Edhekiɛl 45 - JAM DE NHIALIC 2011

Biäk de Bɛ̈nydït ë Baai Yic

¹ Të cï ë piny tek bï dhiën aa gäm pinyde, biäk tök abïï aa gäm Bɛ̈nydït. Bɛ̈ɛ̈r de yen kɔ̈u abï aa kilɔɔ mitïïr kathiëër ku rou ku biäk, ku ye dït de yen yic kilɔɔ mitïïr kathiëër. Yen ëtɛ̈ɛ̈n ëbɛ̈n abï yic ɣɛɛr.

² Yen ëtɛ̈ɛ̈n abï yic dɛ piny dek aguuk kaŋuan ke ye tëde tëɣeric, ku abï dɛ të bäär kɔ̈u ye thëmde mitïïr 250, yen ëtɛ̈ɛ̈n ëbɛ̈n acï gɛɛu cil në të lääu dït, dït de të lääuwic ee mitïïr kathiërrou ku dhïc.

³ Biäk de të lääu, biäk bäär tök abï aa kilɔɔ mitïïr kathiëër ku rou ku biäk, ku dït de yen yic ee kilɔɔ mitïïr kadhïc, të bï ɣöt tɔ̈u thïn, tëɣeric aläl, abï thɛm wei.

⁴ Abï aa biäk ɣeric de baai, të cï tɔ̈ɔ̈u pei në biäk de bäny de kake Nhialic ee Bɛ̈nydït luööi tëɣeric. Abï yic dɛk ɣöötken, ku biäk ɣeric de tëɣeric.

⁵ Biäk däŋ de piny abï tɔ̈ɔ̈u pei ke ye tëde kɔc ke Lebai ee luɔi looi Luaŋdït. Abï dɛk wun de yic ɣööt kathiërrou ëtɛ̈ɛ̈n bï kek ceŋ thïn.

⁶ Të thiääk kekë tëɣeric, ade biäk däŋ ye bɛ̈ɛ̈r de yen kɔ̈u kilɔɔ mitïïr kathiëër ku rou ku biäk, ku ye dït de yen yic kilɔɔ mitïïr kaarou ku biäk, abï tɔ̈ɔ̈u pei ke ye biäk de pänydït bïï baai de Yithriɛl aa ceŋ thïn.

Piny de Wën Melik

⁷ Piny bï bäny cieŋ acï guiir pei aya. Gɔl në aken tɔ̈u të lɔ aköl athɛ̈i de biäk ɣeric, ɣeet të lɔ në Wɛ̈ɛ̈rdïït ɣer, ku gɔl në aken tɔ̈u të lɔ aköl amiäk ɣeet të lɔ aköl amiäk de baai, ago bɛ̈ɛ̈rde thöŋ kekë biäk töŋ cï gäm dhiëën ke Yithriɛl.

⁸ Yen ee tënë abï aa biäkde në Yithriɛl. Ku bɛ̈ny acïkï kɔckï bï bɛ aa yɔŋ, ku abïk baai de Yithriɛl gäm piny cït man de täu dhiëënken.

Lööŋ ke Bɛ̈ny

⁹ Acïï Bɛ̈nydït Awärjäŋ lueel an, “Wek cï awɛ̈ɛ̈c looi në kaam bääric, wek bäny ke Yithriɛl! Pälkï akuöörkuöör ku yaaŋ de kɔc! Luɔikï yic, ku piathëpiɔ̈u. Wek cïï kɔckï bï bɛ nyɔk ë cuɔp wek keek wei pinyden. Yɛn Bɛ̈nydït Awärjäŋ, ee Yɛn lɛ̈k week ee kënë.

¹⁰ Raan ëbɛ̈n abï dhil aa lui në kake thëm piɛth ku ka kït yiic.

¹¹ Ka ye karil them abïk yiic dhil kït në ka ye miök them. Löth yen ee këde thëm, ka löth abï aa aduuk kathiëër.

¹² Kakuön ke thëm abïk tɔ̈u alë: Cekel tök abï aa gera kathiërrou, ku wëu kadhïc, abïk aa wëu kadhïc, ku wëu kathiëër abïk aa cekeel kathiëër, ku mina tök abï aa cekeel kathiërdhïc.

^13-15 Kënë yen ee kueer duëër yïn kakuön ke miɔ̈c aa gam: Töŋ në dhetem de Agamɔ yic, töŋ në dhetem de barli yic, Töŋ në dhetem de miök de tiimku yiic, biäk de thiëër de lööthkuön cï yök yiic ëbɛ̈n. Ku amäl tök në bot kaarou ke amɛ̈l yiic, në ɣööt ke Yithriɛl thook. Kënë ee miɔ̈c ë rap, ku miɔ̈c ye nyop ëbɛ̈n, ku miɔ̈c de mät, ee kë bïï ë keek teem gup, acïï Bɛ̈nydït Awärjäŋ lueel.

¹⁶ Kɔc ke baai kedhie abïk ee miɔ̈ckë gäm wën bɛ̈ny de Yithriɛl.

¹⁷ Abï ya luɔi de wën bɛ̈ny bï miɔ̈c de lɛ̈n bï nyop ëbɛ̈n yök, ku miɔ̈c ë rap, ku miɔ̈c de mɔ̈u në biäk de baai de Yithriɛl ëbɛ̈n, në kööl de dhuëëŋ ë Wil de Pɛɛi. Ee yen bï miɔ̈c de awɛ̈ɛ̈c yök, ku miɔ̈c de kööl ë Thabath, ku jɔ aa dhuëŋ kɔ̈k. Ee yen abï miɔ̈c de awɛ̈ɛ̈c bɛ̈ɛ̈i, ku miɔ̈c ë rap, ku miɔ̈c ye nyop ëbɛ̈n, ku miɔ̈c de mät, bïï baai de Yithriɛl jɔ teem guöp.”

Dhuëŋ

¹⁸ Acïï Bɛ̈nydït Awärjäŋ lueel an, “Në kööl tueŋ de pɛɛi tueŋ de ruöön, wek bï miɔɔr atiëëk cïn guöp tëdak dhil aa nɔ̈k bä wek tëɣeric tɔ piɛth.

¹⁹ Bɛ̈ny de kake Nhialic abï riɛm thiin de miɔ̈c de kërac nööm, ku tɛ̈ɛ̈u në nïn de Luaŋdït nɔm, në aguuk ke yïk kaŋuan, në nïn de Luaŋdït nɔm, ku në kueer lɔ në kal de Luaŋdït yic biäk thïn.

²⁰ Në kööl de dhorou ë pɛɛi yic, wek bï kë cït ee kënë looi, në biäk de raan ëbɛ̈n, raan bï wäc ke kuc nɔn cïï yen awäc looi, në ye kueerë wek bï Luaŋdït jɔ teem guöp.

²¹ Në kööl de thiëër ku ŋuan de pɛɛi tueŋ, wek bï luɔi de Dhuëëŋ de Winythok gɔl. Në nïn kadhorouwiic, raan ëbɛ̈n abï aa cam në kuïn cï pam cïn yic luɔu.

²² Në kööl tueŋ de dhuëëŋ, wën bɛ̈ny mac baai, abï miɔɔr atiëëk nɔ̈k ke ye miɔ̈c de kërac, në biäk de awɛ̈ɛ̈cke ku kɔc kedhie.

²³ Në kööl tökic në ye nïn ke dhuëëŋë yiic kadhorou, abï Bɛ̈nydït aa näk miöör kadhorou, ku nyɔk kadhorou, ke ke cïn gup të tëdak, ku abïï ke nyop ëbɛ̈n kedhie. Ku yen aya abï nyɔɔŋ bou aa nɔ̈k në kööl tökic aköölnyïïn, ke ye miɔ̈c de kërac.

²⁴ Ku miɔɔr tök ku nyɔɔŋ tök në miɔ̈c yiic, abï aa dɛk rothol tök de miɔ̈c ë rap, ku litiir kadiäk ke miɔ̈c de miök de olip.

²⁵ Në pɛɛi de dhorou, në kööl ë thiëër ku dhïc ë pɛɛi yic ku në nïn kadhorou de Dhuëëŋ de Kɛ̈ɛ̈t yic, yen miɔ̈c cït ee kënë de pal awɛ̈ɛ̈c, abï miɔ̈c cït ee kënë bɛ gam në biäk de miɔ̈c de awɛ̈ɛ̈c, miɔ̈c ye nyop ëbɛ̈n, ku miɔ̈c ë rap, ku miɔ̈c de miök de olip.”