Edhekiɛl 6 - JAM DE NHIALIC 2011

Bɛ̈nydït Ajäny Läm de Yiëth

¹ Go jam de Bɛ̈nydït bɛ̈n tëde yɛn an:

² “Mɛnh ë raan, tïŋ kur ke Yithriɛl nïïm ku gamë ke jamdï.

³ lɛ̈kë kur ke Yithriɛl bïk jam de Bɛ̈nydït Awärjäŋ piŋ, bïk kë luɛɛl, yɛn Bɛ̈nydït Awärjäŋ piŋ, yɛn yöök kur ku ɣään thöny ku liɛl, ku wɛ̈k: yɛn bï abätäu tuɔɔc bïï ɣään ye kɔc yiëth lam thïn riɔ̈ɔ̈k.

⁴ Yïk abïï ke wɛɛr piny, ku dhoŋ yïk ke wal ŋïr. Kɔc tɔ̈u ëtɛ̈ɛ̈n kedhie abïï ke nɔ̈k në yiëthken nïïm.

⁵ Yɛn bï gup ke kɔc ke Yithriɛl cï thou wɛɛr piny, yɛn bï yomken wɛɛr piny ëbɛ̈n në yïk kɔ̈ɔ̈th.

⁶ Pɛ̈ɛ̈nydït ke Yithriɛl ëbɛ̈n abïï ke riɔ̈ɔ̈k, ago yïkken ku yiëthken dhiac yiic abïk lɔ thorthor, yïkkɛn ke wal ŋïr abïï ke dhiac piny, ku këriëëcdɛn cïk looi ëbɛ̈n abï nyaai.

⁷ Kɔc abï keek nɔ̈k në piny yic ëbɛ̈n, ku kɔc bïï döŋ ke ke pïïr, abïk jɔ ŋic nɔn Yan Bɛ̈nydït.

⁸ “Yɛn bï kɔc kɔ̈k tɔ kual röt në tem bïï ke tɛm röt, ku abïk thiëi në juöör yiic,

⁹ të bïï kek lɔ rëër ë juöör yiic. Abïk a tak, ku ŋickï nɔn cän keek luöi këtuc ku cä ke yɔ̈ɔ̈r gup, në biäk cïn kek piɔ̈ɔ̈th gäm, acïk a nyääŋ piny, gamkï yiëth ku pälkï yɛn. Ku keek gupken abïk kërac tïŋ në biäk de karɛcken, ku ka yäär ke gup cïk looi.

¹⁰ Abïk ŋic nɔn ee yɛn Bɛ̈nydït ku nɔn ye jänydiën yan ke jɔ̈ɔ̈ny acie riëëc tei.”

¹¹ Acïï Bɛ̈nydït Awärjäŋ lueel an, “Pamkï wecin! Yuöpkï Wecök! Dhiaukï në jiɛthëpiɔ̈u në biäk de kërɛɛc cï baai de Yithriɛl looi. Abïk lɔ thou në tɔŋ, ku cɔk, ku jɔk.

¹² Kɔc meckë abïï juäi ke dɔm ku thoukï, ku kɔc thiɔ̈kë abïï ke nɔ̈k në tɔŋ, ku kɔc bï döŋ ke ke pïïr abïï cɔk ke nɔ̈k. Abïk riɛl de agönh de Bɛ̈nydït yök në kegup.

¹³ Gup ke kɔc cï thou abïï ke wɛɛr në yiëth yiic, ku në yïkken lɔ̈m, abïï ke wɛɛr në kur thöny nïïm ëbɛ̈n, ku në kur bär nïïm ëbɛ̈n, ku në tiim thäär ëbɛ̈n, ku në tiim ke ɣok thäär, ku atïïp ke tiim thäär ëbɛ̈n, të wën ye kek yiëthken miɔc në miɔ̈c nyop. Abïï ë raan ëbɛ̈n jɔ ŋic nɔn ee yɛn Bɛ̈nydït.

¹⁴ Ɣɛɛ, Yɛn bï yaciin riny ku riääk pinyden. Abä tɔ ee jɔ̈ɔ̈r gɔl në wöuwic leer piny de Ribila në biäk të lɔ rut, acïn të bä pɔ̈l në ɣään ceŋ ë kɔc ke Yithriɛl. Ago ë raan ëbɛ̈n ŋic nɔn Yan Bɛ̈nydït.”