Diɛt ke 5 - JAM DE NHIALIC 2011

Jam de Moc

¹ Yɛn cï lɔ domdï, nyan mit ë yapiɔ̈u, nyandiën thiaak. Yɛn mɛ̈ɛ̈t walkiën ŋïr yiic kekë mer. Yɛn cam miökdiën ë kiëc, kekë athïn de kiëc. Yɛn dek mɔ̈ndï kekë ca. Cämë, monydiën nhiaar, ku dɛ̈kkë arëk abä wiɛɛt ë nhiëër!

Jam de Diäär Din de Ŋuan Jam de Tik

² Piɔ̈ndï aa yiɛ̈n, të wën niɛɛn ɛn, Guɔ nyuöth ke monydiën nhiaar ë tɔŋ ɣöt thok. Tɔ ya bɔ̈ ɣöt, raandiën nhiaar, nyandiën cï dikëdik, ku ye guukdï. Yɛn tiɔp nɔm wokë thäc, ku nɔmdï acï lɔ bath kekë ruu.

Jam de Moc Jam de Tik

³ Yɛn cï lupɔ guɔ bɛ̈ɛ̈i bei ë yakɔ̈u, eeŋö duëër ɛn lupɔ bɛ tääu? Yɛn cï ya cök waak, eeŋö duëër ɛn ke bɛ tɔ riääk?

⁴ Monydiën nhiaar acï yeciin tääu ë ɣöt thok, guɔ piɔ̈u lɔ lïk në luɔi cï en guɔ thiɔ̈k.

⁵ Yɛn cï rɔt jɔt bä ɣöt lɔ liep thok monydiën nhiaar. Yɛn kuöm cin në mer, ku thuat riöp wo pïïu ke mer, të wën dam ɛn ɣöt thok.

⁶ Guɔ ɣöt jɔ liëp thok monydiën nhiaar, aguɔ yök ke cï guɔ jäl. Aa kaar bä piŋ röl arëët! Guɔ lɔ kɔɔr, ku akën bɛ̈n yök, Guɔ cɔɔl ku acïn röl cä piŋ, röl bëër ɛn thok.

⁷ Go kɔc ee pänydït tiit ya yök, gokï ya yup ku duikï yɛn, kɔc ee kal ë pänydït tiit acïk lupɔdï reetic.

⁸ Lɛ̈kkï yɛn gutguut diëër ke Jeruthalem, na cäk monydiën nhiaar yök, bäk lɛ̈k en nɔn cän kɔ̈c wokë täk.

Jam de Diäär

⁹ Tiiŋ läk aläl në diäär yiic, Monyduön nhiaar, de kë duëër en wöc kekë kɔc kɔ̈k? Eeŋö nu në yeguöp kën ee këde gäi, kë duëër wok yïn lɛ̈k gutguutda?

Jam de Tik

¹⁰ Monydiën nhiaar ee dhuŋ läk ku aril, anu pei në aguum kathiëër yiic (10,000).

¹¹ Acït nyin adhääp ku atäc guöp, ku nhïmke alek loplop, ku acolkï cï gaak.

¹² Aläk nyin cï guök tɔ̈u ë nyin de pïïu riŋ nɔm, acït guök cï waak në ca, ku kɛ̈ɛ̈ckï në nyin nɔm.

¹³ Adik gëm cït dom de tiim, thiäŋ kekë wal ŋïr ku wal tum. Acït thok agurbiök cï juɔɔl në pïïu ke mer.

¹⁴ Acï ŋiëc cak cin, ku ee ceŋ ë jonh adhääp, ku atäc guöp cï tuŋ ë aköön, cï kueer kɔ̈u në kɔi läk lɔ riauriau.

¹⁵ Ku acït cök mën ke kur, cï tääu ë kuny de adhääpic. Ee bäny cï kur ke Lebanɔn kekë tiimkɛn ke thidar bär.

¹⁶ Thoŋde amit arɔ̈ŋ ke ciëm, këriëëc tɔ̈u ë biäkde ëbɛ̈n ee ya miët piɔ̈u. Yen täu tɔ̈u ë monydiën nhiaar ka, diëër ke Jeruthalem.