɛn kuarken bei ë Rip, Acä keek yɔ̈ɔ̈k arëët bïk Yɛn riëëu, ku Aya ŋoot ke ke yɔ̈ɔ̈k agut cï ee köölë.

⁸ Ku akënkï piŋ ku akënkï Ya riëëu. Ŋɛk acï bɛ̈n ŋoot ke ril nɔm cï mandɛn wään. Ku Acä ke yɔ̈ɔ̈k bïk lööŋkï döt, ku acïk jaai. Aguɔ keek yiɛ̈n katuc cï lueel ë löŋic.”

⁹ Na wën, go ë Bɛ̈nydït lɛ̈k ɛn an, “Kɔc ke Juda ku kɔc ke Jeruthalem aluikï yɛn kiɛɛr rac.

¹⁰ Acïk lɔ ciëën ë karɛc ke kuarken yiic, kɔc wään reec luɔi de kë cä lueel, acïk yiëth kɔ̈k lam. Baai de Yithriɛl ku baai de Juda acïk löŋ cä mac wo kuarken dhoŋ kɔ̈u kedhie.

¹¹ Ka ënɔɔnë, Yɛn Bɛ̈nydït, Ayɔ̈ɔ̈k keek nɔn bän riääk yiɛ̈n keek, ku acïkï bï ban. Ku të le kek lɔ dhiau, ke ke kɔɔr kuɔɔny tëde Yɛn, Yɛn cïï dhiënden bï piŋ.

¹² Ëtɛ̈ɛ̈n kɔc ke Juda ku kɔc ke Jeruthalem abïk jɔ lɔ tëde yiëth yek nyuöp wal ŋïr, ku abïk jɔ dhiau ke ke kɔɔr kuɔɔny tëde keek. Ku acïï yiëthkë keek bï kony të le ë riääk bɛ̈n.

¹³ Kɔc ke Juda adekï nïïm yiëth juëc cït kuën de pɛ̈ɛ̈nydïtken, ku kɔc ceŋ Jeruthalem acïk röt yiëk yïk juëc cït kuën ke kuɛɛr ke pänydït, yïk ye Baal nyuöp wal ŋïr.

¹⁴ Ka yïn Jeremia, du läŋ ë biäk ee kɔckë, ku du ya läŋ ë biäkden. Të le kek nuan lɔ yök ku cɔlkï Yɛn bä ke kony, Yɛn cïï bï piŋ.”

¹⁵ Aye Bɛ̈nydït lueel an, “Kɔckiën nhiaar aloikï karɛc. Ee yic ŋö nu tëde keek bï kek rëër ë ɣöndiën ë Bɛ̈nydït yic? Yek tak bïk riääk pëën, në luɔi ye kek gutguut lueel, ku në gɛm ye kek miɔ̈c näk de läi gam? Bï ee kënë keek tɔ mit piɔ̈ɔ̈th?

¹⁶ Wään aaye keek cɔl tïm de olip de yïth, thiäŋ ke mïth läk, ku ënɔɔnë, Yɛn bï yïthke ɣɔ̈k mac në awuɔɔu cït amaŋ ku dhuɔŋ kërke.

¹⁷ “Yɛn Bɛ̈nydït de rɛm, Yɛn cï baai de Yithriɛl com kekë baai de Juda, ku ënɔɔnë acä lëk keek nɔn bän ke yiɛ̈n riääk. Acïk ee kënë bɛ̈ɛ̈i ë kegup ë biäk cï kek awäc looi, acïk Yɛn tɔ göth në baŋ cï kek Baal nyuöp wal ŋïr.”

Kiɛɛr Rɛɛc Luiyë Jeremia

¹⁸ Bɛ̈nydït acï a lɛ̈k në biäk de kiɛɛr rɛɛc luiyë kɔc ke aterdï yɛn.

¹⁹ Yɛn aa cït nyɔɔŋ amääl le nɔ̈k biic, ku aa cä ŋic nɔn yen yɛn ë luiyë ee kiɛɛr rɛɛcë. Aa yek lueel an, “Yepku tim piny të ŋoot en ke tiɔp, lok nɛ̈kku ke cïn raan bï yen bɛ tak taitai.”

²⁰ Na wën ke ya läŋ an, “Bɛ̈nydït de rɛm, Yïn ee Raan ee löŋ guiir në yic, Yïn ee täŋ de kɔc them ku them kë yek thɔ̈ɔ̈ŋ. Yɛn cï göönydï tääu ë yïcin, ka Yïn kaar bä Yïn tïŋ ke yï guur yɛn në ee kɔckë.”

²¹ Kɔc ke Anathoth akɔɔrkï thondï, ku acïk lɛ̈k yɛn an bïk yɛn nɔ̈k të lan ŋoot ke ya lueel jam de Bɛ̈nydït.

²² Ago Bɛ̈nydït de rɛm lueel an, “Abä keek luöi këtuc! Dhuökken abïï keek nɔ̈k në abätäu, mïthken abïk thou në cɔk.

²³ Yɛn cï akööl bän ke riääk yiɛ̈n kɔc ke Anathoth mac, ku të lee aköölkë bɛ̈n, acïn raan bï pïïr ë keyiic.”