Diɛt 81 - JAM DE NHIALIC 2011

Din de Dhuëëŋ

¹ Yak Nhialic Raan ee wook gël kiët diɛt në miɛtëpiɔ̈u, yak diɛt ke piɔ̈ny kiët Nhialic de Jakop!

² Galkï kiët ku guötkï lɔ̈ɔ̈r, kiɛtkï diɛt në thom kekë aruöör.

³ Kuɔthkï kaaŋ në biäk de dhuëëŋ, të wil ë pɛɛi ku të kɛ̈ɛ̈c ë pɛɛi cil.

⁴ Kënë ë löŋ në Yithriɛl, jam ë lueel Nhialic de Jakop.

⁵ Aa gëm kɔc ke Yithriɛl, wään mɛk En piny de Rip.

⁶ “Yɛn cï kathiek jat piny në yïkɔ̈u, Yïn cä tɔ tɛ̈ɛ̈u kutduön de thoop piny.

⁷ Wään nu Yïn ë nuanic, yïn cï ya cɔɔl, guɔ yï kony. Yɛn cï lɔ̈ŋdu bɛ̈ɛ̈r tëdiën cän thiaan thïn. Ku thɛm yïn në nyin de Meriba.

⁸ Piɛŋkï, këdiën luɛɛl, wek kɔckï, kɔc ke Yithriɛl anhiaar aläl ë luɔi duëër wek këdï piŋ!

⁹ Wek cïï yanh däŋ bï aa lam.

¹⁰ Yɛn ee Bɛ̈nydït Nhialicdun, raan ë bïï we bei ë Rip. Liepkï wethook, ke we bä cääm.

¹¹ “Ku kɔckï acïkï jamdï ee kɔn piŋ, kɔc ke Yithriɛl acïkï yɛn ee riëëu.

¹² Aguɔ keek tɔ lɔ në kueerdɛn de dhɔ̈ɔ̈nic, ku loikï këdɛn kɔɔrkï.

¹³ Anhiaar aläl ë luɔi duëër ë kɔckï jamdï piŋ, ku nhiaar aya ë luɔi duëër kek a riëëu!

¹⁴ Yɛn duëër kɔckɛn ke ater dap tiaam, ku pɛɛc kɔc ke aterden kedhie.

¹⁵ Kɔc man Ɛn abïk kenïïm guöt piny ë Yanɔm në riɔ̈ɔ̈c, ku dui bïï ë keek dui abï tɔ̈u aɣet athɛɛr.

¹⁶ Ku wek bä cääm në kuïn de agamɔ piɛth, ku ta week kueth në miök de kiëc.”