Ɣeberuu 4 - JAM DE NHIALIC 2011

Lɔ̈ŋ de Kööl ë Dhorou cï Nhialic Thɔ̈n Kɔcke

¹ Ye ka, cït man ŋoot ë Nhialic ke cöl wook lɔ̈ŋ aɣet cï ënɔɔnë, jɔku röt tiit ke bï ciën kɔc bï döŋ ke ke cïï lɔ në ee lɔ̈ŋë yic.

² Ku cït man cï wëlpiɛth ɣëët tëde wook, yen acï kek lɔ tëde keek ayadäŋ. Ku acïn këpiɛth cïk yök në löŋic, në luɔi cï kek e piŋ ku kënkï loor nɔm në gäm.

³ Ee wok kɔc cï gam wapäc wok abï lɔ lɔ̈ŋ, cït man cï këcïgɔ̈ɔ̈r e lueel an, “Nhialic ë piɔ̈u diu, go kuëŋ yöök kɔc reec gäm an, ‘Wek cï bï mɛt në lɔ̈ŋdï yic taitai.’” Ku yen ee lɔ̈ŋë, aa nu kë cïï Nhialic kiëët të ɣɔn cï Yen piny thöl nɔm në cäk.

⁴ Ku kë cï këcïgɔ̈ɔ̈r e lueel kï në këde kööl ë dhorou an, “Nhialic acï lɔ̈ŋ në kööl ë dhorou në luɔide yic ëbɛ̈n.”

⁵ Ku yen ee jamë acï nyɔk në luɛɛl an, “Acïkï bï lɔ në lɔ̈ŋdï yic taitai.”

⁶ Yen tëde ka, kɔc kɔ̈k abïk lɔ në lɔ̈ŋic. Ku kɔc ɣɔn ë kɔnë guiëër wëlpiɛth, akënkï bɛ̈n lɔ në lɔ̈ŋic, në biäk ë kën kek gam.

⁷ Na ɣɔn acï run juëc tëëk, ke be ë Nhialic lɛ̈k Debid në luɔi bï Yen ŋoot ke cöt an, “Të piɛŋ wek röl ë Nhialic ee köölë, ke we duökï wenïïm tɔ ril.”

⁸ Ku na ë Jocua ë cï kɔc tɔ lɔ̈ŋ në lɔ̈ŋ ë cïï Nhialic lueel, adï kën Nhialic bɛ jam në këde kööl ë lɔ̈ŋë.

⁹ Nhialic akɔɔr wook, wok kɔcke buk lɔ̈ŋ në Yen ëtök cït lɔ̈ŋde në kööl ë Thabath ɣɔn thöl En piny ë cäk.

¹⁰ Raan ëbɛ̈n, raan lɔ në ee lɔ̈ŋë yic, abï lɔ̈ŋ në luɔide yic ëbɛ̈n cït man ë cïï Nhialic lɔ̈ŋ në luɔide yic.

¹¹ Riitku röt piny apiɛth ke wo bï lɔ në ee lɔ̈ŋë yic, ke bï ciën raan bï ee lɔ̈ŋë dääk në woyiic cït man ë kek.

¹² Jam ë Nhialic apïïr ku acath ke riɛldït yen kɔc cuur gup, ee raan gutic arëk abï ɣet të ye wëi kekë pïïr tɔ̈u, ku lɔ miök ku të ye kur ke yom nyïïn rɔ̈m, awär abätäu moth thok ëbɛ̈n, abätäu athok rou, ku ye ka kɔɔrku, ku ka yok tak ëbɛ̈n woi yiic në wopiɔ̈ɔ̈th.

¹³ Acïn kë kuöm nɔm në Nhialic nyin, awoi këriëëc ëbɛ̈n, yen ye wok En lɛ̈k yic, në luɔi ee Yen Raan bï wook luɔp.

Yecu ee Bɛ̈nydïït Tueŋ ë kake Nhialic

¹⁴ Wok de nïïm gök de Bɛ̈nydïït ë kake Nhialic, Bɛ̈ny cï lɔ paannhial, ee yen Yecu Wën ë Nhialic. Yen kë duɛ̈ɛ̈r wok kɔ̈ɔ̈c ka aril në gämda yic, gäm cuk lueel në biäkde.

¹⁵ Yecu, Bɛ̈nydan dïït ë kake Nhialic, aŋic täu de kɔ̈c kɔ̈c wok, në baŋ ɣɔn cï Ye kɔn them në thëm kithic cït man ye wo cool ë themë wook, ku Yen akën kërac kɔn looi!

¹⁶ Yen dɔm wok aŋäth ku cutku röt të nu Yecu në thööny de Nhialic lɔ̈ɔ̈m, ke wo bï kuɔɔny de kok de piɔ̈u kekë dhuëëŋ de piɔ̈u yök në aköölkë yic.