Edhr 9 - JAM DE NHIALIC 2011

Edhera Apiŋ Luɔi cïï Judai Thiëëk ë Juöör

¹ Na wën acï kakë thök ë luɔi kedhie, ke bäny ke kɔc ke Yithriɛl bɔ̈ tëde yɛn ku luelkï nɔn cï ë kɔc ke Yithriɛl, ku bänykɛn ke kake Nhialic, ku Lebai akënkï röt mɛc wei në juöör cieŋ ë pinyë në karɛc yek looi, cït man tɔ̈u ë jur cɔl Kanaan ku Ɣit ku Peridh ku Jebuth ku Amon ku Mowap ku Rip ku lɔ Amor.

² Röör kɔ̈k ke Yithriɛl acïk wɛ̈ɛ̈tken thiëk duet ke juöör cie Judai, ago kɔc ke Nhialic cï tɔ ɣeriic jɔ liääp në juöör cieŋ ee pinyë, ku bäny, ku bäny lɔ në kecök kek aa wat kɔc ë ciën adöt.

³ Na wën aa piɛŋ ee kënë, guɔ lupɔɔkï rɛtiic ë yakɔ̈u në dhiën ë piɔ̈u, ku nyuän nhïm bei në yanɔm ku yathok, ku nyuööc piny ke ya cï ŋɛɛr ku ja thuc.

⁴ Wën ŋuɔɔt ɛn ke ya tɔ̈u piny në dhiënëpiɔ̈uwic, go kɔc kɔ̈k kenïïm kut në yalɔ̈ɔ̈m, kɔc cï riɔ̈ɔ̈c në kë cïï Nhialic lueel në biäk de ciën adön de kɔc ë bɔ̈ ciëën në pɛ̈cic, ku rɛ̈ɛ̈r ke ya thuc aɣet cï thaar de gɛm de miɔ̈c athɛ̈i.

⁵ Na jɔ thaar ë miɔ̈c athɛ̈i bɛ̈n, ke ya jɔt rɔt të wën rɛɛc ɛn cäm, ku ŋuɔɔt ke ya cieŋ lupɔ wën cï rɛɛtë, guɔ yamiɔl tuk, läŋ, täär a cin Bɛ̈nydït Nhialicdï.

⁶ Ku luɛɛl an, “Nhialic, yɛn cï yäär ka yɛn cï guöp riɔ̈ɔ̈c arëët bä yanyin wɛ̈l Yïn, awɛ̈ɛ̈ckuɔ acïk thɔc ka cïk wo wöör nïïm, acïk ɣet abïk nhial cuööp.

⁷ Gɔl ɣɔn në akööl ke kuarkuɔ agut cï aköölkë, wok kɔcku, wok cï wäc arëët. Ku në biäk de awɛ̈ɛ̈ckuɔ, wok cï lööny në meliik ke juöör kɔ̈k cin, wodhie në Meliikkuɔ ku bänykuɔn ke kake Nhialic, wok aaye tɛm röt, ku rum wo, ku peec wook ke wo mac. Wok ye biɔn gup taitai, karɛckuɔ acïk wo nyäŋ ayär ŋoot aɣet cï ëköölë.

⁸ Ku ënɔɔnë Bɛ̈nydït Nhialicda në kaam thiinakäŋ, Yïn cï wo gäm nɔm lääu tëduön ɣeric, pɔ̈kë wonïïm rëër de miɛtëpiɔ̈ndan thɛɛr. Yïn cï piɔ̈u kok we wook, tɔ wo poth në luɔi adï cïï wok aa lïïm, Yïn ë wo gël apiɛth në rëërda.

⁹ Na ciɛk aa nɔn ye wok lïïmë, ke Nhialicda akën wook päl ëtɛ̈ɛ̈n, Yïn ë Meliik ke Perthia tɔ nyuth wo nhiëërduön agɔk, ku bïk ŋoot ke ke tɔ wook rɛ̈ɛ̈r në miɛtëpiɔ̈ndan thɛɛric, ku tɔkï wo be ɣönduön wään cï riääk nyɔk ë yïk, ku gëlkï wook ee tënë ë Jeruthalem ku Juda ëbɛ̈n.

¹⁰ “Ku ënɔɔnë, Yïn Nhialicda, eeŋö duëërku bɛ lueel të cïï kapiɛthkë röt luöi wook kedhie? Ku beku lööŋku nyɔk ë reec.

¹¹ Kek lööŋ ë gämë wook në kueer ë lïïmkuön ee tïït, aa luelkï an, Piny bäk lɔ nöömë acï wookic ë juöör ceŋ en, gɔl ë piny biäkë ale guööt ë piny biäk tui në luɔi de kërac ëbɛ̈n.

¹² Duökï röt bï ya thiëk në ee juöörkë ku cäkï ciɛɛŋden dɔmic, ku duökï kajuëcken kɔɔr taitai, ke we bï riɛl ku bäk kapiɛth ke ee pinyë cam ku bï mïthkun piny lɔ̈ɔ̈k lak aɣet athɛɛr.

¹³ Cak an cï kakë kedhie röt luöi wook, ke ye luɔi looiyë wonïïm në biäk de karɛckuɔ ku awɛ̈ɛ̈ckuɔ, ke Yïn Nhialicda, Yïn cï wo luöi këtuc thiin cïï nɔm duëër awɛ̈ɛ̈ckuɔ ku tɔ wo poth.

¹⁴ Ku ënɔɔnë, duëërku lööŋku bɛ nyɔk ë dhɔ̈t dhɔɔt wok ke yiic adï, man abuk röt bɛ ya thiëk në juöör ee karɛc looiyë? Ku ënɔn cï yen rɔt nyɔkë, ka agönhdu abï wo riɔ̈ɔ̈r nyïïn taitai ka cïn raan töŋ bï bɛ döŋ.

¹⁵ Yïn Bɛ̈nydït, Nhialic de Yithriɛl, Yïn adöt në kë cï lueel! Ku ënɔɔnë wokï, wok kɔc likkuön cï tɔ dɔ̈ŋ ke ke pïr, wok gam awɛ̈ɛ̈ckuɔ në Yïnɔm, wok cïn nïïm yic duëërë wo bɛ̈ɛ̈i në Yïlɔ̈ɔ̈m.”