Edhekiɛl 39 - JAM DE NHIALIC 2011

Tiëm de Gok

¹ Acïï Bɛ̈nydït Awärjäŋ lueel an, “Mɛnh ë raan, rɛɛcë Gok, bɛ̈ny tueŋ cieŋ juöör ke Mecek ku Tubal, ku lɛ̈kë yen nɔn yɛn raan de aterde.

² Abä wɛl nɔm kueer däŋ, ku ja wat nɔm të mec lɔ të lɔ rut agut të bï yen ɣet në kur ke Yithriɛl yiic.

³ Ku ëtɛ̈ɛ̈n yɛn bï dhaŋde jɔ riëër wei në ciin camde, ku nyaai wiɛth ke dhaŋ në ciin cuënyde.

⁴ Gok kekë remdɛn ë tɔŋ ku kɔc mät në yen ëtök, abïk löny kedhie thoukï në kur ke Yithriɛl nïïm, ku yɛn bï gupken tɔ ye këcam ke diɛt ku läi roor ëbɛ̈n.

⁵ Abïk wïïk kedhie thoukï në ruɔɔr yiic. Acä lueel, Yɛn Bɛ̈nydït Awärjäŋ.

⁶ Yɛn bï piny de Magɔk ɣaak, ku në Abäpdit yɔu të wën ee kɔc rëër ke cïn ke nuan keek, ku abïï raan ëbɛ̈n jɔ ŋic nɔn ee Yɛn Bɛ̈nydït.

⁷ Abä dhil looi ago kɔckiën ke Yithriɛl rinkiën ɣer yiic ŋic, ku yɛn cïï rinkï bï bɛ tɔ yäär. Ëtɛ̈ɛ̈n abï juöör jɔ ŋic nɔn ee yɛn Bɛ̈nydït, Raan Ɣeric de Yithriɛl.”

⁸ Acïï Bɛ̈nydït Awärjäŋ lueel an, “Kööl cän jam në këde abï dhil bɛ̈n ë yic.

⁹ Kɔc rɛ̈ɛ̈r në pɛ̈ɛ̈nydït ke Yithriɛl yiic, abïk lɔ biic ku kuanykï dhɛ̈ŋ gɛ̈ɛ̈k ke ke ke ye tiim thät. Abïk many dït looi në kööt, ku dhɛ̈ŋ, ku wiɛth ke dhɛ̈ŋ, ku tɔɔŋ, ku thieec, ku abïk dɛ tiim bï dëp ë run kadhorou.

¹⁰ Acïkï bï bɛ aa kuany në tiim ë duum yiic, ku nɔn yep kek tiim në ruɔɔr yiic, në biäk bïï kek dɛ dhɛ̈ŋ juëc bïï kek mac aa dɛ̈ɛ̈p. Abïk kɔc wään cï keek rum ku yakkï keek bɛ rum ku yakkï keek.” Acïï Bɛ̈nydït Awärjäŋ lueel.

Täu de Gok

¹¹ Go Bɛ̈nydït lueel an, “Të le kakë tuöl kedhie, Yɛn bï Gok gäm piny bïï ë yen tɔ̈ɔ̈u në Yithriɛl ëtɛ̈ɛ̈n, në Wak de Kamaanic, ë biäk të lɔ aköl amiäk de Wɛ̈ɛ̈r de Amilɔ. Gok kekë remdɛn ë tɔŋ ëbɛ̈n, abïï ke tɔ̈ɔ̈u ëtɛ̈ɛ̈n, ku wak abï aa cɔɔl an, ‘Wak de Rem Tɔŋ de Gok.’

¹² Täu tɔ̈ɔ̈u ë gup ke kɔc në baai de Yithriɛl abï pɛ̈i kadhorou thöl ku jɔ piny bɛ piath.

¹³ Raan ëbɛ̈n raan nu ee pinyë abï kɔc kuɔny në täu tɔ̈ɔ̈u ë keek, ku abï ke dhuëëŋ gup në biäk de ee kënë në kööl de tiëmdï. Acä lueel, Yɛn Bɛ̈nydït Awärjäŋ.

¹⁴ Na lɔ pɛ̈i kadhorou wan, kɔc abïï ke kuany bïk piny lɔ caath, në biäk bïï kek gup ke kɔc lee yök piny ke ke kënë tɔ̈ɔ̈u lɔ tɔ̈ɔ̈u, agokï piny jɔ tɔ piɛth.

¹⁵ Të wën ye kek lɔ nhial ku lek piny në baai yic, na cïk yuɔɔm de raan yök, ke ke tɛ̈ɛ̈u kïn bïï kek ye ŋic në yelɔ̈ɔ̈m, ago kɔc ee rɛ̈ŋ wec bɛ̈n ku bïk lɔ tɔ̈ɔ̈u në Wak de Rem de Tɔŋ de Gok yic.

¹⁶ (Abï dɛ wun thiɔ̈k ëtɛ̈ɛ̈n cï cäk në rin ke rem de tɔŋ.) Ku ëtɛ̈ɛ̈n piny abïï jɔ bɛ tɔ piɛth.”

¹⁷ Bɛ̈nydït Awärjäŋ acï yɛn an, “Mɛnh ë raan, cɔl diɛt kedhie ku läi bïk bɛ̈n në ɣään kedhie, bïk miɔ̈c näk cä guiëër keek bɛ̈n cam. Abï aa dhuëëŋ dït agök në kur ke Yithriɛl nïïm, të bïï kek rïŋ cuet ku dekkï riɛm.

¹⁸ Abïk gup ke rem de tɔŋ bɛ̈n cuet, ku dekkï rim ke bäny cieŋ pinynɔm, keek kedhie abïï keek nɔ̈k cït nyök ke amɛ̈l, ku nɔn ee kek nyök bɔɔth, ku nɔn ee miöör.

¹⁹ Të lan ee kɔckë nɔ̈k cï miɔ̈c näk, diɛt ku läi abïk cuet në kɔɔl bïk lëu ku dekkï riɛm arëk abïk jɔ wiɛɛt.

²⁰ Në pamdï nɔm abïk këriëëc bïk lëu ëbɛ̈n cuet, jöŋgöör ku ee cath në kekɔ̈ɔ̈th, ku rem de tɔŋ, ku kɔc ee piɔ̈t. Acä lueel, Yɛn Bɛ̈nydït Awärjäŋ.”

Yithriɛl Akimë Piny

²¹ Go Bɛ̈nydït lueel an, “Yɛn bï juöör tɔ tïŋ dhuëëŋdï, ku nyuöth keek luɔi ee Yɛn riɛldï tɔ loi löŋdiën yic cä lueel.

²² Abïï baai de Yithriɛl jɔ ŋic ënɔɔnë lee tueŋ, nɔn ee Yɛn Bɛ̈nydït Nhialicden.

²³ Ku abïï juöör ŋic nɔn ë peec ë baai de Yithriɛl lek piny lei në biäk de awɛ̈ɛ̈c cïk luöi Yɛn. Yɛn cï rɔt yal wei tëde keek ku ta keek tiɛɛm ë kɔc ke aterden ku näkkï keek në tɔŋic.

²⁴ Acä ke gäm ke röŋ ke keek në biäk acolden ku luɔi rɛɛcden, Yɛn cï rɔt yal wei tëde keek.”

²⁵ Acïï Bɛ̈nydït Awärjäŋ lueel an, “Ku ënɔɔnë yɛn bï piɔ̈u kok në kuat de Jakop, baai de Yithriɛl, ku abä ke bɛ tɔ kueth. Yɛn bï rinkiën ɣer yiic gël.

²⁶ Të bï kek bɛ lɔ rëër në mätic pinyden, ke cïn raan riëëc keek, abïk nïïm bɛ määr në ayär wään cï kek gup yäär në luɔi cï kek A nyiɛɛn.

²⁷ Në luɔi bän ye nyuöth juöör juëc nɔn ɣeer Yɛn yic, Yɛn bï kɔckï bɛ̈ɛ̈i ciëën në wuöt yiic ëbɛ̈n wuöt cieŋ ë kɔc ke aterden.

²⁸ Ëtɛ̈ɛ̈n abïï kɔckï jɔ ŋic nɔn ee Yɛn Bɛ̈nydït Nhialicden. Abïk ee kënë ŋic, në biäk cïï Yɛn ke tuɔɔc ë juöör yiic, ku ënɔɔnë acä ke määt yiic, ku bɛ̈ɛ̈i ke ciëën pinyden, ke cïn raan töŋdɛn nyiëëŋë piny.

²⁹ Yɛn bï wëikï wäl në baai de Yithriɛl guöp, ku Yɛn cïï rɔt bï bɛ yal wei tëde keek. Acä lueel, Yɛn Bɛ̈nydït Awärjäŋ.”