Diɛt ke 1 - JAM DE NHIALIC 2011

¹ Diɛt piɛth aläl diɛt ke nhiëër, acï lueel an ë ke gɛ̈ɛ̈rë Tholomon.

Din Tueŋ Jam de Tik

² Thoŋdu ee ya kuöm piny në ciëm ee yïn a ciɛm thok, nhiëërdu aŋuän në mɔ̈u.

³ Ade awäu mit ee bɛ̈n bei ë yïguöp, ku ye cɔ̈t de rinku yɛn tɔ tak awäuwë. Acïn tiiŋ duëër mɔ̈l ke cï yï nhiaar.

⁴ Jɔt ɛn wo yïn, ku kɔtku, tɔ rɔt ee melikdï, ku lɛɛrë yɛn ɣöndu. Ke wok bï piɔ̈ɔ̈th miɛt ëtök, deku nhiëër arëët, cït man ë kɔc cï dek në mɔ̈u. Yen kë ye diäär ëbɛ̈n yïn nhiaar ka!

⁵ Diëër ke Jeruthalem, yɛn col ku läk, yɛn col cï pɛɛny ke jɔ̈ɔ̈r de Kedar, ku läk cï lupɔɔ ke awëërnyïïn nu ɣön bɛ̈ɛ̈r de Tholomon yic.

⁶ Du yɛn ee biɔɔn guöp në biäk de kïndï, ku në biäk cïï akɔ̈l ya puk guöp. Wɛ̈ɛ̈tëkɔckuɔ aa ke göth në yɛn, gokï yɛn tɔ lɔ lui në dom ë napic. Ka yɛn cï nɔm ciën kaam bɛ yɛn domdiën ë nap kiëët.

⁷ Raandiën nhiaar, lɛ̈kë yɛn, Ee tënou bï yïn lunyduön ë thök tɔ lɔ nyuäth thïn? Ee tënou bï yïn luny tɔ lɔ lɔ̈ŋ thïn aköl, të cïï akɔ̈l tuöc? Eeŋö bï yïn yɛn tɔ kɔɔr yïn në luuny ke tïït kɔ̈k yiic?

Jam de Moc

⁸ Tiiŋ läk në diäär yiic, na cïï ee tɛ̈ɛ̈n ŋic? Lɔɔr ku kuany luny cök, ku nyuääthë bɔɔthku në pɛɛny ke tïït lɔ̈ɔ̈m.

⁹ Yïn raandiën nhiaar, yïn ya thɔ̈ŋ ŋun lɛ̈k ë jöŋgör de abëël ke melik.

¹⁰ Nhïmku alɛ̈kkï në yïgëm, ayek lööny ë yïyeth cït kuat de ateek.

¹¹ Ku yïn buk luöi kuat de adhääp kekë guën de ateek.

Jam de Tik

¹² Melikdï acï yekɔ̈u kan ë thöönyde nɔm, ku jɔ awäu de aŋiëërdï piny paat.

¹³ Raandiën nhiaar ade guöp aŋiëër de mer, të tɔ̈ɔ̈c yen ë yayɔu.

¹⁴ Raandiën nhiaar acït gaak ye wal moc, gaak ee luɔk në duum ke enap yiic në Engedi.

Jam de Moc

¹⁵ Eeŋö jɔ yïn läk aya, nyandiën nhiaar, yïn ë nyin agɔk aläl wekë nhiëër!

Jam de Tik

¹⁶ Eeŋö dïït jɔ yïn dik aya, raandiën nhiaar, yïn cï ya tɔ mit piɔ̈u! Wal tɔ̈ckë acïtkï biökuɔn ke tɔ̈c,

¹⁷ yïth ke tiim ke thidar acïtkï muuk ke ɣönda nɔm, ku kër ke tiim ke thaipereth acïtkï kɔɔu ke ɣönda nɔm.