Edhekiɛl 8 - JAM DE NHIALIC 2011

Nyuuth ë Rou cïï Nhialic gäm Edhekiɛl ( 8:1–10:22 ) Yiëth ë Jeruthalem

¹ Në kööl ë dhïc, në pɛɛi de dhetem në ruöön de dhetem, të wään cï ë wo peec, röördït ke dhiën ë Juda aake rɛ̈ɛ̈r në yɛn ë tök baaidï. Na wën ke riɛl de Bɛ̈nydït ë bɔ̈ në yaguöp ëthiäu.

² Guɔ të nhial lieec, aguɔ nyuuth cït guöp raan tïŋ. Gɔl në yekɔ̈u leer ë yeguöp acït mac, ku gɔl ë yekɔ̈u leer nhial ariau cï maläŋ cï coth kɔ̈u.

³ Go kë cït cin riɛny tueŋ, ku dɔm ɛn në nhïm ke yanɔm. Ku në ee nyuuthë yic, wëi ke Nhialic acïk a bɛ̈n gap nhial në yomic ku leerkï yɛn Jeruthalem. Leer ɛn kueer ee tëëk në kal thok biäk thïn de Luaŋdït, të lɔ rut, të tɔ̈u ë yanh ee Nhialic tɔ göth.

⁴ Aguɔ dhuëëŋ de Nhialic de Yithriɛl tïŋ ëtɛ̈ɛ̈n, cït man wään cän en kɔn tïŋ në kiir de Cebar yɔu.

⁵ Go ë Bɛ̈nydït lɛ̈k ɛn an, “Mɛnh ë raan, tïŋ biäk të lɔ rut.” Guɔ ee tɛ̈n tïŋ, aguɔ yanh ee Nhialic tɔ göth tïŋ, ë yïk lɔ̈ɔ̈m në kueer ee lɔ në kal thok.

⁶ Go Bɛ̈nydït lɛ̈k ɛn an, “Mɛnh ë raan, cï kë loi rɔt tïŋ? Tïŋ karɛc looi ë baai de Yithriɛl keek ee tënë, aceeckï yɛn të mec aläl kekë tëdiën ɣeric. Yïn bï kajuëc ke ayäär wär ee kakë tïŋ.”

⁷ Go ya yɛn lɛɛr në kueer lɔ biic në ë kal kɔ̈u, ku nyuth ɛn pul tɔ̈u në päny kɔ̈u.

⁸ Lueel an, “Mɛnh ë raan, tëëk ë päny kɔ̈u ee tënë.” Guɔ tëëk ë yekɔ̈u ku yäk thok.

⁹ Go lɛ̈k ɛn an, “Lɔ thïn ku tïŋ karɛc, karɛc loikï keek ëtɛ̈ɛ̈n.”

¹⁰ Guɔ lɔ thïn ku tiëŋ. Pɛ̈ɛ̈ny acïk kɔ̈ɔ̈th thiäŋ, në giɛɛt de karɛc ku lɔ kɔ̈k de acuɔl: ku jɔ aa yiëth kɔ̈k ye baai de Yithriɛl ke lam.

¹¹ Röördït ke baai de Yithriɛl kathiërdhorou, aake tɔ̈u ëtɛ̈ɛ̈n, ade yic Jadharia wën de Capan. Raan ëbɛ̈n në keyiic aa amuk thaŋ ye wal ŋïr nyop, ka tol de aŋïïr de wal alɔ nhial.

¹² Go Nhialic a thiëëc an, “Mɛnh ë raan cï kë cï röördït ke baai de Yithriɛl looi ë cuëër tïŋ? Keek alɛ̈mkï kedhie ɣön cï thiäŋ kekë yiëth. Kë ye kek röt dam kï: ‘Bɛ̈nydït acïï wook woi! Acï piny nyääŋ piny.’ ”

¹³ Na wën, go ë Bɛ̈nydït lɛ̈k ɛn an, “Abä keek tïŋ ke ke loi karɛc wär ee kake.”

¹⁴ Go yɛn lɛɛr në thoŋ lɔ të lɔ rut de Luaŋdït, ku nyuth a diäär dhiëëu thon de yanh cɔl Tamudh.

¹⁵ Go ya thiëëc an, “Mɛnh ë raan, cï ee kënë tïŋ? Yïn bï karɛc wär ee kakë tïŋ.”

¹⁶ Go yɛn lɛɛr ë kal de Luaŋdït yic thïn. Të thiääk ke tëɣeric, në kaam de yïk kekë kueer, të de yic röör kathiërrou ku dhïc. Acïk kekɔ̈ɔ̈th wel tëɣeric, ku acïk kenïïm guöt piny të lɔ aköl amiäk, ke ke lam akɔ̈l bɔ̈ thok.

¹⁷ Go ë Bɛ̈nydït lɛ̈k ɛn an, “Mɛnh ë raan, cï ee kënë tïŋ? Kek kɔc ke Jeruthalem kë, akënkï piɔ̈ɔ̈th kuɛth në luɔi de karɛckɛn kë kedhie, ka cï keek tïŋ ee tënë, ku në luɔi de akuöörkuöör cïk thiäi në piny nɔm ëbɛ̈n. Ei, abïk dhil bɛ̈n, ku bïk bɛ̈n looi ee tënë Luaŋdït, ku tɔkï yɛn göth aläl. Tïŋ lɛ̈ɛ̈tdɛn ye kek a läät në kuɛɛr ke dhääl, ku yek kewuum kum ë këër!

¹⁸ Abïk riɛl de agönhdï yök ëbɛ̈n. Acä keek bï pɔ̈l, ku cä piɔ̈u bï kok wo keek. Abïk a lɔ̈ŋ aläl në awuɔɔu dït, ku yɛn cïï lɔ̈ŋden bï piŋ.”