Edhekiɛl 32 - JAM DE NHIALIC 2011

Melik de Rip acï Thɔ̈ŋ Nyaŋ

¹ Në kööl tueŋ de pɛɛi de thiëër ku rou, në ruöön ye run ë peec ë wook thiëër ku rou, go jam de Bɛ̈nydït bɛ̈n tëde yɛn an:

² “Mɛnh ë raan, jäny melik de Rip aläldïïtë. lɛ̈kë ee jamdiënë: yïn ee käŋ looi cï köör në juöör yiic, ku yïn cït nyaŋ ee bok kiir. Yïn ee pïïu tup nyïïn në yïcök abï pïïu ke kiɛɛr tuööp.

³ Të cïï juöör juëc keyiic määt, yïn bä jɔ dɔm në bɔidï ku ta ke thel bɔi biic në wɛ̈ɛ̈r këc

⁴ Yïn bä cuat piny biic, ku bɛ̈ɛ̈i diɛt nhial kedhie ku läi ke pinynɔm bïk yïn bɛ̈n cam.

⁵ Yɛn bï kur ku wɛ̈k kum në rïŋduön cï ŋuäc.

⁶ Yɛn bï riɛmdu wäl wei aɣet abïï kur thiɔ̈ɔ̈ŋ nïïm ku thiɔ̈ɔ̈ŋ nyïïn yiic.

⁷ Të lan yïn lɔ riɔ̈ɔ̈k, Yɛn bï tënhial kum ku cuɔth kuɛl. Akɔ̈l abï thiaan në luäät kɔ̈ɔ̈th, ku pɛɛi acïï piny bï meer.

⁸ Yɛn bï ɣɛɛr ke paannhial liɛɛu nyïïn ëbɛ̈n, ku tɔ pinydun ee mɔ̈ɔ̈th. Acä lueel, Yɛn Bɛ̈nydït Awärjäŋ.

⁹ “Juöör juëc abïk nuan të lan thoŋ de riääkdu caal në piiny kën ë keek kɔn piŋ rin.

¹⁰ Kë cä luöi yïn abï juöör juëc tɔ päu. Të lan abätäudï met yic, meliik abïï ke lath në riɔ̈ɔ̈c. Në ee köölë yïn bï wïïk, keek kedhie abïï keek lath ë biäk de wëiken.”

¹¹ Aye Bɛ̈nydït Awärjäŋ lɛ̈k melik de Rip an, “Yïn bï Abätäu de melik de Babilonia yök.

¹² Yɛn bï rem de tɔŋ de juöör ee kɔc kuur tɔ wëëth abätɛ̈ɛ̈uken bei ku nɛ̈kkï kɔcku kedhie. Kɔcku kedhie ku kakuön ya wek röt leec abï keek riɔ̈ɔ̈k.

¹³ Yɛn bï ɣɔ̈kkun nɔ̈k në awuul ke pïïu nïïm ëbɛ̈n. Abï ciɛ̈n kɔc ku ɣɔ̈k bï pïïu bɛ aa dhuth nyïïn.

¹⁴ Yɛn bï pïïukun tɔ dëu, ku ta ke lɔ gɔk, ku ta kiɛɛrkun riŋ ë lik. Acä lueel, Yɛn Awärjäŋ Bɛ̈nydït.

¹⁵ Kööl lan Rip tɔ ye të cï pɔ̈l ku riääk kɔc rëër ëtɛ̈ɛ̈n ëbɛ̈n, abïk ŋic nɔn ee yɛn Bɛ̈nydït.

¹⁶ Ku yen ee jänyë abï rɔt puk ke ye din ë dhiëëu. Abïï ë diäär ke juöör aa ket ke ye din dhiëëu kek Rip kekë kɔcke kedhie. Acä lueel, Yɛn Bɛ̈nydït Awärjäŋ.”

Paan ë Kɔc cï Thou

¹⁷ Në kööl de thiëër ku dhïc de pɛɛi tueŋ, në ruöön ye run ë peec ë wook thiëër ku rou, go jam de Bɛ̈nydït bɛ̈n tëde yɛn an:

¹⁸ “Mɛnh ë raan, dhiëëuwë kɔc juëc ke Rip. Tuɔɔcë keek ë piny kekë juöör ril kɔ̈k paan ë thuɔɔu.

¹⁹ lɛ̈kë keek: “Yak tak ee wek läk awär kɔc kɔ̈k? Wek bï lɔ ë piny paan ë thuɔɔu, ku jɔ dhɔt piny ëtɛ̈ɛ̈n në kɔc cïn nïïm yiëth ëtök.

²⁰ “Ku kuut dïït ke kɔc ke Rip abïk wïïk në kɔc ë näk në tɔŋic. Abätäu acï coc bïï keek nɔ̈k kedhie.

²¹ Kɔc ril, ku kɔc wään thäär në biäk de Rip, acïk kɔc ke Rip loor nïïm paan ë thuɔɔu. Ayek cööt në röl dït: “An kɔc wään cïn yiëth cï nɔ̈k në tɔŋic, acïk bɛ̈n piny eenë paan ë thuɔɔu, ku kek kï eenë!

²² “Athiriya atɔ̈u ëtɛ̈ɛ̈n, në rɛ̈ŋ ke remdɛn ë tɔŋ ke ke ë yelɔ̈ɔ̈m ëbɛ̈n. Aake näk keek ë tɔŋic kedhie.

²³ Ku rɛ̈ŋken acïk ɣet piny ya paan ë thuɔɔu. Remdɛn ë tɔŋ ëbɛ̈n aake wiëëk ë tɔŋic kedhie, ku rɛ̈ŋken acïk raŋde gɛɛu cil. Ku aake cï piny de kɔc pïïr kɔn aa riääc.

²⁴ Eelam atɔ̈u ëtɛ̈ɛ̈n, kekë rɛ̈ŋ ke remdɛn ë tɔŋ ë yelɔ̈ɔ̈m. Aake näk keek kedhie ë tɔŋic, acïk le piny ke ke kë ë cueel paan ë thuɔɔu. Wään pïïr kek aake ye kɔc riääc, ku ënɔɔnë acïk guɔ dhɔt piny ke ke cï thou ku cïk gup yäär.

²⁵ Eelam adhɔt piny në kɛm ke kɔc cï nɔ̈k ë tɔŋic, ku rɛ̈ŋ ke remdɛn ë tɔŋ acïk yen gɛɛu cil. Akënë ke cueel kedhie, aake ke näk keek ë tɔŋic kedhie. Wään pïïr kek aake ye kɔc riääc, ku ënɔɔnë acïk guɔ dhɔt piny ke ke cï thou ku cïk gup yäär, ku rɔmkï riääk de kɔc cï nɔ̈k ë tɔŋic.

²⁶ “Mecek ku Tubal atɔ̈ukï ëtɛ̈ɛ̈n, në rɛ̈ŋ ke remdɛn ë tɔŋ ëbɛ̈n ë yelɔ̈ɔ̈m. Akënë keek cueel kedhie, aake näk keek ë tɔŋic kedhie. Ku aake cï kɔc pïïr kɔn aa riääc.

²⁷ Akënë ë keek tɔ̈ɔ̈u në dhuëëŋ cï kɔc ril ke tɔŋ wään thɛɛr, aake ye thiɔ̈ɔ̈ŋ gup në kakɛn ë tɔŋ ke ke lɔ paan ë thuɔɔu, abätɛ̈ɛ̈uken aye ke kan në kenïïm ku kum keek kɔ̈ɔ̈th në köötken. Kek ee kɔc ril ke tɔŋkë, aake ril wään thɛɛr abïk kɔc pïïr aa riääc.

²⁸ “Yen tän bïï ë kɔc ke Rip dum yiic ka në kɔc kënë keek cueel yiic, kɔc ɣɔn näk keek ë tɔŋic.

²⁹ “Edom ka ëtɛ̈ɛ̈n ke meliikke ku bänyke. Aake ye rem de tɔŋ ril ëtör, ku ënɔɔnë adhɔtkï ë piny thar paan ë thuɔɔu në kɔc kënë cueel, kɔc ɣɔn näk keek ë tɔŋic.

³⁰ “Wɛ̈ɛ̈t meliik ke piny të lɔ rut ka ëtɛ̈ɛ̈n kedhie, ayï kɔc ke Thidon. Riɛlden aacï kɔc kɔn riääc wään, ku ënɔɔnë acïk guɔ le piny ke ke cï gup yäär, në kɔc wään näk ë tɔŋic, ku acï ke tɔ lɔ̈ŋ, ke ke kënë cueel. Arɔmkï ayäär në kɔc wään cï lɔ piny paan ë thuɔɔu.

³¹ “Tïŋ bïï ë kɔc wään cï nɔ̈k kedhie në tɔŋic tïŋ, abï melik de Rip riit piɔ̈u kekë remdɛn ë tɔŋ, aye Bɛ̈nydït Awärjäŋ lueel.

³² “Yɛn cï melik de Rip tɔ riëëc kɔc pïïr, ku yen kekë remdɛn ë tɔŋ kedhie abïï keek nɔ̈k ku tɔ ke lɔ̈ŋ piny kedhie, në kɔc kënë cueel wään cï nɔ̈k ë tɔŋic.” Bɛ̈nydït Awärjäŋ yen aa jam.