Galatai 4 - JAM DE NHIALIC 2011

¹ Ku aluɛɛl ënɔɔnë an, “Raan bï ka ke wun lɔ̈ɔ̈k lak, të ŋoot en ke ye meth, ka cïn pɔ̈k bï ye pääk kekë lïm, acakaa yen ë ye bɛ̈ny nu ë käŋ nïïm kedhie,

² ku ye rëër ë kɔc cök kɔc ë ye muk ku kɔc cï tääu ë dhiën nɔm, aɣet kööl bïï wun lueel.

³ Yen acït wook aya, ɣɔn ee wok mïth, wo cï tɔ ye lïm buk aa tɔ̈u ë ka ke piny nɔm cök.

⁴ Na wën, aacï run thök, ke Nhialic toc Wënde, bï dhiëëth ë tik, ku dhiëth ë löŋic,

⁵ luɔi bï en kɔc nu ë löŋic wɛ̈ɛ̈r bei, ago wo tɔ muk abuk aa wɛ̈ɛ̈tke.

⁶ Ku luɔi aa wek wɛ̈ɛ̈tke, ke Nhialic jɔ Wëi ke Wënde tuɔɔc ë wepiɔ̈ɔ̈th, ke ke cöt an, “Abba, Wäär.”

⁷ Yen ka, yïn cïï be ŋoot ke yï ye lïm, yïn ee wënde, ku tën ee yïn wënde, ke yïn ee wën bï ka ke Nhialic lɔ̈ɔ̈k lak në Kërtho.

Diɛɛr de Paulo në Galatai

⁸ Ku wään kuöc wek Nhialic, wek aaye lïïm ke yiëthkun yiëth cie Nhialic në ciɛɛŋdɛn ë ciɛkë keek.

⁹ Ku ënɔɔnë, nɔn cä wek Nhialic ŋic, ku aŋuän luɔi lueel wok en an, we cïï Nhialic ŋic, eeŋö bɛ wek röt pɔ̈k ka cïn naamden, ka cïn riɛl ku kuanykï nyïïn, ku dɛkï piɔ̈ɔ̈th luɔi bä wek röt bɛ tɔ ye lïïmken raanrou?

¹⁰ Wek ee akööl theek, ayï pɛ̈i, ayï të cït nɔn ë rut ku ruël, ayï run, ayak ke theek.

¹¹ Yɛn ë riɔ̈ɔ̈c ë këdun, akuöc nɔn ee yen ɣɔ̈ric yen näŋ cän rɔt näk piny ë luɔi në biäkdun.

¹² Wek mïthëkɔckuɔ, wek läŋ an, yak tɔ̈u cït man ë yɛn. Ku yɛn aya, yɛn ee tɔ̈u cït man ë wek. Acïn kë cäk wäc a.

¹³ Ku aŋiɛckï nɔn cän wëlpiɛth kɔn guiëër week në kɔ̈c kääc ɛn guöp.

¹⁴ Ku thëm cï a them ë guöpdï yic akɛ̈nkï biɔɔn, ku we kën a koon, we cï a riëëu cït tuny de Nhialic ku ciët Kërtho Yecu guöp.

¹⁵ Athiɛɛiduön wään cï guɔ lɔ nou? Yɛn ee cäätɔdun ë cöökë an, tëë cäk lëu ë luɔi, adï cäk wenyïïn tuök bei, yiɛ̈nkï keek yɛn.

¹⁶ Cä rɔt tɔ ye raan de ater ke week, nɔn cän week lɛ̈k yic?

¹⁷ Kɔ̈ɔ̈r ee kek cök ë kɔɔr kek week acïï piɛth, ee luɔi bï kek we guöör biic, en anu ë kepiɔ̈ɔ̈th, ke ke bäk cök ë kaar wek keek.

¹⁸ Ku apiɛth nɔn bä wek aa cök ë kaar wek këpiɛth ë aköölnyïïn kedhie, ku acie të nuö yɛn ë weyiic tei.

¹⁹ Wek mïthkiën thiikë, yɛn ë bɛ rɔ̈ɔ̈p ë dhiënhdun, aɣet të bï Kërtho cuëëc ë weyiic.

²⁰ Yeka, yɛn duëër piɔ̈u miɛt të nuö yɛn wo week ënɔɔnë, aguɔ a röl puk, luɔi cɔ̈m ɛn piɔ̈u ë këdun.

Kääŋ de Ɣagar kekë Thara

²¹ Lɛ̈kkï yɛn, wek kɔc kɔɔr rëër ë löŋic, cäkï këde löŋ ee piŋ?

²² Luɔi cï e gɔ̈ɔ̈r an, Abraɣam aa de wɛ̈ɛ̈tke kaarou, tök aa dhiëëth ë nyan lïm, ku dhiëth tök ë nyan lääu nɔm.

²³ Ku wën ë nyan lïm aa dhiëëth ë këde guöp tei, ku wën ë nyan lääu nɔm aa dhiëth ë kë cï kɔn lueel.

²⁴ Kake ayek kääŋ: diëërke ayek lööŋ kaarou lööŋ cï mac, tök a bɔ̈ ë kuur ë Thinai, ku ye mïth dhiëëth ke ke ye lïïm, en aye Ɣagar.

²⁵ Ku Ɣagarë en aye kuur ë Thinai nu paan de Arab, ku athööŋ ke Jeruthalem nu ënɔɔnë: ka ye tɔ̈u ke ye lïm kekë mïthke.

²⁶ Ku Jeruthalem nu nhial alääu nɔm, yen aye maada wodhie.

²⁷ Luɔi cï e gɔ̈ɔ̈r an, “Mit piɔ̈u, yïn tiiŋ rol, tiiŋ cie dhiëth! Ɣɔ̈ɔ̈rë yïröl piny, cöt arëët, yïn tiiŋ cie rɔ̈ɔ̈p! Mïth ke tiiŋ thuööm awärkï mïth ke tiiŋ de monyde aläl.”

²⁸ Ku wook, mïthëkɔckuɔ, wok cït Yithaak, wok ee mïth ke kë cï kɔn lueel.

²⁹ Ku acït man ɣɔn ë mɛnh cï dhiëëth ë këde guöp ee yen mɛnh cï dhiëëth ë këde Wëi yɔŋ, yen anu yen ënɔɔnë aya.

³⁰ Ku këcïgɔ̈ɔ̈r ee lueel adï? An, “Ciec nyan lïm kekë wënde: wën ë nyan lïm acïï ka ke wun bï lɔ̈ɔ̈k lak kekë wën ë nyan lääu nɔm.”

³¹ Yen tëde ka, wo cie mïth ke nyan lïm, wok ee mïth ke nyan lääu nɔm.