Galatai 6 - JAM DE NHIALIC 2011

Ŋɛk ë Ye Ŋɛk Kony

¹ Wek mïthëkɔckuɔ, na de raan cï cäk dɔm në kërɛɛc cï looi, ke wek kɔc ke wëi, jakï raan cït ee kënë dak kueer, në kuur aa wek röt kuɔɔr piny, ye yïpiɔ̈u woi, ke yï cïï bï them aya.

² Ë ŋɛk ë ye ŋɛk kony në kë nuan en, yen abä wek löŋ de Kërtho aa tiiŋic.

³ Ku të de en raan ë rɔt tɔ ye raan de naamde, ku acïn naamde, ka mɛth rɔt tei.

⁴ Raan ëbɛ̈n ë ŋɛk ë ye luɔide yenguöp thɔ̈ɔ̈ŋ ë yepiɔ̈u, yen abï en dɛ të bï en rɔt leec në këde yen etök, ku acie në këde raan däŋ.

⁵ Raan ëbɛ̈n ŋɛk abï thiëëc ë këde luɔide.

⁶ Ku raan ë wëëtë në wël ë ye kake rɔ̈ɔ̈m kekë raan ë wëët en ëtök, kakɛn piɛth ëbɛ̈n.

⁷ Duökï röt tɔ mɛthë, Nhialic acie dɔl guöp: të de yen kë com raan, ke yen abï tem aya.

⁸ Raan ee com në këde guöpde, ka bï këde guöp tem, en aye dhiap de käŋ, ku raan ee com në këde Wëi, abï këde Wëi tem, yen aye pïïr athɛɛr.

⁹ Ku duku wopiɔ̈ɔ̈th tɔ bäp në luɔi de këpiɛth: wo bï tem ëkööl piɛth ë tëm, të kën wok bäp.

¹⁰ Yen ee wo kɔc jɔ luööi apiɛth kedhie, ë akööl bï rɔt yök, ku kɔckuɔn cï wok gam ëtök kek abuk ke ya luööi apiɛth arëëtdïïtë.

Yöök Ciëën Ku Thiëc

¹¹ Wɔikï gäär gäär ɛn week ë yacin, dït dïït en nyin.

¹² Kɔc ëbɛ̈n kɔc kɔɔr luɔi bï ë ke ŋic an yek kɔc piɛth ë guöpic, kek adhil week tɔ cuel, ee luɔi cïï ë ke bï yɔŋ tei në biäk de tim cï rïïu nɔm tim de Kërtho.

¹³ Acakaa keek gup kek kɔc cï cueel, acïkï löŋ ee döt apiɛth ayadäŋ, akɔɔrkï luɔi bï ë we cueel, ke ke bï röt aa leec ë guöpdunic.

¹⁴ Ku yɛn, lɛc bän rɔt leec aliu ëtaiwei, ee këde tim cï rïïu nɔm etök, tim de Bɛ̈nydan Yecu Kërtho, raan cï ka ke piny nɔm tɔ piëëtë ëtim kɔ̈u tëde yɛn, ku piëëtë ya ë tim kɔ̈u tëde ka ke piny nɔm.

¹⁵ Ku cuɛ̈l ayï luɔi kënë raan cueel, acïnkï naamden ë Yecu Kërtho yic, ee raan cï piac cak, yetök.

¹⁶ Ku kɔc kedhie, kɔc ee mat ë cöökë, ë mät ë ye tɔ̈u ke keek ayï kokdepiɔ̈u, ku ë ke tɔ̈u në Yithriɛl de Nhialic!

¹⁷ Gɔl ee köölë, në cïn raan ë ya jut: yɛn cath wo piär ke Bɛ̈nydït Yecu cï gɔ̈ɔ̈r ë yaguöp.

¹⁸ Ë dhuëëŋ de Bɛ̈nydan Yecu Kërtho piɔ̈u ë ye tɔ̈u ke wëikun, wek mïthëkɔckuɔ. Amiin.