Edhekiɛl 47 - JAM DE NHIALIC 2011

Nyin ë Pïïu ee Wɛ̈t bei Luaŋdït

¹ Go raan a bɛ lɛɛr ciëën në kueer lɔ kueer Luaŋdït. Pïïu ayek wɛ̈t bei në kal thar ke ke lɔ në biäk të lɔ aköl amiäk të wel ë Luaŋdït yethok thïn. Aake wɛt piny. Pïïu awɛtkï piny në Luaŋdït thar biäk de wöuwic të lɔ yïk.

² Go raan ɛn bɛ̈ɛ̈i biic në pëër de Luaŋdït në kueer thoŋ lɔ rut, ku lee yɛn ë thoŋ të lɔ aköl amiäk. Nyin thiin de pïïu awat në biäk të lɔ thoŋ de wöuwic.

³ Go raan bot kadhïc ku thiërdhetem ke akeem them në këde thëm nu ë yeciin, në biäk lɔ aköl amiäk, go ya yɔ̈ɔ̈k bä tëëk ë pïïuwiic ëtɛ̈ɛ̈n. Go pïïu pëk ë yakaam.

⁴ Na wën ke be bot kadhïc ku thiërdhetem 560 ke akeem them, gok pïïu ɣëët në yamiɔl. Na wën ke be bot kadhïc ku thiërdhetem ke akeem kɔ̈k them, ku tɔ yɛn tëk thïn, go pïïu ɣëët në yaɣɔ̈i.

⁵ Go bot kadhïc ku thiërdhetem ke akeem bɛ them, go nyin yic thuth ku cä lëu në tɛ̈m, ee kuaŋ yen duëër ë raan ye teem kɔ̈u.

⁶ Go lɛ̈k ɛn an, “Mɛnh ë raan, döt ee kakë apiɛth.” Go raan a lɛɛr ciëën puk a nɔm në kiir nɔm,

⁷ na wën la ɣet ëtɛ̈ɛ̈n, guɔ tiim juëc tïŋ ëtɛ̈ɛ̈n ë kiir nɔm biäkë ku biäkë.

⁸ Go lɛ̈k ɛn an, “Pïïukë ayek piny reetic ëbɛ̈n ke ke lɔ aköl amiäk, ku lekï ë Wak de Jordan yic, ku Wɛ̈ɛ̈r de Amilɔ. Ku të cï kek lɔ në Wɛ̈ɛ̈r de Amilɔ yic, ee pïïu cï wac tɔ̈u ee wɛ̈ɛ̈rë yic waar në pïïu piɛth.

⁹ Të ye nyin wɛt thïn, tɛ̈ɛ̈n abï dɛk läi ëbɛ̈n ku rec. Ku nyin de pïïu abï pïïu ke Wɛ̈ɛ̈r de Amilɔ tɔ piɛth, ku të bï yen wɛt thïn abï pïïr bɛ̈ɛ̈i.

¹⁰ Gɔl në nyin de Engedi, leer në nyin de Englaim ëbɛ̈n, abï dɛ kɔc ee rec deep në wɛ̈ɛ̈r yɔu, ku abïk boiken thieth ëtɛ̈ɛ̈n ke ke bï riɛl. Abï dɛk rec juëc yiic ëtɛ̈ɛ̈n, cït man de rec tɔ̈u në Wɛ̈ɛ̈rdïït ɣer yic.

¹¹ Ku pïïu tɔ̈u në pɔ̈liic ku awuul tɔ̈u ë wɛ̈ɛ̈r yɔu, acïï keek bïï tɔ piɛth. Abïk tɔ̈u ëtɛ̈ɛ̈n ke ke bïï amilɔ aa yök thïn.

¹² Tiim juëc yiic abïk luɔk në këcam në nyin biäkë ku nyin biäkë. Yïthken acïkï bï aa biɔɔr, ku abïk nïïm dɛk mïth ke ke cïï kääc. Abïk nïïm dɛk mïth piɛth ë pɛ̈i nyïïn ëbɛ̈n, në biäk ye ë keek piɔɔk ë nyin ee bɛ̈n bei tëɣeric. Tiim abïk kacaam aa bɛ̈ɛ̈i, ku yïthken abïk kɔc tɔ waar në juäi.”

Akɛɛth ke Piny

¹³ Acïï Bɛ̈nydït Awärjäŋ lueel an, “Kakë ayek akɛɛth ke piny bïï tɛ̈k dhiëën ke Yithriɛl kathiëër ku rou, ku dhiën ë Jothep abï biäk kaarou nööm. Dhiën de Manatha ku dhiën de Eparaim, wɛ̈ɛ̈t ke Jothep, ŋɛk aa ye gäm biäk tök.

¹⁴ Aa cä thön kuarkun arëët nɔn bän keek gäm ee pinyë ke ye këden, ka ënɔɔnë tɛkkï akït ë kɛmkun.

¹⁵ “Aken lɔ të lɔ rut atëk ë baŋ të lɔ aköl amiäk de Wɛ̈ɛ̈rdïït ɣer, leer ë pänydït de Ɣethelon, leer Ɣamath, në pänydït de Dhedad.

¹⁶ Ku lee pɛ̈ɛ̈nydït ke Berotha ku Thibraim, atɔ̈ukï në kaam de piny de ciɛɛŋ de Damathko ku ciɛɛŋ de Ɣamath, ku lee në pänydït de Tikon tɔ̈u në aken de paan de Ɣauran nɔm.

¹⁷ Ka aken të lɔ rut ee tëëk në Wɛ̈ɛ̈r Ɣer lee ë biäk të lɔ aköl amiäk në pänydït de Ɣadharenon, kekë aken de piny ke yï Damathko ku Ɣamath ë biäk të lɔ rut.

¹⁸ “Aken de biäk të lɔ aköl amiäk ee tëëk ke lɔ wöuwic në tuŋ de piny tɔ̈u ë kaam de piny ë Ɣadharenon ku Damathko kekë Ɣauran, ku ye wɛ̈ɛ̈r de Jordan akeu looi në kaam de piny de Yithriɛl tɔ̈u ë biäk të lɔ aköl athɛ̈i ku Giliyad në biäk të lɔ aköl amiäk, leer Tamar në Wɛ̈ɛ̈r de Amilɔ kɔ̈u.

¹⁹ “Aken de biäk të lɔ wöuwic ee tëëk ë Tamar leer në awuul ke Kadec Meriba, ku tëëk të lɔ rut në aken de Rip yic, lee në kiir de Wɛ̈ɛ̈rdïït ɣer kɔ̈u.

²⁰ “Aken de aköl athɛ̈i ee rɔt gɔl në Wɛ̈ɛ̈r Ɣer kɔ̈u, tëëk të lɔ rut lee ë tuŋ tɔ̈u të lɔ në Ɣamath thok.

²¹ “Tɛ̈kkï ee pinyë dhiëën ke Yithriɛl kedhie,

²² abäk nööm ke ye këdun anandun. Alɛi rɛ̈ɛ̈r në weyiic ku kɔc cï mïthken bɛ̈n dhiëëth ee tënë, abïk biäkden de piny nööm aya të la wek en tek. Abï keek dhil aa luööi cït man ë dïïl ke dhiëën ke Yithriɛl, ku abïk deeny ë gɛk në mïth ke Yithriɛl ëtök.

²³ Alɛi rɛ̈ɛ̈r ë weyiic ëbɛ̈n, abïk biäkden aa nööm në dhiën wën rëër kek në ke yiic. Acä lueel, Yɛn Bɛ̈nydït Awärjäŋ.”