Edhekiɛl 17 - JAM DE NHIALIC 2011

Kääŋ de Cuɔɔr ku Enap

¹ Go jam de Bɛ̈nydït bɛ̈n tëde yɛn an:

² “Mɛnh ë raan, lɛ̈kë baai de Yithriɛl ee kääŋë,

³ ke ke bï kë lɛ̈k keek ŋic yɛn Bɛ̈nydït Awärjäŋ, aya lɛ̈k keek: ɣɔn aa de cuɔɔr dïït ë tɔ̈u, ade nɔɔk läk ku wuök dït cï ke thieth ke ke lääuwiic. Acï päär ke lɔ në kur ke Lebanɔn nïïm, ku dhoŋ tim de thidar nɔm,

⁴ ku leer ke piny ye ë käŋ ɣaac, ku tɛ̈ɛ̈u ë pänydït yic tëde kɔc ee ɣööc.

⁵ Go wɛ̈ɛ̈l thiin ë piac cil jɔt piny de Yithriɛl ku le com në dom piɛth yic, tën ee yic dɛ pïïu bï yen tɔ cil.

⁶ Go wäl cil, go tim mol piny ku jɔ cuaar abïï tim thiɔ̈ɔ̈ŋ nɔm. Ku jɔ kërke cuaar ke ke lɔ nhial tëde cuɔɔr, ku jɔ meike lɔ piny. Enap acï kërke ku yïth kuöm piny.

⁷ “Ade cuɔɔr dïït däŋ de wuök dït ku nɔɔkkɛn dït. Ku enap acï meike wël nïïm en, ku wël yïthke nïïm en aya, ke ŋäth luɔi bïï yen en gäm pïïu juëc wär pïïu wään ee yök dom yiic të wään ciil en.

⁸ Ku enap aacï com ë tiɔɔm piɛth yic, ye piɔɔk në pïïu apiɛth, ago cil ke de yïth ku lok në mïth ke enap ku bïï dɛ yïth ku bïï aa tim cïn kë kït kek.

⁹ “Ka yɛn Bɛ̈nydït Awärjäŋ, yɛn ee thiëc: bï enapë pïïr ku bï dïït? Cï cuɔɔr tueŋ bï nyuän thar bei në meike? Ku tët mïthke bei, ku dhuuŋ kërke ku jɔ ke tɔ biɔɔr? Acïï riɛldït bï kɔɔr ku nɔn ee jur ril bïï ye nyuän thar bei.

¹⁰ Ɣɛɛ, acï com, ku bïï pïïr abïï dït? Cï bï biɔɔr, të le yom de aköl amiäk ye yök? Cï bï biɔɔr ëtɛ̈ɛ̈n të wën cïï yen cil?”

Kääŋ Awer Yic

¹¹ Na wën, go jam de Bɛ̈nydït bɛ̈n tëde yɛn an:

¹² “Thiëc kɔc ee löŋ rɛɛcë na duëërkï kë lueel ee kääŋë ŋic. lɛ̈kë keek an meliŋ de Babilonia acï bɛ̈n Jeruthalem, ku jɔt meliŋ kekë bänyke puk kenïïm Babilonia në yen ëtök.

¹³ Go raan töŋ de baai de melik nööm ku mɛc löŋ ke yen, ku jɔ tɔ loi gutguut, ke bï yen riëëu. Acï kɔc de naamden jɔt ke ke mac

¹⁴ ke bï jur muk ke ke cïï tɔŋ bï bɛ looi, ku bïï ŋic ëgɔk nɔn bïï ë mät döt.

¹⁵ Ku melik de Juda acï löŋ bɛ̈n rɛɛc, ku tooc kɔcke Rip bïk yen lɔ yiɛ̈n jöŋgöör ku remdïït de tɔŋ. Bïï tiam? Duëër jäl kekë ee kakë? Acïï löŋ cï mac duëër dhoŋ kɔ̈u ku jiël ke cïï luiyë këtuc!

¹⁶ “Në yic, ke ya ye Nhialic pïïr, aye Bɛ̈nydït Awärjäŋ lueel an, “Meliŋë abï thou në Babilonia në biäk cïï yen gutguutde dhoŋ kɔ̈u, kekë löŋ cï mac ke melik de Babilonia, raan ëtɛ̈ɛ̈u en në bääny yic.

¹⁷ Ayï rem ril de tɔŋ de melik ë Rip acïï yen bï lëu në kuny bïk thɔ̈ɔ̈r, të le kɔc ke Babilonia tiɔp thɔɔc nɔm, ku weckï puöl në luɔi bï kek kɔc juëc nɔ̈k.

¹⁸ Acï gutguutde dhoŋ kɔ̈u, kekë löŋ cï mac. Acï ee kakë looi kedhie, ku ënɔɔnë acïï bï poth.”

¹⁹ Aye Bɛ̈nydït Awärjäŋ lueel an, “Në yic, ke ya ye Nhialic pïïr, abä luöi këtuc në biäk cï yen löŋ cï mac dhoŋ kɔ̈u, löŋ wään cï yen gutguut looi në rinkï an bïï muk.

²⁰ Yɛn bï bɔi de yiëëp thieth ku dam thïn. Abä lɛɛr Babilonia ku abä lɔ luöi këtuc ëtɛ̈ɛ̈n, në biäk cïï yen piɔ̈u adöt ke yɛn.

²¹ Remdɛn ril de tɔŋ abïï ke nɔ̈k në tɔŋic, ku kɔc bï döŋ apïr, abïï ke thiäi piny në aguuk yiic kedhie. Ëtɛ̈ɛ̈n abäk jɔ ŋic nɔn ee yɛn Bɛ̈nydït, yɛn aa jam.”

Aŋäth cïï Bɛ̈nydït Gutguut Lueel

²² Kë lueel ë Bɛ̈nydït Awärjäŋ kï: “Yɛn bï tim de thidar teem nɔm, ku tɛ̈ɛ̈m këër koor bei ku cuɔm në kuur bäär nɔm,

²³ në kuur bɛ̈ɛ̈r de Yithriɛl nɔm abï cil ë kër ku ŋol ë mïth ku abï jɔ aa tim de thidar piɛth. Diɛt ëbɛ̈n abïk aa nyuc në yenɔm ëtɛ̈ɛ̈n, ku yökkï ɣööt në atïmde yic.

²⁴ Tiim tɔ̈u ee pinyë kedhie abïk ŋic nɔn ee yɛn Bɛ̈nydït, yɛn ee tim bär yiɛp piny, ku ta tiim cek dït abïk bɛ̈ɛ̈r. Yɛn ee tiim tɔ̈c tɔ biɔɔr, ku ta tiim cï riɔu tɔ tɔ̈c. Yɛn Bɛ̈nydït Awärjäŋ, yɛn aa jam. Yɛn bï kë cä lueel dhil looi.”