Edhekiɛl 14 - JAM DE NHIALIC 2011

Bɛ̈nydït Ajäny Lämde Yiëth

¹ Ku röördït kɔ̈k ke Yithriɛl acïk a bɛ̈n luɔp në biäk de këde Bɛ̈nydït piɔ̈u.

² Ago jam de Bɛ̈nydït bɛ̈n tëde yɛn an:

³ “Mɛnh ë raan, kɔckë acïk kepiɔ̈ɔ̈th gäm yiëth ku tɔkï yiëth wɛt keek në rɛ̈ɛ̈cic. Yek tak bä ke gäm këdɛn kɔɔrkï?

⁴ “Ënɔɔnë jam we keek ku lɛ̈kë keek kë cä lueel yɛn Bɛ̈nydït Awärjäŋ, alɛ̈k keek: Raan baai de Yithriɛl ëbɛ̈n, raan cï yepiɔ̈u gäm yiëth, ku tɔ keek wɛt en në rɛ̈ɛ̈cic, ku ee raan bɔ̈ tëde tiët bïï bɛ̈n luɔp, abï bëër ë lop yök tëde yɛn, bëër rɔ̈ŋ kekë yiëth juëcke!

⁵ Yiëth kedhie acïk baai de Yithriɛl yal wei tëde yɛn, ku në bëërdï yic aŋääth nɔn bän riëëuden bɛ pɔ̈k nɔm ciëën.

⁶ “Ënɔɔnë, lɛ̈kë baai de Yithriɛl, kë luɛɛl yɛn Bɛ̈nydït Awärjäŋ: pɔ̈kkï we piɔ̈ɔ̈th ku pälkï yiëth rackun.

⁷ “Të cï raan töŋ de baai de Yithriɛl ku nɔn yen alen rɛ̈ɛ̈r piny de Yithriɛl, të cï yen rɔt yal wei në tëde yɛn ku lɛm yiëth, ku le be tiët lɔ luɔp, yɛn Bɛ̈nydït Awärjäŋ, yɛn bï lopde bɛ̈ɛ̈r!

⁸ Yɛn bï këde jɔ̈ɔ̈ny. Abä tɔ ee kë ye käŋ käär. Abä nyaai në amatnɔm de kɔckï yiic, aguɔkï jɔ ŋic nɔn ee yɛn Bɛ̈nydït.

⁹ “Na cï tiët math, abïï lop bɛ̈ɛ̈r në tör, ee biäk cän yen math yɛn Bɛ̈nydït. Abä nyaai në kɔc ke Yithriɛl yiic.

¹⁰ Yen tiët kekë raan ë lop yen, abïï ke luöi ee këtuuc töŋë.

¹¹ Yɛn bï ee kënë looi ago baai de Yithriɛl tɔ̈u në yɛn ke ke cïï ya bï nyääŋ piny ku riäkkï röt në awɛ̈ɛ̈c. Abïk dhil aa kɔckï ku yɛn bï aa Nhialicden.” Bɛ̈nydït Awärjäŋ yen aa jam.

Nowa, Danyel ku Jop

¹² Go jam de Bɛ̈nydït bɛ̈n tëde yɛn an:

¹³ “Mɛnh ë raan, na cï wut awäc looi ku acïn adöt tëde yɛn, yɛn bï yaciin riɛny biic ku riääk kakɛn ee ke yiɛ̈n kacaam. Abä keek tuöc cɔk, ku näk kɔc ku ɣök aya.

¹⁴ Na cak kɔckë kadiäk, Nowa, ku Danyel ku Jop ë ke cak rëër ëtɛ̈ɛ̈n, piathëpiɔ̈nden aduëër keek kony wei kapäc.” Bɛ̈nydït Awärjäŋ yen aa jam.

¹⁵ “Ku nɔn duɛ̈ɛ̈r ɛn läi roor tuɔɔc bïk kɔc lɔ nɔ̈k, ta piny ee tëde riɔ̈ɔ̈cdït cïn raan bï aa tëëk ëtɛ̈ɛ̈n,

¹⁶ ku na cak ee kɔckë kadiäk rëër ëtɛ̈ɛ̈n, ee yic, ke ya ye Bɛ̈nydït Awärjäŋ, yɛn ee Nhialic pïïr, acïkï wɛ̈ɛ̈tken ayï duetken duëër lëu në kuny. Ee wëiken kek abïk kony kapäc, ku piny abï aa jɔ̈ɔ̈r.

¹⁷ “Ku nɔn bä tɔŋ yiɛ̈n ee pinyë, ku tuöc ke tɔŋ rɛɛc bï raan ëbɛ̈n nɔ̈k ku läi athɔ̈ŋ,

¹⁸ ku na cak ee kɔckë kadiäk rëër ëtɛ̈ɛ̈n, ee yic, ke ya ye Bɛ̈nydït Awärjäŋ, yɛn ee Nhialic pïïr, acïn kë duëërkï lëu në kuny, ayï mïthken, ee wëiken kapäc.

¹⁹ “Na tuɔɔc jɔk ee pinyë, ku jat wëi ke kɔc juëc në agönhdï, näk kɔc ku läi,

²⁰ na cakaa Nowa, ku Danyel, ku Jop rëër ëtɛ̈ɛ̈n, ee yic, ke ya ye Bɛ̈nydït Awärjäŋ, yɛn ee Nhialic pïïr, acïn kë duëërkï lëu në kuny ayï mïthken, piathëpiɔ̈nden ee wëiken kek abïk kony kapäc.”

²¹ Kënë yen aye Bɛ̈nydït Awärjäŋ lueel an, “Yɛn bï karɛc kaŋuan tuɔɔc luöi yɛn Jeruthalem këtuc, tɔŋ, ku cɔk, ku läi roor, ku jɔɔk bï kɔc ku läi nɔ̈k athöŋ.

²² Na de raan lɔ pïïr ku kony mïthke, ke woi keek gup të le kek bɛ̈n tëde yïn. Woi keek ee rac cït ŋö tɔ̈u ke keek, ku jɔ gam nɔn yen yic yen luöi yɛn kɔc ke Jeruthalem këtuc,

²³ Ëtɛ̈ɛ̈n abä ŋic nɔn de yen yic piɛth tɔ yɛn loi ee kënë.” Bɛ̈nydït Awärjäŋ yen aa jam.