Ɣagai 1 - JAM DE NHIALIC 2011

Bɛ̈nydït Ayöök Kɔc Bïk Luaŋdït bɛ Yïk

¹ Jam de Bɛ̈nydït kï, jam ɣɔn lëk Dherubabel wën de Caltiɛl, bɛ̈ny de Juda, kekë Jocua wën ë Jeɣodhadak, bɛ̈nydïït ë kake Nhialic në röl ë tiët Ɣagai, ɣɔn cïï Dariouth run aa rou ku pɛ̈i kadhetem ku kööl tök ke ye melik de Perthia.

² Aa lëk ë Bɛ̈nydït de rɛm Ɣagai an, “Aye kɔckë lueel an akööl aŋootkï wei, akööl bï wok Luaŋdït nyɔk ë yïk.

³ Na wën, ke lëk ë Bɛ̈nydït keek në röl ë tiët Ɣagai an:

⁴ “Kɔckï, eeŋö tɔ we rɛ̈ɛ̈r në ɣöötkuön piɛth yiic, ku pälkï ɣöndï ke dhɔt piny ke cï riääk?

⁵ Aye Bɛ̈nydït de rɛm lueel an, Cäkï kë bï rɔt pɔ̈k week ee tïŋ?

⁶ Wek ee ka juëc com, na miäk ke we tem ka lik. Wek de nïïm kacamkï, ku acïkï week ee kueth. Wek de nïïm mɔ̈n yak dek, ku acïkï week ee kueth! Wek de nïïm lupɔɔ ke kum, ku acïkï week ee tɔ tuc gup. Ku raan ee luui acïï ariöpde ee lëu.

⁷ Aye Bɛ̈nydït de rɛm lueel an, Kɛ̈nkï cät eeŋö tɔ kakun tɔ̈u aya?

⁸ Ku ënɔɔnë, lakï ë kur nïïm, lak bɛ̈ɛ̈ikï tiim, bä wek Luaŋdït bɛ̈n nyɔk në yïk. Ke Ya bï piɔ̈u miɛt, ku be ë Yɛn aa lam cït mandï.

⁹ Aye Bɛ̈nydït de rɛm lueel an, “Wek ee ka juëc kɔɔr, ku ee ka lik kek yak lɔ yök. Na ë lë adhɛ̈ɛ̈thkï ke baai, ke ke tɛŋ wei. Eeŋö yan ee kënë looi aya? Ee luɔi cä wek ɣöndï puɔ̈l adhɔt piny ke cï riääk, ku wek lui në kake yiëthkun, ŋɛk aloi ɣönde.

¹⁰ Yen kë cïï deŋ ee tuɛny ka, ku cïn kë be luɔk.

¹¹ Yɛn ë piny tɔ yaak, ayï kur nïïm, ku rɛɛpke, ku duumkuön ke enap, ku duum ke tiim ke olip. Këriëëc nyin ëbɛ̈n, kë ee cil piny, acä tɔ yal, ayï kɔc, ayï ɣɔ̈k, ayï thök.

Kɔc Agamkï Jam de Bɛ̈nydït

¹² Ku ëtɛ̈ɛ̈n, Dherubabel wën de Caltiɛl kekë Jocua wën de Jeɣodhadak, bɛ̈nydïït ë kake Nhialic, ku kɔc ɣɔn bɔ̈ në pɛ̈cic kedhie, acïk jam ë Bɛ̈nydït Nhialicden bɛ̈n gam, ku gamkï jam ë tiët Ɣagai tuny ë Bɛ̈nydït, cït man cïï Bɛ̈nydït ye tooc. Ago kɔc jɔ aa riɔ̈ɔ̈c në Bɛ̈nydït.

¹³ Na wën, ke Ɣagai tuny guïïr kɔc jam ë Bɛ̈nydït, lëk keek an, “Acï Bɛ̈nydït lueel an Yɛn bï tɔ̈u wo week.

¹⁴ Ku jam Wëi në kɔc piɔ̈ɔ̈th kedhie, në yïŋ de Luaŋdït: yï Dherubabel wën de Caltiɛl bɛ̈ny de Juda, kekë Jocua bɛ̈nydïït ë kake Nhialic, ku kɔc lik cï döŋ, ɣɔn bɔ̈ ciëën në pɛ̈cic kedhie. Gokï Luaŋdïït de Bɛ̈nydït de rɛm, Nhialicden gɔl ë yïk.

¹⁵ Aake gɔl yïk në kööl ye pɛ̈i de dhetem thok thiërrou ku ŋuan, në ruöön ye melik Dariouth run rou në bääny yic.