Edhekiɛl 12 - JAM DE NHIALIC 2011

Tiët acï lɔ Thiaan!

¹ Go jam de Bɛ̈nydït bɛ̈n tëde yɛn an,

² “Mɛnh ë raan, yïn rɛ̈ɛ̈r we kɔc cï löŋ rɛɛc. Keek adekï nyïïn, ku acïn kë yek tïŋ, adekï yïth, ku acïn kë yek piŋ, në biäk cï kek löŋ rɛɛc.

³ “Ënɔɔnë, Mɛnh ë raan, dut nɔm de wal ke yï cït man ë raan kɔɔr tëde thiaan, ku jël ke piny ë kën guɔ cuɔl. Tɔ rɔt tïŋ ë raan ëbɛ̈n, ke yï jël ke yï jël ke yï lɔ tëdäŋ pei. Tɛk däŋ bï kɔc reec löŋë yï ŋic, ku tɛk däŋ bïk ŋic nɔn ye kek kɔc reec löŋ.

⁴ Të ŋoot ë piny ŋoot ke kën guɔ cuɔl, dut nɔmdu ke yï wel yïnɔm ë pɛ̈cic, agokï yïn tïŋ, ku bïk yïn woi ke yï jël thëën ke yï cït kë lɔ ë pɛ̈cic.

⁵ Ku të lee kek ke ke daaiyë, thur päny de ɣöndu kɔ̈u tɛ̈ɛ̈kë kakuön cï duut ëtɛ̈ɛ̈n.

⁶ Tɔ ke woi yïn ke yï cï kakuön wën cï duut tääu në yïkët, ku yïn lɔ të col ke yï cï yïnyin kum, ke yï cïï të le yïn thïn bï tïŋ. Kë cï looi abï aa jäny tëde baai de Yithriɛl.”

⁷ Yɛn cï kë cïï Bɛ̈nydït lɛ̈k ɛn looi. Në ye köölë yic yɛn cï kakï bɛ̈n duöt cï man ë raan kɔɔr tëde thiaan, na ɣɔn thëën të le ë piny ke col, guɔ päny wec kɔ̈u në yaciin, ku laar biic. Ke woi raan ëbɛ̈n, guɔ kakiën cä duöt tääu në yakët ku jäl.

⁸ Na ɣɔn amiäk, go jam de Bɛ̈nydït bɛ̈n tëde yɛn an:

⁹ “Mɛnh ë raan, ënɔɔnë, baai de Yithriɛl reec löŋë ayek yïn luɔp në kë loi.

¹⁰ Lɛ̈kë keek yen kë luɛɛl yɛn Bɛ̈nydït Awärjäŋ. Jamë ee këde wën melik ceŋ Jeruthalem ku lɔ baai de Yithriɛl ëbɛ̈n rɛ̈ɛ̈r thïn.

¹¹ lɛ̈kë keek an kë cï looiyë ee kïn de kë bï tuöl tëde keek, abïk lɔ tëde thiaan ku abï keek peec.

¹² Wën melik mac päny keek abï kakɛn cï duut ɣääc në mɔ̈ɔ̈thic ku kuɛl rɔt të ɣɔ̈ɔ̈r cïk wɛ̈c en në päny kɔ̈u. Abï yenyin kum ku acïï të le yen thïn bï tïŋ.

¹³ Ku yɛn bï bɔidï thieth ku dam thïn. Ku ja lɛɛr pänydït de Babilon, të bïï yen lɔ thou thïn ke kën tïŋ.

¹⁴ Yɛn bï kɔc ke baaide, ku kɔc ee yen jääm, ku kɔc yen tiit thäi në aguuk yiic kedhie, ku abïï kɔc keek kɔɔr bïk keek nɔ̈k.

¹⁵ “Të lan ke thiäi piny në juöör kɔ̈c yiic, ku piiny ke alɛi yiic, abïk jɔ ŋic nɔn ee yɛn Bɛ̈nydït.

¹⁶ Yɛn bï kɔc lik tɔ pïïr në tɔŋic, ku cɔk, ku jɔɔk, yen abïï kek e jɔ ŋic në juöör yiic ëtɛ̈ɛ̈n, abïk jɔ ŋic nɔn rɛɛc ë ka wään yek looi, ku abïk a ŋic nɔn ee Yɛn Bɛ̈nydït.”

Kïn de Tiët Lɛthë

¹⁷ Go jam de Bɛ̈nydït bɛ̈n tëde yɛn an:

¹⁸ “Mɛnh ë raan, ye rɔ tɔ lɛthë të ciëm yïn, ku lɛthë yïn ë riɔ̈ɔ̈c të dek yïn pïïu.

¹⁹ lɛ̈kë jur ëbɛ̈n an kënë ee jam de Bɛ̈nydït Awärjäŋ, jam lëk kɔc ke Jeruthalem ŋoot ke ke rɛ̈ɛ̈r pinyden: Abïï ke lath të ciëm kek, ku lɛthë keek në riɔ̈ɔ̈c të dek kek pïïu. Pinyden abï döŋ ke cïn kë tɔ̈u thïn, në biäk liiu ë löŋ tëde kɔc rɛ̈ɛ̈r thïn.

²⁰ Pɛ̈ɛ̈nydït cï yiic thiäŋ ë kɔc ë nɔɔnë abïï ke riɔ̈ɔ̈k, ku pinyden abï döŋ ke ye jɔ̈ɔ̈r. Ëtɛ̈ɛ̈n abïk jɔ ŋic nɔn ee yɛn Bɛ̈nydït.”

Kääŋ Ŋic ku Jam Man

²¹ Go jam de Bɛ̈nydït bɛ̈n tëde yɛn an:

²² “Mɛnh ë raan, eeŋö ye kɔc ke Yithriɛl kääŋë nyɔkic: ‘Akööl ayek tëëk, ku kë cï caar acie aa yic’?

²³ Ënɔɔnë lɔ lɛ̈kë keek, kë luɛɛl yɛn Bɛ̈nydït Awärjäŋ në biäk de ee kënë. Yɛn bï ee kääŋë tɔ kääc. Acïï bï bɛ nyɔk ë luɛl në Yithriɛl. lɛ̈kë keek ee kënë në nyinde yic: Akööl acïk bɛ̈n, ku kë cï caar acï aa yic!

²⁴ “Abï ciën nyuuth lueth kɔ̈k bï nu baai de Yithriɛl, ku nɔn ee kek cäär ee kɔc möör.

²⁵ Yɛn Bɛ̈nydït Yɛn bï jam wo keek, ku kë bä lueel abïï looi. Abï ciën agääu. Në runkuön ke pïïr, yïn bï löŋ rɛɛc, ku yɛn bï kë cän we jɔ̈ɔ̈ny an bä looi looi.” Acä lueel yɛn Bɛ̈nydït Awärjäŋ.

²⁶ Go jam de Bɛ̈nydït bɛ bɛ̈n tëde yɛn an:

²⁷ “Mɛnh ë raan, baai de Yithriɛl ayek tak nɔn ee nyuuthku, ku ka cï keek caar ajamkï në biäk de ka bï bɛ̈n rial miäk wadäŋ.

²⁸ Ka yïn lɛ̈kë keek an ee yɛn Bɛ̈nydït Awärjäŋ, yɛn alueel ee kakë: Abï bɛ ciën agääu däŋ. Kë cä lueel abï looi. Acä lueel, Yɛn Bɛ̈nydït Awärjäŋ!