Ɣodh 9 - JAM DE NHIALIC 2011

Ɣodhiya Acɛɛl Luɔi bïï ë Yithriɛl Luöi Këtuc

¹ Wek kɔc ke Yithriɛl, duökï dhuëëŋ loi cï juöör kën gam. Wek kën kake Nhialicdun döt, wek nhiaar ariöp de akɔɔrröör cït man ya wek en tak nɔn yen yiëth kek ee week gäm jööŋ ke rap!

² Yiukuön ke rap abïk yiic ciën rap, ku töönykuön ke mäu abïk yiic ciën mäu.

³ Kɔc ke Yithriɛl acïkï bï bɛ rëër piny de Bɛ̈nydït, kɔc ke Eparaim abïk kenïïm puɔ̈k në lïïmic cït man ɣɔn kɔn kek tɔ̈u paan ë Rip. Ka abïk aa lɔ cam në këcam nhiany piny de Athiriya.

⁴ Acïkï miɔ̈c de mɔ̈u bï bɛ aa gäm Bɛ̈nydït. Ku nɔn gɛmkï miɔ̈cdɛn ye nyop ëbɛ̈n acïï Bɛ̈nydït bï bɛ aa miët piɔ̈u. Miɔ̈cdɛn yek gamë, abï ciët këcam de dhiëëu. Ku raan ëbɛ̈n raan lɔ yen cam, abï ye tɔ rac guöp. Abïk këcamden aa cam në biäk de cɔŋden yetök. Acïkï bï aa bɛ̈ɛ̈i Luaŋdït ke ye miɔ̈c.

⁵ Ka bäk ŋö jɔ looi në akööl ke dhuëŋ ke Bɛ̈nydït cï lɔ̈c week?

⁶ Tiëŋkï keek alekkï Athiriya. Na cakkï poth në riääk thok, abïï Rip keek määt yiic, ku tɔ̈ɔ̈u keek në Mempeth! Atekken abï keek peec, ku pɛɛnykɛn ɣɔn cïk kɔn ceŋ yiic, abïk yiic cil në thil ku kuɔɔth.

⁷ Akööl ke këtuc abïkï, akööl ke kuɛ̈n acïk thiɔ̈k. Takï ŋic ë Yithriɛl yen ee kënë. Në luɔi cï awɛ̈ɛ̈ckun juëc arëët, ku cï wëlkun kenyïïn ŋuak aläl. Wek ee tiët tɔ ye dhɔ̈n, ku takï raan thiäŋ ke wëi tɔ ye raan cï miɔ̈l.

⁸ Nhialic kekë tiëtde kek atit Yithriɛl. Ku wïïn ke dɛ̈p juëc aŋootkï ke ke thiäŋ kuɛɛr ke Yithriɛl yiic, ku wël anukï ɣön ë Nhialic.

⁹ Acïk cur arëët në luɔi de karɛc yiic, cït man ɣɔn kɔn kek cur në akööl ke Gibia. Nhialic acïï nɔm bï määr në karɛcken. Abï keek luöi këtuc në biäk de awɛ̈ɛ̈cken.

Awäny de Yithriɛl ku Ariöpde

¹⁰ Aye Bɛ̈nydït lueel an, “Ɣɔn tueŋ yök Ɛn Yithriɛl, Yɛn ë bɛ̈n ciët kë ë yök mïth ke enap në jɔ̈ɔ̈ric. Na wën, aa tïŋ kuarkun, Yɛn ëbɛ̈n ciët kë ë tïŋ mïth ke ŋaap cï buɔ̈ny. Na ɣɔn aa lek ɣëët Baal Peyor, acïk röt bɛ̈n gäm yanh rac guöp, ago keek kum nyïïn cït man ë yen.

¹¹ Dhuëëŋ de Yithriɛl abï dap jäl ëthiäu cït man ë din pär. Ku acïn tiiŋdɛn bï meth bɛ yök, ku cïn tiiŋ be liac, ku cïn tiiŋ be dhiëth.

¹² Na cakkï mïth muk apiɛth, mïthken abä keek nɔ̈k kedhie. Amawoou në Eparaim të lan ke nyääŋ piny.

¹³ Eparaim acä tïŋ, acï lɔ̈ŋ cït man ɣɔn kɔn Tayer tɔ̈u, ku abïk mïthken gäm kɔc näk keek ee nïnkë.

¹⁴ Go Ɣodhiya bɛ̈ɛ̈r an, “Luöiyë keek kë kɔɔr bä luöi keek, Bɛ̈nydït. Gämë keek amadhiëth cïï meth duëër muk, ku thin cïn yiic ca.

Bɛ̈nydït Alui Yithriɛl Këtuc

¹⁵ Aye Bɛ̈nydït lueel an, “Acä keek maan në biäk de awɛ̈ɛ̈ckɛn cïk wööc kedhie në Gilgal. Acä keek bï bɛ nhiaar. Abä keek cuɔp wei ɣöndï, në biäk de karɛckɛn cïk looi. Bänyken acïk wöc në Yɛn kedhie.

¹⁶ Eparaim acït tim cïï kɔ̈m meike cam ka yë biɔɔr. Acïï duëër bɛ luɔk në mïth. Ku na ë ke cak mïth dhiëëth, mïthkɛn nhiaarkï abä keek nɔ̈k kedhie.

Tiët ë Nhialic Ajam në biäk de Yithriɛl

¹⁷ Go Ɣodhiya lueel an, “Abï Nhialicdï keek rɛɛc, në baŋ kën kek En piŋ thok. Abïk riäu baaŋ në juöör yiic ëbɛ̈n.