Edhekiɛl 37 - JAM DE NHIALIC 2011

Wak de Yom cï Riɛl

¹ Guɔ riɛl de täu ë Bɛ̈nydït yök në yaguöp, go Wëi ke Bɛ̈nydït ya jɔt ku lee yɛn tääu piny ë wakic të cï thiäŋ ke yom ke kɔc.

² Go yɛn jɔ caath ë wakic ëbɛ̈n, guɔ piny de wak jɔ tïŋ ke cï thiäŋ në yom ke kɔc ëbɛ̈n, yom cï riɛl aläl.

³ Go lɛ̈k ɛn an, “Mɛnh ë raan, duëër ee yomkë bɛ pïïr? Guɔ bɛ̈ɛ̈r an, “Bɛ̈nydït Awärjäŋ, ee yïn yïtök yïn aduëër ee kënë bɛ̈ɛ̈r!

⁴ Go lɛ̈k yɛn an, “Cäärë ee yomkë. lɛ̈kë keek an, yom cï riɛl piɛŋkï jam de Bɛ̈nydït.

⁵ lɛ̈kë keek, Yɛn Bɛ̈nydït Awärjäŋ alɛ̈k keek an: Yɛn lɔ wëi tääu në weyiic ku bɛ week bɛ tɔ pïïr.

⁶ Ku yiëk we räl ku rïŋ, ku kuöm wegup në dɛ̈l. Yɛn bï wëi tääu në weyiic ku bɛ week tɔ pïïr. Ëtɛ̈ɛ̈n abäk jɔ ŋic nɔn ee Yɛn Bɛ̈nydït.”

⁷ Guɔ cɔ̈ɔ̈r cït man cï ye lɛ̈k yɛn. Ku të thiin wën jaam yɛn, guɔ atektek piŋ, ku yom alekkï ke ke tuum röt.

⁸ Të wën jɔ yɛn daai, yom acï ke kum kɔ̈ɔ̈th në räl ku rïŋ, ku jɔ aa dɛ̈l. Ku aa cïn wëi në keyiic.

⁹ Go Nhialic lɛ̈k ɛn an, “Mɛnh ë raan, cäärë yom. lɛ̈kë yom an Bɛ̈nydït Awärjäŋ acï yïn yɔ̈ɔ̈k bä bɛ̈n në ɣään kedhie, bä wëi bɛ̈n kuɔɔth në gup cï thuowë yiic, ku bä keek bɛ tɔ pïïric”.

¹⁰ Guɔ cɔ̈ɔ̈r cït man cïï ë yɛn yɔ̈ɔ̈k. Go wëi lɔ në gup cï thou yiic, gokï bɛ pïïr ku kɛ̈ɛ̈ckï nhial. Aake juëc aläl ka duëërkï rem de tɔŋ lëu.

¹¹ Go Nhialic lɛ̈k yɛn an, “Mɛnh ë raan, baai de Yithriɛl acït ee yomkë. Ayek lueel an cïk ril wei, ke ke cïn aŋäth ku cïnkï nïïm wadäŋ.

¹² Ka yïn cäärë kɔckiën ke Yithriɛl ku lɛ̈kë keek an, Yɛn Bɛ̈nydït Awärjäŋ, Yɛn lɔ rɛ̈ŋken liep nïïm. Abä ke lɔ bɛ̈ɛ̈i bei, ku bɛ̈ɛ̈i ke ciëën piny de Yithriɛl.

¹³ Tën lan rɛ̈ŋ lɔ liep nïïm të wään cïï kɔckï tɔ̈ɔ̈u thïn ku bɛ̈ɛ̈i ke bei, abïk jɔ ŋic nɔn ee Yɛn Bɛ̈nydït.

¹⁴ Yɛn bï wëikï tääu në keyiic, ku bɛ ke tɔ pïïr, ku ta keek rɛ̈ɛ̈r pinyden. Ëtɛ̈ɛ̈n abïk jɔ ŋic nɔn ee Yɛn Bɛ̈nydït. Acä lueel nɔn bän ee kënë looi, ku abä looi. Acä lueel, Yɛn Bɛ̈nydït Awärjäŋ.”

Juda ku Yithriɛl ë Ciɛɛŋ Tök Yic

¹⁵ Go jam de Bɛ̈nydït bɛ̈n tëde yɛn an.

¹⁶ “Mɛnh ë raan, nöm thieny de tim ku gäärë kɔ̈u wëlkë, ‘Baai de Juda.’ Ëtɛ̈ɛ̈n nöm thieny däŋ de tim ku gäärë kɔ̈u wëlkë, ‘Baai de Yithriɛl.’

¹⁷ Ku dom thieec kaarou nïïm ku dɔm kethäär në yïciin, ago ke woi cï thieny tök.

¹⁸ Na lɔ kɔcku yïn lɔ thiëëc, eeŋö lueel ee kënë,

¹⁹ lɛ̈kë keek an Yɛn Bɛ̈nydït Awärjäŋ, Yɛn bï thieny de Jothep lɔ nööm, ku dhiëën ke Yithriɛl tɔ̈u ke keek, ku tääu tëtök kekë thieny de Juda, ku yɛn bï thieny tök looi në keek kaarou ku mɔ̈k në yïciin.

²⁰ “Muk thieec kaarou në yïciin ku tɔ tïŋ ë kɔc keek.

²¹ Ku lɛ̈kë keek an, Yɛn Bɛ̈nydït Awärjäŋ, Yɛn bï kɔckï lɔ bɛ̈ɛ̈i bei kedhie në juöör wään cïï kek lɔ thïn, ku määt ke yiic tëtök, ku pɔ̈k kenïïm ciëën pinyden.

²² Abä ke mat yiic ke ke ye jur tök pinyden, në kuur de Yithriɛl nɔm. Abïk nïïm dɛk meliŋ tök bï ke cieŋ, ku acïï ke bï bɛ tek yiic bïk aa juöör kaarou, ku cïï ke tek yiic bïk aa ciɛɛŋ kaarou.

²³ Acïkï röt bï bɛ dhiöök në yiëth rackë ku cïkï röt riäk në luɔi de awɛ̈ɛ̈c. Abä ke tɔ lääu nïïm në kuɛɛrkɛn juëc ye kek awɛ̈ɛ̈c looi, ku nyiinkï Yɛn. Abä keek waak, ka abïk aa kɔckï, ku Yɛn bï aa Nhialicden.

²⁴ Melik cït awundï Debid yen abï aa melikden. Abïk keyiic mat kedhie në melik tök cök, ku abïk lööŋkï aa riëëu.

²⁵ Abïk rëër piny wään cä gäm awundï Jakop, të ɣɔn rëër ë kuarken. Abïk rëër ëtɛ̈ɛ̈n aɣet athɛɛr, ku yen ee täu bïï mïthken ku kuatden ëbɛ̈n tɔ̈u. Melik cït awundiën Debid abï ke cieŋ aɣet athɛɛr.

²⁶ Yɛn bï dɛk mät we keek män bï aa këërkëër de riëër piɛth aɣet athɛɛr. Abä ke thieei, ku ŋuak kuënden nyin, ku yɛn bï tëdiën ɣeric yïk ë keyiic, të bïï yen tɔ̈u thïn aɣet athɛɛr.

²⁷ Yɛn bï rëër ëtɛ̈ɛ̈n wo keek, ku Yɛn bï aa Nhialicden ku abïk aa kɔckï

²⁸ Të lan tëdiën ɣeric tääu ëtɛ̈ɛ̈n bïï tɔ̈u në keyiic aɣet athɛɛr, ëtɛ̈ɛ̈n abïï juöör jɔ ŋic nɔn ee Yɛn Bɛ̈nydït, Yɛn cï kɔc ke Yithriɛl lɔc bïk aa kɔc ke nɔmdï.”